އިޒްރޭލަކީ ޓެރަރިސްޓު ގައުމެއް ކަމަށާއި އެމެރިކާއިން މިހާރު ދެމުން އަންނަ ހަމަލާތައް ވެސް "ގޯސް" ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
މިއަދު ހެނދުނު ރައީސް އޮފީހުގައި މުއިއްޒު ވަނީ 304 ދުވަސް ފަހުން ނޫސްވެރިންގެ ބައްދަލުވުމެއް ބާއްވާފަ އެވެ. އެ ބައްދަލުވުމުގައި ގިނަ ނޫސްވެރިންތަކެއް ވަނީ އިޒްރޭލާއި އެމެރިކާއިން އިރާނަށް ދިން ހަމަލާތައް ރާއްޖޭން ކުށްވެރި ނުކުރާތީ ސުވާލު އަމާޒުކޮށްފަ އެވެ.
"އިޒްރޭލުން ހަމަލާ ދިނުން ގޯސް، އިޒްރޭލުން އެއީ ވަރަށް ހަރުކަށިކޮށް ދަންނަވަމުން މި ދަނީ، އެއީ ޓެރަރިސްޓު ގައުމެއް ދެއްތޯ، ފަލަސްތީނު އެ ދަނީ ސުންނާފަތި ކުރަމުން. އެމެރިކާއިން އެ ދޭ ހަމަލާ ވެސް ގޯސް، ހުރިހާ ފަރާތެއް ވެސް ގޯސް،" މުއިއްޒު ވިދާޅުވި އެވެ.
އިރާނުން ރައްދުގައި އަރަބި ގައުމުތަކަށް ދެމުންދާ ހަމަލާތަކާ ދެކޮޅުކަން މުއިއްޒުގެ ނޫސްވެރިންގެ ބައްދަލުވުމުގައި ހާމަކުރެއްވި އެވެ.
"އަރަބި އިސްލާމީ ގައުމުތަކުގެ ވެރިންނަށް އަޅުގަނޑު އިރާދަކުރެއްވިއްޔާ ގުޅާ ވާހަކަދެއްކުން، ރާއްޖޭގެ ސަޕޯޓް އެފަރާތްތަކަށް އޮތްކަން ދެންނެވުމުގެ މަސައްކަތް އެބަކުރިއަށް ގެންދަން. މިހާރު ރޭގައި އަޅުގަނޑު ވާނީ ޔޫއޭއީގެ ރައީސާ ވާހަކަދައްކާފައި ފޯނު ކޯލެއްގައި،" މުއިއްޒު ވިދާޅުވި އެވެ.
ސަރުކާރުން މަސައްކަތް ކުރާނީ އަރަބި އިސްލާމީ ގައުމުތަކާއެކު ކަމަށް މުއިއްޒު ވިދާޅުވި އެވެ. އިރާނަކި ރާއްޖެ ވެސް ހިމެނޭ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ މެންބަރެކެވެ. މިއީ އިސްލާމީ ގައުމުތަކުގެ މައްޗަށް ބިނާވެފައިވާ ޖަމާއަތެކެވެ.
އިރާނުން ގަލްފުގެ ގައުމުތަކަށް ހަމަލާ އަމާޒުކުރަމުން ދަނީ އެ ގައުމުތަކުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތައް ބޭނުންކޮށްގެން އެ ގައުމަށް ހަމަލާ ދެމުން އަންނާތީ އެވެ.
ހަމަލާތަކާ ގުޅިގެން ނެރުނު ބަޔާނުގައި އިސްވެ ހަމަލާދިން އިޒްރޭލާއި އެމެރިކާގެ ނަން ވެސް ދިވެހި ސަރުކާރުން ގެނެސްފައި ނުވެ އެވެ.
