ކްލަބް މޯލްޑިވްސް ކަޕްގެ އެންމެ ފަހުން ދެ އަަހަރުގެ ޗެމްޕިއަން، ކްލަބް ވެމްކޯ އިން މުބާރާތުގެ އެންމެ ކާމިޔާބު ޓީމު، އެސްޓީއޯ އަތުން ބަލިވެ ކެޓިއިރު، ކްލަބް އެމްޓީސީސީ، އެމްޕީއެލް އަދި ޓީމު ފެނަކަ ކުއާޓާ ފައިނަލުން ޖާގަ ހޯދައިފި އެެވެ.
އެސްޓީއޯ އާއި ވެމްކޯ ކުުޅުނު މެޗު 2-2 އިން އެއްވަރުވެ، ޕެނަލްޓީގައި އެސްޓީއޯ މޮޅުވީ 4-3 އިންނެވެ. ދިވެހި ސިފައިންގެ ކްލަބް އަތުން އެމްޓީސީސީން 5-2 އިން މޮޅުވިއިރު، ޓީމު އެފްއެސްއެމްގެ މައްޗަށް އެމްޕީއެލް ކުރިހޯދީ 5-3 އިންނެވެ. އަދި، ޕޮލިހާއި ފެނަކައިގެ މެޗު 6-6 އިން އެއްވަރުވިއިރު، ޕެނަލްޓީގައި ފެނަކަ މޮޅުވީ 4-2 އިންނެވެ.
ވެމްކޯ އިން ރޭގެ މެޗުގެ ފުރަތަމަ ހާފުގައި ލީޑުނެގީ، މުހައްމަދު ފާސިރު (ފާއްޓޭ) ޖެހި ގޯލުންނެވެ. ދެ ވަނަ ހާފުގައި ކުޅެން އަރައި، އެސްޓީއޯގެ ކެޕްޓަން، ހުޒައިފަތު ރަޝީދު (ހުޒޭ) ޖެހި މޮޅު ގޯލުން އެސްޓީއޯ އިން އެއްވަރުކުރި އެވެ. އެކަމަކު، ހިލޭޖެހުމެއްގައި، ވެމްކޯގެ އިރާން ކުޅުންތެރިޔާ، އަލީރެޒާ ޝެއިހްލާރު ވަނީ ގޯލެއް ޖަހައި، އަލުން ވެމްކޯ އަށް ލީޑުނަގައިދީފަ އެވެ. އަދި، އެސްޓީއޯ އިން ނަތީޖާ ހަމަހަމަކުރަން ޕަވަޕްލޭގެ ބޭނުންކޮށް ކުރި އެޓޭކުތަކުގެ ފަައިދާނަގައި، ހުޒޭ ވަނީ އިތުރު ގޯލެއް ޖަަހައި މެޗުގެ ނަތީޖާ އަނެއްކާ ވެސް ހަމަހަމަ ކޮށްދީފަ އެވެ.
ނަތީޖާ ނެރެން ޕެނަލްޓީ ޖަހަން ޖެހުނުއިރު، ވެމްކޯގެ ހަ ޕެނަލްޓީގެ ތެެރެއިން ކާމިޔާބުވީ ތިން ޕެނަލްޓީ އެވެ. އެއީ، ފާއްޓޭ، އަލީ ޝިޔާހު (ޝިޔަޅޭ) އަދި އަބްދުﷲ ޖުނައިދު (ޖެންނޭ) ޖެހި ޕެނަލްޓީތަކެވެ. އެ ޓީމަށް ނާކާމިޔާބުވީ، އިރާނުގެ ދެ ކުޅުންތެރިން ކަމަށްވާ އަލީ ރެޒާ އާއި އިހްސާންގެ އިތުރުން، އިސްމާއިލް ވަޖީހު (ވައްޖެ)ގެ ޕެނަލްޓީތަކެވެ. އެސްޓީއޯ އިން އަލީ ހައިޝަމް (ޗުމްޕު) އާއި އަލީ ހުމޭޒްގެ ޕެނަލްޓީ ނާކާމިޔާބުވިއިރު، އިސްމާއިލް އީސާ (މެސީ)، އަހުމަދު ރާހިލް ރަޝީދު (ރާއްކޮ)، އިޔާން އަހުމަދު ރަޝީދު އަދި އަލީ އިފާޒް ވަނީ ޕެނަލްޓީ ވައްދާލައިފަ އެވެ.
އެމްޓީސީސީން މުހައްމަދު ޝާއިން އާއި މުހައްމަދު އިޝާމްގެ ގޯލުތަކުން ލީޑުނެގި މެޗުގައި ސިފައިން ވަނީ ފަހަތުން އަރައި އެއްވަރުކޮށްފަ އެވެ. ސިފައިންގެ ލަނޑުތައް ޖެހީ، އިރާނުގެ ސޮރޯޝްގެ އިތުރުން އިޔާސް އަލީ އެވެ. އޭގެ ފަހުން، އެމްޓީސީސީން ތިން ގޯލު ޖަހައި މެޗުން މޮޅުވި އެވެ. މި ލަނޑުތައް ޖެހީ، އިޝާމް، ޖުމައިލް ޖަމީލް އަދި އަޔާޒް އަހުމަދު (އަޔާ) އެވެ.
އެމްޕީއެލްގެ މުހައްމަދު ސާދު ނިޒާރު ރޭގެ މެޗުގައި ހެޓްރިކެއް ހެދިއިރު، އަނެއް ދެ ލަނޑު ޖެހީ މުހައްމަދު ޒީދާން ޒުހުރީ އާއި އިރާނުގެ ކުޅުންތެރިޔާ، ސަމަން ދަޝަން އެވެ. އެފްއެސްއެމްގެ ލަނޑުތައް ޖެހީ، މުހައްމަދު ނާފިއު އަހުމަދު، އަބްދުﷲ ލޫތު އިބްރާހިމް (ސާނޭ) އަދި މުހައްމަދު މާކިން އެވެ.
ފެނަކަ އަށް ރޭގެ މެޗުގައި ލަނޑުތައް ޖަހައިދިނީ އައްޒާމް އަބްދުﷲ (އެޑޫ) ދެ ގޯލާއި ހާޒިމް ފައުޒީ (ހަތީ)، އީމާން ނަޒީރު، އަހުމަދު އަޖުވަދު (އަޖޭ) އަދި ހަަސަން އަޒޫމު އަލީ އެވެ. ޕޮލިހުގެ ލަނޑުތައް ޖެހީ އަޖުލާން އަބްދުލް ހަންނާން ދެ ގޯލާއި ހުސެއިން އަފްހާން، އައިމަން ނަޒީރު، މުހައްމަދު އަހުސަމް އަދި އަބާން މުހައްމަދު އެވެ.
ނަތީޖާ ނެރެން ޕެނަލްޓީ ޖަހަން ޖެހުނު މި މެޗުގައި، ޕޮލިހުގެ ހަތަރު ޕެނަލްޓީގެ ތެރެއިން ކާމިޔާބުވީ އަޖުލާން އާއި އަައިމަންގެ ޕެނަލްޓީ އެވެ. އަފްހާން އާއި އަބާން އަށް ޕެނަލްޓީ ކާމިޔާބެއްނުވި އެވެ. އަނެއްކޮޅުން، ފެނަކަ އިން ހަތަރު ޕެނަލްޓީ ވެސް ވައްދާލި އެވެ. އެ ޓީމުގެ ޕެނަލްޓީތައް ޖެހީ، އެޑޫ، އަހުމަދު ހަލީމް (އައްމަޑޭ)، މުހައްމަދު އިންޝާލް އަދި އީމާން ނަޒީރު އެވެ.
މުބާރާތުގެ ކުއާޓާ ފައިނަލް މެޗުތައް އޮންނާނީ ހުކުރު ދުވަހުގެރޭގަ އެވެ. ކުއާާޓާގެ މެޗުތަކަށް ބަލާއިރު، މޯލްޑިވިއަން ކުޅޭނީ ސްޓެލްކޯއާ އެވެ. އެމްއޭސީއެލް އިން އާރްއާރްސީއާ ކުޅޭއިރު، އެސްޓީއޯ އިން ބައްދަލުކުރާނީ އެމްޓީސީސީއާ އެވެ. އަދި، ފެނަކަ އިން ނުުކުންނާނީ އެމްޕީއެލްއާ ދެކޮޅަށެވެ.
