ލަންޑަން (ޖެނުއަރީ 31) - މި އަހަރު އެމެރިކާ، މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕްގައި ކުޅޭ ފްރާންސްގެ ސްކޮޑުން ޖާގަ ހޯދުމަށްޓަކައި، ކްރިސްޓަލް ޕެލަސް އަށް ކުޅެމުން އަންނަ ފޯވާޑް، ޖިއަން-ފިލީޕް މަޓޭޓާ، މި މަހުގެ ޓްރާންސްފާ ތެރޭގައި އެ ކްލަބް ދޫކޮށްލުމުގެ މަސައްކަތް ކުރަމުން އަންނަ ކަމަށް ބުނެފި އެވެ.
ފްރާންސްގެ ލިޔޯން އާއި ޖަރުމަނުގެ މައިންޒް އަށް ކުޅެފައިވާ މަޓޭޓާ، 28، ޕެލަސް އަށް 2021 ވަނަ އަހަރު ލޯނަކަށް އައިސް އެ ޓީމުގެ ދާއިމީ ކޮންޓްރެކްޓެއް ހޯދީ މޮޅު ކުޅުމެއް ދައްކައިގެންނެވެ. ޕެލަސް އިން އެފްއޭ ކަޕް ހޯދި ޓީމުގައި ވެސް މޮޅު ކުޅުމެއް ދެއްކި މަޓޭޓާ އަށް ޝައުގުވެރިވާ ކްލަބްތަކަކީ ނޮޓިންހަމް ފޮރެސްޓް އާއި އިޓަލީގެ އޭސީ މިލާން އެވެ. މީގެ ތެރެއިން މަޓޭޓާ ބޭނުންވަނީ މިލާން އަށް ދިއުމަށެވެ.
ފްރާންސްގެ 19 އަހަރުން ދަށާއި 21 އަހަރުން ދަށުގެ ޓީމަށް ވެސް ކުޅެފައިވާ މަޓޭޓާ ވަނީ 2024 ވަނަ އަހަރުގެ ފްރާންސްގެ އޮލިމްޕިކްސް ޓީމަށް ވެސް ކުޅެފަ އެވެ. އޭނާގެ އެންމެ ބޮޑު ޓާގެޓަކީ، މި އަހަރުގެ ވޯލްްޑް ކަޕްގައި ކުޅޭ ފްރާންސް ސްކޮޑުން ޖާގަ ހޯދުމެވެ. އެކަމަށްޓަކައި، ޔޫރަޕްގެ ވަރުގަދަ ލީގެއްގައި، ބޮޑު ޓީމެއްގައި ފެންވަރު ސާބިތުކޮށްދޭން އޭނާ ހުރީ ވަރަށް ބޭނުންވެފަ އެވެ.
އިޓާލިއަން ލީގަށް ވާދަކުރަމުން އަންނަ މިލާނުން މަޓޭޓާގެ ސޮއި ހޯދާނަމަ، 35-40 މިލިއަން ޑޮލަރުގެ ބިޑެއް ކުރަން ޖެހޭނެ އެވެ.
ފްރާންސްގެ ސީނިއާ ގައުމީ ޓީމަށް މަޓޭޓާ ފުރަތަމަ ފަހަރަށް މެޗެއް ކުުޅުނީ، މިދިޔަ އަހަރުގެ އޮކްޓޫބަރު މަހުގަ އެވެ. އޭގެ ފަހުން، ގައުމީ ސްކޮޑުގައި ހިމެނިގެން ތިން މެޗެެއްގައި ކުޅެފައިވާއިރު، އަޔަލެންޑް ކޮޅަށް ލަނޑު ވެސް ވަނީ ޖަހައިފަ އެވެ.
