ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ޔުނައިޓެޑް ވިކްޓަރީ (ޔޫވީ)، 5-1 އިން ބަލިކޮށް އޮޑި ސްޕޯޓްސް ކްލަބުން ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާ ދެމެދުގައިވާ ފަރަގު ކުޑަކޮށްފި އެވެ.
ލީގުގެ އެއް ވަނައިގައި އޮތް މާޒިޔާ އިން މި ހަފްތާގައި ކުޅުނު މެޗުން ޓީސީ ސްޕޯޓްސް ކްލަބާ އެއްވަރުވުމުގެ ފައިދާ އޮޑިން މި ވަނީ ނަގައިފަ އެވެ. މާޒިޔާގެ ލީޑު މިހާރު ވަނީ ތިން ޕޮއިންޓަށް ކުޑަވެފަ އެވެ. އެއް ވަނައިގައި އޮތް މާޒިޔާ އަށް 11 މެޗުން 31 ޕޮއިންޓް ލިބިފައިވާއިރު، އޮޑިން މި ވަނީ 11 މެޗުން 28 ޕޮއިންޓް ހޯދައިފަ އެވެ.
ވިއްސާރައިގެ ތެރޭގައި ކުޅެން ޖެހުނު މިއަދުގެ މެޗުގައި އޮޑިން ވަނީ 26 ވަނަ މިނިޓްގައި ލީޑުނަަގައިފަ އެވެ. މިއީ، އޮޑީގެ އަބްދުﷲ ލޫތު އިބްރާހިމް (ސާނޭ) ދިން ބޯޅައަކަށް އަަރައި މުޒްދާން ހަސަން ފޮނުވާލި ޝޮޓް، ޔުނައިޓެޑް ވިކްޓަރީގެ ކީޕަރު، މުސްތަފާ އަލީ މަތަކުރިއިރު، ރީބައުންސް އައިސް އެ ޓީމުގެ މުހައްމަދު ސަމްހާން ފައިގައި ޖެހިފައި ބައިކޮޅަށް ވަން ގޯލެކެެވެ.
މެޗުގެ 34 ވަނަ މިނިޓްގައި އޮޑިން ލީޑުފުޅާކުރީ، ލިތުއޭނިއާގެ ފޯވާޑް ކަރޮލިސް ލަައުކްޒެމިސް ޖެހި ޕެނަލްޓީންނެވެ. މިއީ، ޔުނައިޓެޑް ވިކްޓަރީގެ ކީޕަރު މުސްތަފާ އަލީ، އެ ޓީމުގެ އޭރިއާތެރެއިން އޮޑީގެ ލޫތަށް ކުރި ފައުލަކަށް ދިން ޕެނަލްޓީއެކެވެ.
ދެ ވަަނަ ހާފުގެ ފުރަތަމަ 15 ވަރަކަށް މިނިޓް ތެރޭ އޮޑިން ވަނީ ތިން ގޯލު ޖަހައިފަ އެވެ. އެ ގޮތުން، މި ހާފުގެ ކުޅުން ފެށިގެން ތިން މިނިޓް ތެރޭ މުޒްދާން ހުސްކޮށްލާފައި ނަގައިދިން ބޯޅަ ކަރޮލިސް ވަނީ ގޯލަށް ވައްދާލައިފަ އެވެ. މެޗުގެ 56 ވަނަ މިނިޓްގައި އޮޑީގެ އަހުޒަމް ރަޝީދު (އަހު) ހުސްކޮށްލާފައި ދިން ބޯޅައަކުން، މުޒްދާން ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެވެ. އަދި، އޭގެ ހަތަރު މިނިޓް ފަހުން، އޮޑީގެ ފުލްބެކް، އަހުމަދު އައިހަމް (އައިހު)، ޔުނައިޓެޑް ވިކްޓަރީގެ ދެ ކުޅުންތެރިން ކައިރިން ނައްޓާފައި ޖެހި ބޯޅަ ގޯލަށް ވަނީ އެ ޓީމުގެ ކުޅުންތެރިއެއް ފައިގައި ޖެހިފަ އެެވެ.
އޭގެ ފަހުން، ޔުނައިޓެޑް ވިކްޓަރީގެ ކީޕަރު މުސްތަފާ އަލީ އަށް އަނިޔާވެގެން ދެ ވަނަ ކީޕަރު އަލީ ނާޖިހު ވަނީ ކުޅެން ނުކުމެފަ އެވެ.
ޔުނައިޓެޑް ވިކްޓަރީން މެޗުގައި ޖެހި ހަމައެކަނި ގޯލު 73 ވަނަ މިނިޓްގައި ކާމިޔާބުުރީ މިސްރުގެ ފޯވާޑް، މުސްތަފާ އަލީ އަލް ޝާޒްލީ އެވެ. އޭނާ މި ލަނޑު ޖެހީ އެ ޓީމުގެ މުހައްމަދު ސާމިރު ނަގައިދިން ހުރަހަކުން ބޮލުންނެވެ. އޭގެ ފަހުން، ސާމިރު ޖެހި ބޯޅައެއް ވަނީ ދަނޑިއަށް އަމާޒުވެފަ އެވެ.
މި މެޗުން ބަލިވެ، ކުޅުނު 11 މެޗުން ލިބުނު ހަތް ޕޮއިންޓާ އެކު، ޔުނައިޓެޑް ވިކްޓަރީ އޮތީ ލީގުގެ އަށް ވަނައިގަ އެވެ.
