ގައުމީ އެއާލައިން މޯލްޑިވިއަން ހިންގާ ކުންފުނި އައިލެންޑް އޭވިއޭޝަން އިން ހުޅުމާލޭގެ ބިމެއް 49 މިލިއަން ރުފިޔާއަށް ގަނެފި އެވެ.
އައިލެންޑް އޭވިއޭޝަނުން ގަތީ ސެންޓްރަލް ޕާކާ މާ ދުރު ނޫން ހިސާބަކުން ލޮޓު ނަންބަރު 11725 ބިމެވެ. އެ ބިމުގެ ޖުމްލަ އަގަކީ 49،428،482 ރުފިޔާ އެވެ. އެއީ 12،481 އަކަފޫޓުގެ ބިމެކެވެ. ބެލެވޭ ގޮތުގައި މިއީ އެ ކުންފުނިން ހުޅުމާލެއިން ގަތް ފުރަތަމަ ބިމެވެ.
ބިން ގަތުމުގެ މުއާމަލާތް ސިވިލް ކޯޓުން ވަނީ އިއްޔެ ނިންމައިފަ އެވެ.
އައިލެންޑް އޭވިއޭޝަނަކީ ގެއްލުމުގައި ހިންގާ ކުންފުންޏެވެ. މި އަހަރު އާންމު ކުރި އޮޑިޓު ރިޕޯޓަކުން ދައްކާ ގޮތުގައި މިދިޔަ އަހަރު 2.8 މިލިއަން ރުފިޔާގެ ގެއްލުމެއް އެ ކުންފުންޏަށްވި އެވެ. އަދި ކުންފުނީގެ ލަޔަބިލިޓީސް 1.6 ބިލިއަން ރުފިޔާއަށް އަރާ ކަމަށް އޮޑިޓުން ދެއްކި އެވެ.
އައިލެންޑް އޭވިއޭޝަނުގެ އެސެޓަށްވުރެ އެތައް ގުނައެއް ލަޔަބިލިޓީސް ބޮޑުކަމުން، ކުންފުނި ހިންގިދާނެ ކަމަށް ސުވާލު އުފެދޭ ކަމަށް އެ އޮޑިޓުގައި ބުނެފައިވެ އެވެ.
އޭގެ އިތުރުން، އިއުލާނެއް ކުރުމެއް ނެތި އައިލެންޑް އޭވިއޭޝަނުން މަތިންދާބޯޓެއް ވިއްކާލި މައްސަލައެއް ދާދިފަހުން ވަނީ ފެންމަތިވެފަ އެވެ. އިއުލާނު ނުކޮށް ވިއްކާލީ DHC-8 MSN 591 ނަންބަރު މަތިންދާބޯޓެވެ. އެ ބޯޓު ވިއްކާލީ 3.7 މިލިއަން ޑޮލަރަށެވެ.
އެ މައްސަލަ އެމްއެމްއޭގެ ފައިނޭންޝަލް އިންވެސްޓިގޭޝަން ޔުނިޓުން ވަނީ ބަލައިފަ އެވެ. އަދި އެންޓި ކޮރަޕްޝަން ކޮމިޝަނުން ވެސް މިހާރު އެ މައްސަލަ ދަނީ ބަލަމުންނެވެ.
