މިދިޔަ އަހަރު ފާސްކޮށް އަމަލުކުރަން ފެށި ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) ގެ ގާނޫނު ބޭނުންކުރަމުން އަންނަނީ ނޫސްވެރިކަމުގެ މިނިވަންކަމަށް ހުރަސް އެޅުމަށް ކަމަށް އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ބުނެފި އެވެ.
އަދަދު ނޫހުން ގެނެސްދޭ ސިޔާސީ ކާޓޫން ސެގްމަންޓް ހުއްޓާލަން އެ ކޮމިޝަނުން ވަނީ އަންގާފަ އެވެ. މައްސަލަ ބެލުމުގެ މަރުހަލާގެ ބޭނުމަށްޓަކައި މައްސަލަ ބަލައި ނިމެންދެން ޖެނުއަރީ 22، ގައި މި ނޫހުން ޝާއިއުކުރި ސިޔާސީ ކާޓޫން ވަގުތީ ގޮތުން ރިމޫވްކޮށް، ސިޔާސީ ކާޓޫން ސެގަމްނޓް މެދުކަނޑާލަން ތަކުރާރުކޮށް ވަނީ އަންގާފަ އެވެ.
އެ އެންގުން ކުށްވެރިކޮށް އައިއެފްޖޭއިން ވަނީ ކޮންޓްރޯލް ކޮމިޝަނުގެ ގާނޫނު އުވާލުމަށް ގޮވާލައިފަ އެވެ. އެ ގާނޫނު ބޭނުންކޮށްގެން ސައްހަ ނޫސްވެރިކަމާއި އެޑިޓޯރިއަލް ކޮންޓެންޓް ސެންސަރުކުރުމުންދާ ކަމަށާއި، މިނިވަން ނޫސްވެރިންނަށް އަމާޒުކޮށް ހިންގާ އަނިޔާވެރިކަމާއި، ބިރު ދެއްކުމަށް ވެސް ގާނޫނުން ހިތްވަރުދޭ ކަމަށް އައިއެފްޖޭއިން ބުނެފައިވެ އެވެ.
"މިއީ ހަމަ އައިއެފްޖޭ އެންމެ ބިރުގަތް ކަންތައްތައް. މީޑިއާގެ އާ ގާނޫނު މި ބޭނުންކުރަނީ ނޫސްވެރިކަމުގެ މިނިވަންކަން ނައްތާލުމަށް. މަލާމާތާއި ފާޑުކިޔުން ސެންސަރު ކުރުމަކީ، ހުރިހާ އިދިކޮޅު އަޑުތަކެއް ކަނޑުވާލުމަށް އެޅޭ ނުރައްކާތެރި ފިޔަވަޅެއް،" އައިއެފްޖޭއިން ބުނެފައިވެ އެވެ.
އޭގެ އިތުރުން މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) ގެ ރައީސް އަހުމަދު ނާއިފަށް މަރުގެ އިންޒާރު ދިން މައްސަލަ ބެލުމަށް ވެސް ވަނީ ގޮވާލާފަ އެވެ.
އެ ކޮމިޝަނުން ބުނީ އަދަދުގެ ސިޔާސީ ކާޓޫނުގެ މައްސަލަ ބަލަމުންދަނީ މޯލްޑިވްސް ބްރޯޑްކާސްޓިން ރެގިއުލޭޝަންގެ ގާނޫނުގައި ހިމެނޭ މައްސަލަ ބެލުމުގެ ބާރުގައި ވަކި ކަންކަމާ ގުޅޭގޮތުން ހާއްސަ މައުލޫމާތެއް ދެވިދާނެ ކަމަށް ކޮމިޝަނަށް ފެންނަ ފަރާތްތަކުން، އެ މައުލޫމާތެއް ކޮމިޝަނަށް ދިނުމަށް އެންގިދާނެ ކަމަށް ބަޔާންކޮށްފައިވާތީ ކަމަށެވެ.
އަދަދު ނޫހުގެ ސިޔާސީ ކާޓޫނާ މެދު ގޮތެއް ނިމިގެންދާނީ، މައްސަލައާ ގުޅުންހުރި އެންމެހައި ފަރާތްތަކުން ހުށަހަޅާފައިވާ ލިޔެކިޔުންތަކާއި މައުލޫމާތުތަކުގެ މައްޗަށް ރިޔާޔަތްކޮށް ކަމަށް ކޮމިޝަނުން ބުންޏެވެ.
ނަމަވެސް އަދަދު އިން ގެނެސްދިން ސިޔާސީ ކާޓޫނުގެ ކޮންޓެންޓު އިސްލާމް ދީނުގެ އަސްލަކާ ހިލާފު ކަމަށް 'ތުހުމަތު ކުރެވި' އެ ގޮތަށް ނިންމި ގާނޫނީ ސަބަބުތައް ސާފުކޮށްދޭން އަދަދު ނޫހުން އެދިފައިވެ އެވެ. އެ ސަބަބުތައް މިހާތަނަށް އެ ކޮމިޝަނަށް ސާފުކޮށްދެވިފައި ނުވެ އެވެ.
މިއީ އަދަދު ނޫހުގައި ޝާއިއުކުރި ކޮންޓެންޓެއް ނެގުމަށް މީޑިއާ ނެތިކޮށްލާ ގާނޫނުގެ ދަށުން ކޮންޓްރޯލް ކޮމިޝަނުން އެންގި ފުރަތަމަ ފަހަރެވެ. އޭގެއިތުރުން މިއީ އާންމުން ކޮންޓެންޓެއް ދައުރު ނުކުރުމަށް ކޮމިޝަނުން އެންގި ވެސް ފުރަތަމަ ފަހަރެވެ.
