ސަންޓޯސް، ބްރެޒިލް (ނޮވެމްބަރު 29) - ވާތު ކަކުލުގެ މެނިސްކަސް އަށް އަނިޔާގެ މައްސަލަައެއް ދިމާވެ، މި އަހަރުގެ ބާކީ ބައިގައި ނުކުޅެވޭނެ ކަމަށް ބެލެވުނު ނޭމާ، އަނިޔާގައި ހުރެ، ކުޅެން އަރައި، ސަންޓޯސް 3-0 އިން ސްޕޯޓް އަތުން މޮޅުކޮށްދޭން އެހީތެރިވެދީފި އެވެ.
މި މަހު 19 ވަނަ ދުވަހު ބްރެޒިލްގެ ލީގުގައި މިރާސޯލްއާ ދެކޮޅަށް ކުޅުނު މެޗުގެ ހަތަރު ވަނަ މިނިޓްގައި ނޭމާ ލަނޑެއް ޖެހިއިރު، މިއީ، ތިން މަސް ދުވަހުގެ ތެރޭގައި އޭނާ ޖެހި ފުރަތަމަ ގޯލެވެ. އެ މެޗުގެ 30 ވަނަ މިނިޓްގައި މިރާސޯލްގެ ޑިފެންޑަރު، ޖެއްމެސް ކައިރިން ނައްޓާފައި ދާން އުޅުމުގެ ތެރޭގައި ވެއްޓިގެން، އަނިޔާވެ ދަނޑުމަތީގައި ފަރުވާ ދިނެވެ. ނޭމާ ވަނީ ފަރުވާ ހޯދައި އެ މެޗު އެއްކޮށް ކުޅެފަ އެވެ. އެކަމަކު، ސަަންޓޯސް އަށް ޖެހިގެން އައި މެޗުގައި، މިދިޔަ ހަފްތާގެ ހޯމަ ދުވަހު، އިންޓަނަސިއޮނާލްއާ ދެކޮޅަށް ކުޅޭ މެޗަށް ނެގި ސްކޮޑުގައި ނޭމާ ނެތެެވެ. ރިޕޯޓްތަކުން ދެއްކީ، ނޭމާގެ ކަކުލަށް އަނިޔާވެ، މި އަހަރުގެ ބާކީބައިގައި ކުޅުމާ ދުރުުގައި ހުންނަން ޖެހޭނެ ކަމަށެވެ.
އެހެން ނަމަވެސް، ސަންޓޯސް، ބްރެޒިލް ލީގުގެ ރެލިގޭޝަނުގައި އޮތްއިރު، ރޭ ސްޕޯޓްއާ ދެކޮޅަށް ކުޅުނު މުހިންމު މެޗުގައި ނޭމާ ވަނީ ކުޅެފަ އެވެ. ރޭގެ މެޗުގައި ލަނޑެއް ޖަހައި، ލަނޑެއް ޖެހުމަށް ނޭމާ ވަނީ ފުރުސަތު ހޯދައިދީފަ އެވެ. މެޗުގެ 25 ވަނަ މިނިޓްގައި ނޭމާ ފުރަތަމަ ލަނޑު ޖެހިއިރު، ދެން ޖެހި ގޯލުތަކަކީ، ސްޕޯޓްގެ ލޫކަސް ކާލް އަތުން ބައިކޮޅަށް ވަން ގޯލަކާއި ޖޮއާއޯ ޝްމިޑްޓް ޖެހި ލަނޑެކެވެ.
މި މޮޅާ އެކު، 20 ޓީމު ވާދަކުރާ ލީގުގެ 15 ވަނަ އަށް ސަންޓޯސް ވަނީ ޖެހިލައިފަ އެވެ. ފުލަށް ދާ ހަތަރު ޓީމެއް ރެލިގޭޝަނުގައި އޮންނަން ޖެހޭއިރު، ރޭގެ މެޗަށް ނުކުތްއިރު، ސަންޓޯސް އޮތީ 17 ވަނައިގަ އެވެ.
