ކުރިއަށް އޮތް ލޯކަލް ކައުންސިލް އިންތިހާބާއެކު، ރައީސް މުހައްމަދު މުއިއްޒުގެ ސަރުކާރުން ހުށަހަޅައިގެން ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށް ބާއްވަން ފެނޭތޯ ބަލަން ނަގާ ފެންނަ ނުފެންނަ ވޯޓަކީ ސިއްރިއްޔާތުގައި ކުރާ ބަގާވާތެއްގެ ގޮތުގައި ކުރީގެ ރައީސް އިބްރާހިމް މުހައްމަދު ސޯލިހު ސިފަކުރައްވައިފި އެވެ.
ދެ އިންތިހާބު އެއްކޮށްލުމާ ދެކޮޅަށް އެމްޑީޕީން ކުރިއަށްގެންދާ "ނޫނެކޭ" ކެމްޕޭނުގެ ދަށުން ރޭ އެ ޕާޓީގެ ހަރުގޭގައި ބޭއްވި ޖަލްސާގައި ވާހަކަ ދައްކަވަމުން ސޯލިހު ވަނީ އެއީ ގާނޫނުއަސާސިއާ ދެކޮޅަށް ކުރާ ބަގާވާތެއް ކަމަށް ވިދާޅުވެފަ އެވެ.
"އެ އިންތިހާބާ އެކީގައި ސިއްރިއްޔާތުގައި ސިއްރުސިއްރުން މި ސަރުކާރުން ކުރަން އުޅޭ ބޮޑު ބަގާވާތެއްގެ ވާހަކަ. ގާނޫނުއަސާސީއަށް ގެންނަ ބޮޑު ބަގާވާތެއްގެ ވާހަކަ. އެހެން ނޫންނަމަ މި އިންތިހާބުގެ ފަހަތުގައި ސިއްރުން މި ވޯޓާ ހަމައަށް ގެންދާކަށް ނުޖެހޭނެ. މިއަދު ކުރަން މި އުޅޭ ކަމަކީ ރައްޔިތުންގެ އަޑު ކަނޑުވާލައި، ބާރު ކަނޑުވާލައި، ބާރުތައް އެއްކޮށް، ހުދުމުހުތާރު ވެރިކަމަކާ ދެކޮޅަށް މި ގައުމު ގެންދަން ކުރާ މަސައްކަތް،" ސޯލިހު ވިދާޅުވި އެވެ.
ސޯލިހު ވިދާޅުވި ގޮތުގައި މިހާތަނަށް އިންތިހާބުތައް ބާއްވަމުން އައި ތާރީހުތަކުގައި ބާއްވައިގެން ވެސް ވެރިކަމުގައި ހުންނަވާ ބޭފުޅަކު މަޖިލިސް ބޮޑުކޮށް ނަންގަވަ އެވެ.
އެގޮތުން، 2014 ވަނަ އަހަރު މުޅި މަޖިލީހުގެ 69 ޕަސެންޓު ކާމިޔާބު ކުރީ އޭރު ވެރިކަމުގައި އޮތް ކޯލިޝަނުން ކަމަށާއި 2018 ވަނަ އަހަރު މަޖިލީހުގެ 75 ޕަސެންޓު އެމްޑިޕީން އެކަނި ނެގި ކަމަށް ސޯލިހު ވިދާޅުވި އެވެ. އަދި 2024 ގައި އިންތިހާބުކުރި މަޖިލީހުގެ 87 ޕަސެންޓު ގޮނޑި ކާމިޔާބުކުރީ މުއިއްޒުގެ ސަރުކާރުންކަން ސޯލިހު ފާހަގަކުރެއްވި އެވެ.
"އެއްކޮށް މި އިންތިހާބު ބާއްވައިފިއްޔާ މުޅި މަޖިލިސް އެކީ ވެރިކަމުގައި ހުންނަ ބޭފުޅަކު ނަންގަވާނެ. ނަތީޖާ އަކަށް ވެގެންދާނީ ސަރުކާރު ޖަވާބުދާރީ ކުރުވުމަށް އޮތް ފުރުސަތު މުޅިން ގެއްލިގެން ދިއުން. މަޖިލީހުގައި ތިއްބަވާނީ މުޅިން ވެސް ސަރުކާރުގެ މެންބަރުން،" ސޯލިހު ވިދާޅުވި އެވެ.
މިހާރު ވެސް ރައްޔިތުންގެ މަޖިލީހުން ސަރުކާރު ޖަވާބުދާރީކުރުވުމަށް އެއްވެސް ކަމެއް ނުކުރެވޭ ކަމަށް ސޯލިހު ވިދާޅުވި އެވެ. "ވިދާޅުވީމާ ވިދާޅުވާ ކަމެއް ކުރުން ނޫން ކަމެއް ނޯންނާނެ" ކަމަށް ސޯލިހު ވިދާޅުވި އެވެ.
ފެންނަ ނުފެންނަ ވޯޓުގައި އަހާނީ ކޮން ސުވާލެއް؟
މި ވޯޓުގައި ރައްޔިތުންނާ ކުރިމަތިލާނީ ގާނޫނުއަސާސީއަށް ގެންނަން ނިންމާފައިވާ އިސްލާހާ ގުޅޭ ސުވާލެކެވެ. އެއީ؛
"ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވާފައިވާ ގާނޫނުއަސާސީ އަށް 8 ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވަން ފެނޭ ހެއްޔެވެ؟"
މި ވޯޓުގައި ރައްޔިތުންގެ ތާއިދު އޮތް ކަމަށް ފާސްވެއްޖެނަމަ، 2028 ވަނަ އަހަރުގެ ރިޔާސީ އިންތިހާބާއި މަޖިލިސް އިންތިހާބު ބާއްވާނީ އެކުއެކީގައެވެ. ފާހަގަކޮށްލެވޭ ގޮތުގައި، 2028 ގެ ރިޔާސީ އިންތިހާބުގައި ވާދަކުރައްވާނެކަން މިހާތަނަށް ރަސްމީކޮށް އިއުލާން ކުރައްވާފައިވާ ހަމައެކަނި ކެންޑިޑޭޓަކީ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
