މިދިޔަ އަހަރު އެސްޓީއޯއަށް ޖުމްލަ 15.5 ބިލިއަން ރުފިޔާގެ އާމްދަނީއެއް ލިބުނު ކަމަށް އެ ކުންފުނީގެ މާލީ ހިސާބުތަކުން ދައްކައިފި އެވެ.
މިއަދު އާންމުކުރި އެ ކުންފުނީގެ މިދިޔަ އަހަރުގެ ފަހު ކުއާޓާގެ މާލީ ހިސާބުތައް ދައްކާގޮތުން އެސްޓީއޯ އަށް ލިބުނު ޖުމްލަ އާމްދަނީ ވަނީ މިދިޔަ އަހަރަށްވުރެ 98 މިލިއަން ރުފިޔާ އިތުރުވެފަ އެވެ. އާމްދަނީ އާއެކު ފައިދާ ވެސް އިތުރުވެފައިވެ އެވެ.
އެގޮތުން މިދިޔަ އަހަރު ޓެކްސްއަށް ކެނޑުމުގެ ކުރިން 910 މިލިއަން ރުފިޔާގެ ފައިދާ އަދި ޓެކުހަށް ކެނޑުމަށްފަހު، ސާފު ފައިދާގެ ގޮތުގައި 762 މިލިއަން ރުފިޔާ އެސްޓީއޯ އަށް މިދިޔަ އަހަރު ލިބުނެވެ. މިއީ އަހަރުން އަހަރަށް ބަލާއިރު ތިން ޕަސެންޓުގެ ކުރިއެރުމެކެވެ.
މިދިޔަ އަހަރުގެ ފަހު ކުއާޓާގެ ހިސާބުތަކަށް ބަލާއިރު 2025 ގެ ފަހު ތިން މަހު އެ ކުންފުންޏަށް އާމްދަނީގެ ގޮތުގައި 4.1 ބިލިއަން ރުފިޔާ ލިބުނެވެ. މިއީ މިދިޔަ އަހަރުގެ ތިންވަނަ ކުއާޓާ އަށްވުރެ އަށް ޕަސެންޓު އިތުރުވުމެކެވެ.
ކުއާޓާއިން ކުއާޓާއަށް އާމްދަނީ އިތުރުވި ސަބަބެއް ކަމުގައި އެ ކުންފުނިން ބުނެފައިވަނީ ކުންފުނީގެ ހުރިހާ ދާއިރާތަކުގެ ވިޔަފާރި ރަނގަޅުވެފައިވުމެވެ. އެގޮތުން، މިދިޔަ އަހަރުގެ ފަހު ކުއާޓާގައި ތެލުގެ އާމްދަނީ ހަތަރު ޕަސެންޓުން އިތުރުވިއިރު އެހެނިހެން އާމްދަނީ 19 ޕަސެންޓުން އިތުރުވިކަން އެ ކުންފުނިން ފާހަގަކޮށްފައިވެ އެވެ.
އެ ކުއާޓާގައި އެކަނި އެސްޓީއޯ އަށް ޖުމްލަ ފައިދާގެ ގޮތުގައި 671 މިލިއަން ރުފިޔާ ލިބުނެވެ. މީގެ ތެރެއިން 322 މިލިއަނަކީ ހިންގުމުގެ ފައިދާ އެވެ.
