ޕެރިސް (ނޮވެމްބަރު 30) - ފްރެންޗް ލީގުގައި ރޭ މޮނާކޯ އަތުން 1-0 އިން ޕީއެސްޖީ ބަލިވި މެޗަކީ މި ސީޒަނުގައި އެ ޓީމުގެ ފަރާތުން އެންމެ ދަށް ކުޅުމެއް ފެނިގެންދިޔަ މެޗު ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފި އެވެ.
ލިވަޕޫލްގެ ކުރީގެ ފޯވާޑް، ޓަކޫމީ މިނަމީނޯ، 68 ވަނަ މިނިޓްގައި ޖެހި ގޯލާ އެކު، މޮނާކޯ އިން ޕީއެސްޖީ ބަލިކުރިއިރު، އެ ޓީމުން މި މެޗު ނިންމާލީ ކުޅުންތެރިއަކު މަދުކޮށެވެ. މޮނާކޯގެ ކެޕްޓަން، ކުރިން ޕީއެސްޖީ އަށް ކުޅުނު ފުލްބެކް، ތިލޯ ކެރާ އަށް ވަނީ މެޗުގެ 80 ވަނަ މިނިޓްގައި ރަތް ކާޑެއް ދައްކައިފަ އެވެ.
މަނާބޭހުގެ މައްސަލައެއްގައި، އަހަރަކަށް ވުރެން ގިނަ ދުވަހު ކުޅުމާ ދުރުގައި ހުރި، މޮނާކޯ އަށް ކުޅޭ ފްރާންސްގެ މިޑްފީލްޑަރު، ޕައުލް ޕޮގްބާ ވަނީ މި މެޗުގެ ދެ ވަނަ ހާފުގައި ކުޅެން އަރުވައިފަ އެވެ.
މި މެޗުން ބަލިވުމުން ލީގުގެ އެއް ވަނައިގައި ޕީއެސްޖީގެ ލީޑު ވަނީ އެއް ޕޮއިންޓަށް ކުޑަވެފަ އެވެ. ޕީއެސްޖީ އަށް 14 މެޗުން 30 ޕޮއިންޓް ލިބިފައިވާއިރު، ދެ ވަނައިގައި އޮތް މާސޭ އިން ވަނީ 14 މެޗުން 29 ޕޮއިންޓް ހޯދައިފަ އެވެ.
ރޭގެ މެޗަށް ފަހު އެންރީކޭ ބުނީ، ޓީމުގެ ފެންވަރު ރަނގަޅު ކުރަން ކުރާ މަސައްކަތުގައި ދެމެހެއްޓެނިވި ގޮތެއްގައި، މޮޅަށް ކުޅެ ނަތީޖާ ނެރެން ކުރާ ކަންކަމަށް އޮތް އެންމެ ބޮޑު ހުރަހަކީ އަމިއްލަ އަށް އަތުން ހެެދޭ އިންޑިވިޖުއަލް ގޯސްތައް ކަމަށެވެ. މޮނާކޯއާ ދެކޮޅަށް ކުޅުނު މެޗުގައި ޕީއެސްޖީގެ ފަރާތުން އަމިއްލަ އަށް ގިނަ ގޯސްތަަކެއް ހެދުނު ކަމަށް އެންރީކޭ ވަނީ ބުނެފަ އެވެ.
"އަހަރެމެން ގިނައިން ހެދީ ގޯސް. މިއީ އަހަރެމެން މި ސީޒަނުގައި ކުޅުނު އެންމެ ދަށް މެޗު. ކަންކަން ރަނގަޅުކުރާނަމަ، އަމިއްލަ އަށް އެ ހަދާ ގޯސްތައް މަދުކުރަންޖެހޭ،" އެންރީކޭ ބުންޏެވެ.
މި ސީޒަނުގައި ޕީއެސްޖީ ވަނީ ޖުމްލަ އެކު، ހުރިހާ މުބާރާތެއްގައި ތިން މެޗުން ބަލިވެފަ އެވެ. އެއީ، ފްރެންޗް ލީގުގައި މާސޭ އާއި މޮނާކޯ އަތުންނާއި ޗެމްޕިއަންސް ލީގުގައި ބަޔާން މިއުނިކް އަތުންނެވެ.
