އެފްރިކާގެ ޕްލޭއޮފުގައި ކުޅެނީ ނައިޖީރިއާ އާއި ކޮންގޯ

Nov 15, 2025, 1:39 AM
އެފްރިކާގެ ޕްލޭއޮފުގައި ކުޅެނީ ނައިޖީރިއާ އާއި ކޮންގޯ

ރަބަތު، މޮރޮކޯ (ނޮވެމްބަރު 15) - އަންނަ އަހަރު އެމެރިކާ އާއި ކެނަޑާ އަދި މެކްސިކޯގައި ބާއްވާ ފީފާ ވޯލްޑް ކަޕް ފުޓްބޯޅަ މުބާރާތަށް ކޮލިފައިވުމަށް ކުޅޭ އެފްރިކާ ބައްރުގެ ޕްލޭއޮފްގައި ނައިޖީރިއާ އާއި ކޮންގޯ އިން ބައްދަލުކުރަން ޖެހިއްޖެ އެވެ.

އެފްރިކާ ބައްރުން އިންޓަ ކޮންޓިނެންޝިއަލް ޕްލޭއޮފަށް ދާ ޓީމެއް ކަނޑައަޅަން ކުޅޭ އެފްރިކާގެ ޕްލޭއޮފް ބުރުގައި ވާދަކުރަނީ ކޮލިފައިން ހުރިހާ ގްރޫޕެއްގެ ތެރެއިން އެންމެ ނަތީޖާ ރަނގަޅު ހަތަރު ޓީމެވެ.

އެ ގޮތުން، ޕްލޭއޮފް ފުރަތަމަ ސެމީގައި ކުޅުނީ ނައިޖީރިއާ އާއި ގެބޮން އެވެ. އެ މެޗުން 4-1 އިން މޮޅުވީ ނައިޖީރިއާ އެވެ. ގެބޮންގެ މައުރޯ ލެމީނާ ލަނޑު ޖެހިއިރު، ނައިޖީރިއާ އިން ލަނޑު ޖެހީ ވިކްޓަ އޮސީމެން ދެ ގޯލުގެ އިތުރުން، ޖެރޯމް އެޑަމްސް އާއި ޗިޑޭރާ އެޖޫކޭ އެވެ. މި މެޗުގެ ކުރިން އޮތް ބައެއް ޕްރެކްޓިސްތައް ނައިޖީރިއާގެ ކުޅުންތެރިން ވަނީ ބޮއިކޮޓްކޮށްފަ އެވެ. އެއީ ފެޑެރޭޝަނުން ދޭން ޖެހޭ ފައިސާ ހަމަޖައްސައިދީފައިނުވާތީ އެވެ.

Advertisement

ޕްލޭއޮފް އަނެއް ސެމީ ފައިނަލުގައި ކޮންގޯ އިން ވަނީ އިތުރު ވަގުތުގެ ތެރޭގައި ޗަންސެލް އެމްބެމްބާ ޖެހި ގޯލުން 1-0 އިން ކެމަރޫން ކަޓުވާލައިފަ އެވެ. ކޮންގޯ އިން 1974 ވަނަ އަހަރުގެ ފަހުން ވޯލްޑް ކަޕެއްގައި ވާދަކުރުމުގެ އުންމީދު ދަމަހައްޓަމުން އަންނައިރު، މާދަމާ، އެފްރިކާގެ ޕްލޭއޮފް ފައިނަލުގައި އެ ޓީމާ ކުޅޭނީ ނައިޖީރިއާ އެވެ. އެ މެޗުން މޮޅުވާ ޓީމެއް އެކި ބައްރުތަކުން ޕްލޭއޮފުން އައި ޓީމުތަކާ ދެކޮޅަށް ކުޅޭނެ އެވެ.

ކޮމެންޓް

ފަހުގެ ޚަބަރު

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

އެފްއޭއެމްގެ އޮފިޝަލެއް ނެތް، ޓްރޮފީއާ ހަވާލުވީ ނޫސްވެރިއެއް!

ބަންގްލަދޭޝްގައި ބޭއްވި ސާފް ޗެމްޕިއަންޝިޕްގެ ފެއާ ޕްލޭ ޓްރޮފީ ރާއްޖެއަށް ލިބުނުއިރު، އެފްއޭއެމްގެ އޮފިޝަލަކު ނެތުމުން އެއާ ހަވާލުވީ ދިވެހި ނޫސްވެރިއެއް. އެފްއޭއެމް އިން ބުނި ގޮތުގައި ޓްރޮފީ ލިބޭކަން ސާފް އިން އެންގީ ވަރަށް ކުޑަ ވަގުތުކޮޅެއް އޮއްވާ ކަމަށާއި، ނޫސްވެރިއަކު ސްޓޭޖަށް އެރީ ސާފްގެ އޮފިޝަލުން އެދިގެން

އިންފަންޓީނޯގެ ޝަރުތު ހަމަވޭތޯ ގާނޫނީ ގޮތުން ބެލި

ފީފާގެ ރައީސްކަމަށް ހަތަރުވަނަ ދައުރަކަށް ކުރިމަތިލައްވާފައިވާ ޖިއާނީ އިންފަންޓީނޯގެ ޝަރުތު ހަމަވޭތޯ އިނގިރޭސި އެފްއޭއިން ގާނޫނީ ގޮތުން ބަލައިފި. ފީފާ ކައުންސިލުން ނިންމާފައިވަނީ އިންފަންޓީނޯގެ ފުރަތަމަ ދައުރަކީ ބާކީ އޮތް މުއްދަތެއް ފުރިހަމަކުރުން ކަމަށްވާތީ، އޭނާއަށް އިތުރު ދައުރަކަށް ކުރިމަތިލެވޭނެ ކަމަށް

އުމުރުން 38 އަހަރުގައި މަޓާ ފުޓްބޯޅަ ކުޅުން ހުއްޓާލައިފި

ސްޕެއިނާއެކު ވޯލްޑް ކަޕާއި ޔޫރޯ ކާމިޔާބުކޮށް، ޗެލްސީ އާއި މެންޗެސްޓާ ޔުނައިޓެޑް ފަދަ ބޮޑެތި ކްލަބްތަކަށް ކުޅުނު ހުއާން މަޓާ އުމުރުން 38 އަހަރުގައި ފުޓްބޯޅަ ކުޅުން ހުއްޓާލައިފިއެވެ. ކުޅުމުން ރިޓަޔާކުރި ނަމަވެސް، ކުރިއަށް އޮތް ތަނުގައިވެސް ފުޓްބޯޅައިގެ ދާއިރާއިން ފެންނާނެ ކަމަށް އޭނާ ވަނީ ބުނެފައެވެ.

ޕާކިސްތާން ފުޓްބޯޅަ ކުރިއަރާނީ ޕްރޮފެޝަނަލް ލީގެއް އޮވެގެން

ޕާކިސްތާން ފުޓްބޯޅަ ކުރިއެރުވުމަށްޓަކައި އެ ގައުމުގައި ވަރުގަދަ ޕްރޮފެޝަނަލް ލީގެއް އޮތުން މުހިންމު ކަމަށް ގައުމީ ކޯޗު ނޮލްބާޓޯ ސޮލާނޯ ބުނެފި. އޭނާ ފާހަގަކުރި ގޮތުގައި ހަމައެކަނި ބޭރުގައި ކުޅޭ ކުޅުންތެރިންނަށް ބަރޯސާވުމުގެ ބަދަލުގައި، ލޯކަލް ކުޅުންތެރިން ކުރިއެރުވޭނީ ގަވާއިދުން ކުޅޭނެ ލީގެއް އޮވެގެން

Newsletter

Get the latest news delivered straight to your inbox