ކުޑަކުދިންނަށް ޖިންސީ ގޯނާ ކުރުމުގެ ބޮޑު ރިންގެއް ހިންގަމުންދިޔަ ޖެފްރީ އެޕްސްޓީން އާއި ދެކޮޅަށް އެމެރިކާގެ ތަހުގީގީ އިދާރާތަކުން ކުރި ތަހުގީގަށް ހޯދި ހުރިހާ ލިޔެކިޔުމެއް، ނުވަތަ "އެޕްސްޓީން ފައިލްސް" އާންމުކުރަން އެމެރިކާގެ ކޮންގްރެސް އިން ފާސްކޮށްފި އެވެ.
އެޕްސްޓީން ފައިލްސް ހާމަކުރަން ހައުސް އަދި ސެނެޓުގައި ނެގި ވޯޓުގައި އެމެރިކާގެ މައި ދެ ޕާޓީއަށް ނިސްބަތްވާ މެންބަރުން ވެސް އެ ބިލަށް ތާއީދުކުރި އެވެ. ވައިޓްހައުސް ގެ އޮފިޝަލުންނާއި ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި އެމެރިކާގެ ރައީސް ޑޮނާލްޑް ޓްރަމްޕް އެ ބިލު ވަރަށް އަވަހަށް ތަސްދީގުކުރައްވާނެ އެވެ.
ހުރިހާ ޑޮކިއުމެންޓެއް އާންމުކުރުމުގެ ކުރިން އެމެރިކާ ކޮންގްރެސްގެ ހައުސް އިންސައިޓް ކޮމިޓީން މިދިޔަ ހަފުތާ ވަނީ 20،000 ޑޮކިއުމެންޓެއް އާންމުކޮށްފައެވެ. އޭގެތެރެއިން ދިވެހިން އެންމެ ބޮޑަށް އަޅައިގަތީ އެޕްސްޓީން އާއެކު ރައީސް މުހައްމަދު މުއިއްޒުގެ އެޑްވައިޒަރު، ކުރީގެ ރައީސް މުހައްމަދު ވަހީދު ގާތް ގުޅުމެއް ބޭއްވިކަން ހާމަވި މެއިލްތަކެވެ.
އެޕްސްޓީން އާއި ދެކޮޅަށް އެއްކުރި ހުރިހާ ލިޔެކިޔުމެއް އާންމުކުރުމާއެކު ވަހީދު، އެޕްސްޓީން އާއެކު ބޭއްވި ގުޅުމާ ބެހޭ އިތުރު ލިޔެކިޔުންތައް ހާމަވުމުގެ ފުރުސަތު ބޮޑެވެ.
މީގެ ކުރިން ހާމަވި މެއިލްތަކުގެ ތެރެއިން އެޕްސްޓީން އަށް ފޮނުވި އެއް މެއިލްގައި ވަހީދު ވަނީ އދ. ގެ 67 ވަނަ އަހަރީ އާންމު ޖަލްސާގައި ބައިވެރިވުމަށް އެމަނިކުފާނުގެ ދެ ކަނބަލުން އެމެރިކާއަށް ކުރެއްވި ދަތުރުގެ ޝެޑިއުލް ހިއްސާކުރައްވާފަ އެވެ. މުޅި ދަތުރުގައި ރާވާފައި ހުރި ހުރިހާ ކަމެއް ހަ ސަފުހާގެ އެ ޝެޑިއުލްގައި ހިމަނާފައިވެ އެވެ.
ވަހީދު އާއި އަނބިކަނބަލުން އިލްހާމް ހުސެއިން އެމެރިކާއަށް ދަތުރުކުރެއްވީ 2012 ވަނަ އަހަރުގެ ސެޕްޓެމްބަރު 22، އިން 29، އަށެވެ. މި ދަތުރުގެ ޝެޑިއުލް އިން އެންމެ ފާހަގަވާ ކަމަކީ އެޕްސްޓީންއާއެކު ރާވާފައި އޮތް ކެއުމެވެ. ވަހީދު އެޕްސްޓީން އަށް ދަތުރުގެ ޝެޑިއުލް ހިއްސާކުރެއްވީ މިހެންވެ ކަމަށް ގަބޫލުކުރެވެ އެވެ.
ޝެޑިއުލްގައިވާ ގޮތުން އެޕްސްޓީން އާއެކު ވަހީދު ރޭގަނޑުގެ ކެއުން ނުވަތަ ޕްރައިވެޓް ޑިނާއެއް ޝެޑިއުލް ކުރެއްވި އެވެ. އެ އިވެންޓު އޮތީ ސެޕްޓެމްބަރު 22، ގެ ރޭ އެމެރިކާ ގަޑިން 8:00 އިން 10:30 އާއި ހަމައަށެވެ. ދެ ގަޑިއިރާއި ބައިގެ މި އިވެންޓު އޮތީ ކޮން ތަނެއްގައި ކަމެއް ޝެޑިއުލް އިން ސާފެއް ނުވެ އެވެ.
މީގެ އިތުރުން، ވަހީދު، އެޕްސްޓީންއާ ބައްދަލުކުރިކަން ކަށަވަރު ވަނީ ޖެނުއަރީ 18، 2013، ގައި ފޮނުވާފައިވާ އީމެއިލް އަކުންނެވެ. އެޕްސްޓީންގެ ގެއަށް ވަހީދު ވަޑައިގެންނެވި ކަމަށް އެ އީމެއިލްގައި ބުނެފައިވެ އެވެ.
އެޕްސްޓީންއާ ބައްދަލުކުރުމަށް އޭނާގެ ގެއަށް ވަހީދު ވަޑައިގެންނެވީ ޔޫއޭއީގެ ވިޔަފާރިވެރިއެއް ކަމަށްވާ ޑީޕީ ވޯލްޑް ކުންފުނީގެ ސީއީއޯ ސުލްތާން އަހުމަދު ބިން ސުލޭޔަމް އާއެކު ކަމަށް ވެސް އީމެއިލް ގައި ލިޔުއްވާފައިވެ އެވެ.
މީގެ އިތުރުން ވަހީދު ސަރުކާރު ހިންގުމުގައި މާލީ ލަފާ ހޯދުމަށާއި 2013 ގައި ރިޔާސީ އިންތިހާބަށް ކެމްޕޭނުގައި އެހީތެރިކަމަށް ވަހީދު ވަނީ އެޕްސްޓީންގެ ކައިރިން އެދިފަ އެވެ.
ކުޑަކުދިންނަށް ޖިންސީ ގޯނާކުރާ ކަމުގެ ތުހުމަތުގައި އެޕްސްޓީންއާ ދެކޮޅަށް ތަހުގީގު ފެށީ 2005 ވަނަ އަހަރު އެވެ. ޖޫން 2008 ގައި އޭނާގެ މައްޗަށް 18 މަސްދުވަހު ޖަލު ހުކުމެއް އިއްވިއިރު 13 މަސްދުވަހަށް ފަހު އޭނާ މިނިވަންވި އެވެ. އެހެންކަމުން ރާއްޖޭގެ ކުރީގެ ރައީސަކު އެޕްސްޓީން އާއެކު ބައްދަލުވުމެއް ބޭއްވިނަމަ އެ ބައްދަލުވުމެއް ބާއްވާފައިވަނީ އޭނާގެ މައްޗަށް ކުޑަކުއްޖަކަށް ހަށި ވިއްކުމަށް މަޖުބޫރު ކުރުވުމުގެ ކުށް ސާބިތުވެފައި ވަނިކޮށެވެ.
ޖުލައި 2019، ގައި ސެކްސް ޓްރެފިކިން ތުހުމަތުގައި އޭނާ އަލުން ހައްޔަރުކުރި އެވެ. އަދި، ޖެހިގެން އައި އޮގަސްޓު މަހުގެ 10 ވަނަ ދުވަހު ޖަލު ގޮޅީގައި ހުއްޓައި އޭނާ ކުއްލި ގޮތަކަށް މަރުވި އެވެ. އެއަށް ފަހު އޭނާގެ މައްޗަށް ކުރި ދައުވާތައް އަނބުރާ ގެންދިޔަ އެވެ.
އެޕްސްޓީން އާއި ގުޅުންހުރި ލިޔެކިޔުންތައް އާންމުކުރަން ނިންމީ އެ ގައުމުގެ ރައީސް ޑޮނަލްޑް ޓްރަމްޕް އާއި އެޕްސްޓީން އާއި އޮތް ގާތް ގުޅުމާމެދު ކުރެވޭ ތުހުމަތުތަކާއެކު ކުރިމަތިވަމުންދާ ޕްރެޝަރާއެކު އެވެ.
