މީޑިއާ އެންޑް ބްރޯޑްކާސްޓިން ކޮމިޝަނުގެ ގާނޫނު ބާތިލް ކުރަން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ހައި ކޯޓަށް މައްސަލައެއް ވައްދައިފި އެވެ.
އެމްޖޭއޭއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ އެސޯސިއޭޝަންގެ ރައީސް އަހްމަދު ނާއިފް ވިދާޅުވީ ބާތިލުކުރަން ހުށަހެޅި ގާނޫނަކީ ރާއްޖޭގެ ގާނޫނު އަސާސީގައި އެކަށައަޅާފައިވާ އުސޫލުތަކާއި ރާއްޖެ ބައިވެރިވެފައިވާ މުއާހަދާތަކާ ވެސް ހިލާފަށް ފާސްކޮށްފައިވާ ގާނޫނެއް ކަމަށެވެ.
"މި ގާނޫނަކީ ރާއްޖޭގެ ގާނޫނުއަސާސީ އެންވިޝަން ކުރާ އުސޫލުތަކާއި އޭގެއިތުރަށް ރާއްޖެ ބައިވެރިވެފައި ހުރި ބައިނަލްއަގުވާމީ މުއާހަދާތައް، އެއީ އައިސީސީޕީއާރްގެ އާޓިކަލް 19 ގައި އެބުނާ ތްރީޕާޓް ޓެސްޓާވެސް ހިލާފަށް އެކުލަވާލެވިފައި އޮތް ގާނޫނެއްކަން ވަރަށް ސާފުކޮށް އެބަ އޮތް އެނގެން. ދެން ރައްޔިތުންގެ މަޖިލީހުގެ ބާރެއް އޮތަތީވެ ނަންބަރު ހަމަވީމަ ކަމެއް ކުރެވިދާނެ،" ނާއިފް ވިދާޅުވި އެވެ.
އެމްޖޭއޭއިން ކޯޓަށް ހުށަހެޅި މައްސަލައިގައި ބުނީ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ގާނޫނު ބާތިލުކުރަން ހައި ކޯޓުގައި އެދުނީ އެ ގާނޫނު ގާނޫނުއަސާސީގެ ގިނަ މާއްދާތަކާ ހިލާފުވުމުގެ އިތުރުން އެ ގާނޫނަކީ އެތަކެއް ހައްގުތަކެއް ނިގުޅައިގަންނަ ގާނޫނަކަށްވާތީ ކަމަށެވެ.
އެމްޖޭއޭއިން އިތުރަށް ބުނީ އެ ގާނޫނުގައި މަނާ ކަންކަން ކަމަށް ކަނޑައަޅާފައިވާ ކަންކަމަަކީ ވަކި މާނަކުރުމެއް އަދި ހުދޫދެއް ބަޔާންނުކޮށް ކަނޑައަޅާފައިވާ ކަންކަން ކަމުގައިވާތީ، ގާނޫނުއަސާސީން ކަށަވަރުކޮށްދީފައިވާ ގާނޫނުގެ ރައްކާތެރިކަމާއި ގާނޫނުން ލިބިދޭ މަންފާތައް ހަމަހަމަކަމާއެކު ލިބުމުގެ ހައްގަށް ވެސް ހުރަސްއެޅޭ ކަމަށެވެ.
މީގެއިތުރުން ގާނޫނުއަސާސީން ކަށަވަރުކޮށްދީފައިވާ ހިޔާލުފާޅުކުރުމުގެ މިނިވަންކަމާއި، މައުލޫމާތު ހޯދުމާއި މައުލޫމާތު ދިނުމުގެ މިނިވަންކަމަށް، އެ ގާނޫނުގެ ސަބަބުން ހުރަސްއެޅި، މަސައްކަތްކުރުމުގެ ހައްގަށް ވެސް ގާނޫނުން ހުރަސްއެޅޭ ކަމަށް އެމްޖޭއޭއިން ބުންޏެވެ.
އެ ގާނޫނު ފާސްކުރުމުގައި ރައްޔިތުންގެ މަޖިލީހުން އަމަލުކޮށްފައިވަނީ އިޖުރާއަތުތަކާ ހިލާފަށް ކަމަށް ވެސް އެމްޖޭއޭއިން ކޯޓަށް ހުށަހެޅި މައްސަލައިގައި ބުންޏެވެ.
އެމްޖޭއޭއިން އެދުނު ވަގުތީ އަމުރުގައި އެދުނީ ހައި ކޯޓުން މައްސަލައިގައި ވަކި ގޮތެއް ކަނޑައަޅަންދެން އެ ގާނޫނުގެ ދަށުން އެއްވެސް ފަރާތަކާމެދު ފިޔަވަޅު ނޭޅުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް އަންގާ އަމުރުކޮށްދިނުމަށެވެ.
އެފަދަ ވަގުތީ އަމުރަކަށް އެދުނީ އިމެއް ނެތި ބާރުގެ ބޭނުންކޮށްގެން މީޑިއާތަކާ ދެކޮޅަށް އަދި ނޫސްވެރިންނާ ދެކޮޅަށް ފިޔަވަޅު އަޅައިފިނަމަ، އަދުލުވެރިކަމާއެކު ފިޔަވަޅުތައް އެޅުމުގެ ހައްގަށް ހުރަސްއެޅި، މީޑިއާތަކާއި ނޫސްވެރިންގެ މަސައްކަތް ހުއްޓާލަން ޖެހި، ނުވަތަ ޖޫރިމަނާފަދަ އަދަބުތަކާ ކުރިމަތިލާން ޖެހިދާނެތީ އެވެ.
