ލަންޑަން (ޖެނުއަރީ 29) - ޔުއެފާ ޗެމްޕިއަންސް ލީގުގެ ލީގު ބުރުގެ ކުޅުން ނިމި، ގަދަ އަށް ޓީމަށް މުބާރާތުގެ ގަދަ 16 ބުރުގެ ސީދާ ޖާގައެއް ލިބުނުއިރު، އޭގެ ތެރޭގައި އިނގިރޭސި ޕްރިމިއާ ލީގުގެ ފަސް ޓީމެއް ހިމެނިއްޖެ އެވެ.
އެ ގޮތުން، ޗެމްޕިއަންސް ލީގުގެ އާ ފޯމެޓްގައިވާ ގޮތުން، 36 ޓީމެއް ލީގު ބުރުގައި ކުޅޭއިރު، ކޮންމެ ޓީމަކުން، އަމިއްލަ ދަނޑުގައި ހަތަރު މެޗު އަދި ރަށުންބޭރުގައި، ހަތަރު މެޗު ކުޅޭ ގޮތަށް އަށް މެޗުގެ ލީގު ބުރެއް ކުޅޭނެ އެވެ. އެ ލީގު ބުރުގެ ގަދަ އަށް ޓީމަކަށް ގަދަ 16 ބުރުގެ ސީދާ ޖާގައެއް ލިބޭއިރު، 9-24 އަށް ރޭންކް ކުރެވޭ ޓީމުތައް ޕްލޭއޮފްގައި ކުޅޭނެ އެވެ. އެއީ، ގަދަ 16 ގެ ބާކީ އަށް ޓީމު ނެގުމަށެވެ.
އެ ގޮތުން، ގަދަ އަށެއްގެ ތެރޭގައި، ހިމެނުނީ، ކުޅުނު އަށް މެޗުން ވެސް މޮޅުވެ، ފުރިހަމަ ރެކޯޑަކާ އެކު، 24 ޕޮއިންޓް ހޯދި، އިންގްލެންޑްގެ އާސެނަލް އާއި ދެ ވަނައިގައި 21 ޕޮއިންޓާ އެކު އޮތް ޖަރުމަނުގެ ބަޔާން މިއުނިކާއި ތިން ވަނައިގައި 18 ޕޮއިންޓާ އެކު އޮތް އިންގްލެންޑްގެ ލިވަޕޫލާއި 17 ޕޮއިންޓާ އެކު ހަތަރެއްގައި އޮތް އިންގްލެންޑްގެ ޓޮޓެންހަމް ހޮޓްސްޕާސް އާއި ފަސް ވަަނައިގައި 16 ޕޮއިންޓާ އެކު އޮތް ސްޕެއިނުގެ ބާސެލޯނާ އާއި ހަ ވަނައިގައި 16 ޕޮއިންޓާ އެކު އޮތް އިންގްލެންޑްގެ ޗެލްސީ އާއި ހަތް ވަނައިގައި 16 ޕޮއިންޓާ އެކު އޮތް ޕޯޗުގަލްގެ ސްޕޯޓިން ލިޒްބަން އާއި އަށް ވަނައިގައި 16 ޕޮއިންޓް ހޯދައިގެން އޮތް އިންގްލެންޑްގެ މެންޗެސްޓާ ސިޓީ އެވެ.
ޗެމްޕިއަންސް ލީގުގެ ޗެމްޕިއަންކަން 15 ފަހަރު ހޯދި ރެއާލް މެޑްރިޑާއި އެންމެ ފަހުގެ ޔޫރަޕްގެ ޗެމްޕިއަން، ޕީއެސްޖީން ވެސް ކުޅެން ޖެހިފައިވަނީ ޕްލޭއޮފްގަ އެވެ. ޕްލޭއޮފުން ފުރުސަތު ނުލިބި ކެޓި ވަރުގަދަ އެއް ޓީމަކީ، އިޓަލީގެ ޗެމްޕިއަން، ނަޕޯލީ އެވެ.
