ހުޅުމާލެ ފޭސް 2 ގައި ދިރިއުޅޭ ރައްޔިތުންނަށް ފަސޭހަކަމާއެކު އެންޒީގެ އުފެއްދުންތަކާއި ތާޒާ މަސް ފޯރުކޮށްދިނުމުގެ މަގުސަދުގައި، އެންސިސް ފިޝަރީޒްގެ "އެންޒީ" ބްރޭންޑުގެ އާ ފިހާރައެއް ރޭ ރަސްމީކޮށް ހުޅުވައިފިއެވެ.
ހުޅުމާލެ ފޭސް 2 ގެ ވިނަރެސް 5 ގެ ގްރައުންޑް ފްލޯގައި ހުޅުވި މި ފިހާރަ އިފުތިތާހު ކޮށްދެއްވީ ކުރީގެ މިނިސްޓަރު، މި ސަރުކާރުގައި އެޗްޑީސީގެ ޗެއާމަނަކަށް ހުންނެވި އަހުމަދު ޒުހޫރު އެވެ.
ގިނަ އަދަދެއްގެ މީހުން ބައިވެރިވި މި ރަސްމިއްޔާތުގައި ޒުހޫރު ވިދާޅުވީ، އެންޒީގެ އިސްވެރިން ރައްޔިތުންނަށް ހިދުމަތް ދިނުމުގައި ކުރާ މަސައްކަތަކީ އަބަދުވެސް ބަލައިގަންނާނެ ކަމެއް ކަމަށާއި، ހުޅުވި އާ ފިހާރައިގެ ސަބަބުން ފޭސް 2 ގެ ރައްޔިތުންނަށް ވަރަށް ބޮޑު ލުއިފަސޭހަކަމެއް ލިބިގެންދާނެ ކަމަށެވެ.
އެންސިސްގެ ރިހާރު
މިއީ ވޭތުވެދިޔަ 13 އަހަރުގެ ތެރޭގައި ހުޅުވުނު އެންޒީގެ 4 ވަނަ ފިހާރައެވެ. މި ރަސްމިއްޔާތުގައި އެންސިސް ފިޝަރީޒްގެ މެނޭޖިން ޑިރެކްޓަރު މުހައްމަދު ވަސީމް އިސްމާއީލް ވިދާޅުވީ، މި ފިހާރައިން އެންޒީގެ އަމިއްލަ އުފެއްދުންތަކުގެ އިތުރުން ކާބޯތަކެތީގެ އެހެނިހެން ސާމާނުވެސް ލިބެން ހުންނާނެ ކަމަށެވެ.
މި ފިހާރަ ހުޅުވިފައި ހުންނާނީ ކޮންމެ ދުވަހަކުވެސް ހެނދުނު 06:30 އިން ރޭގަނޑު 22:30 އަށެވެ. ނަމަވެސް ހުކުރު ދުވަސްތަކުގައި ފިހާރަ ބަންދުކުރާނީ ހަވީރު 17:00 ގައެވެ.
