ސްވިފްޓް އިންޖިނިއަރިންއަށް ބަދަލުގެ ގޮތުގައި ކުރީ ސަރުކާރުން ޕްރޮޖެކްޓުތަކެއް ދޭން ނިންމި މައްސަލައާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ކުރަމުން އަންނަ ތަހުގީގަކީ ވަކި މީހަކު އަންގައިގެން މަޖުބޫރުން ކުރަމުން އަންނަ ތަހުގީގެއް ކަމަށް އިދިކޮޅު އެންމެ ބޮޑު ޕާޓީ، އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
އޭސީސީން ހިންގާ ތަހުގީގަށް ބަޔާން ދިނުމަށް މިއަދު ހެނދުނު 09:30 އަށް އޭނާގެ ވަކީލާއެކު ފައްޔާޒު އޭސީސީއަށް ހާޒިރުވި އެވެ. އެ ވަގުތު އެމްޑީޕީއަށް ނިސްބަތްވާ މަޖިލިސް މެންބަރުންނާއީ، އެ ޕާޓީގެ ގައުމީ މަޖިލީހުގެ މެންބަރުންނާއި އެކްޓިވިސްޓުން ދިޔައީ އެއީ ސިޔާސީ ތަހުގީގެއް ކަމަށް ބުނެ އޭސީސީ އޮފީސް ކުރިމަތީގައި އަޑުއުފުލަމުންނެވެ.
"އެއްވެސް އަސާސެއް ނެތް ތާކުންތާކު ނުޖެހޭ އެއްޗެހިތަކެއް ނަގައިގެން، އެ ބޭފުޅުންނަށް ތަހުގީގަށް ބޭނުންވާ ޑޮކިއުމެންޓު ވެސް ހަމައެއް ނުކުރެވޭ. އެނގޭ ވަކި ބޭފުޅަކު އަންގައިގެން އެ ބޭފުޅުންނަށް މަޖުބޫރުވެގެން ކުރާ ތަހުގީގެއްކަން ވެސް. ވާހަކަ ހުރި ގޮތުންނާއި އަމަލު ހުރި ގޮތުން އެނގޭ ލަދުންކަން ތިބީ ވެސް،" ބަޔާން ދިނުމަށް ފަހު ނުކުމެ ފައްޔާޒު މީޑިއާއަށް ވިދާޅުވި އެވެ.
މިއީ ސިޔާސީ ގޮތުން އެމްޑީޕީ ބިރުގަނެފާނެ ކަމަށް ބަލާ މައްސަލައެއް ކަމަށް ފައްޔާޒު ވިދާޅުވި އެވެ. އަދި މިހާރު ވެރިކަމުގައި ތިބި ބޭފުޅުން އިދިކޮޅުގައި ތިބީ ބިރުން ފިލާ ކަމަށާއި އެކަމުގެ ސަބަބުން އިދިކޮޅު ޕާޓީއެއްގެ ދައުރު ވެސް އަދާކުރީ އެމްޑީޕީން ކަމަށް ފައްޔާޒު ވިދާޅުވި އެވެ.
"އެހެން ވާނެ ކަމަށް އެ ބޭފުޅުން ހީކުރަނީ އަޅުގަނޑުމެންނާ ދޭތެރޭ. ބަލަ އަޅުގަނޑުމެން ކުޑަ ގޮޅީގައި ޖަލަށްލާފައި އޮތަސް ތި ބޭފުޅުން ތިއްބަވާނޭ މި ވެރިކަން ބަދަލުކުރަން. 17 ނޮވެމްބަރަށް ހުރިހާ ބޭފުޅުން މާލެ ވަޑައިގަންނަވާ،" ފައްޔާޒު ވިދާޅުވި އެވެ.
ސްވިފްޓަށް ބަދަލު ދިން މައްސަލައިގައި އޭސީސީން ފައްޔާޒަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރި ކަމަށް ތުހުމަތެވެ.
އެ ކުންފުންޏަކީ ވެރިކަން ކުރާ ޕީއެންސީއަށް ނިސަބަތްވާ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީގެ ކުންފުންޏެވެ. ސައުދުﷲ ވަނީ ބަދަލުގެ ގޮތުގައި ޕްރޮޖެކްޓުތައް ނުދީ، ކޯޓަށް ގޮސްގެން ބަދަލު ހޯދި ނަމަ ސްވިފްޓަށް މާ ބޮޑު ބަދަލެއް ދޭން ޖެހުނީސް ކަމަށް ވިދާޅުވެފަ އެވެ.
އޭސީސީން ފޮނުވި ޗިޓުގައި ވަނީ ފައްޔާޒު ހާޒިރުކުރަނީ އެ ކުންފުންޏަށް ބަދަލު ދޭން 2019 ވަނަ އަހަރު ނިންމި އަލްޓަނޭޓް ޑިސްޕިއުޓް ރިސޮލިއުޝަން ކޮމިޓީގެ މެންބަރެއްގެ ގޮތުގައި ފައްޔާޒު އިންނެވި ކަމަށެވެ. ޗިޓުގައި ބުނެފައިވެ އެވެ. އަދި މި ބަދަލުގެ ސަބަބުން ދައުލަތަށް ގެއްލުންވި ކަމަށް އޭސީސީން ތުހުމަތުކުރެ އެވެ.
ޗިޓު ލިބުމުން ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ދައުލަތަށް ގެއްލުން ލިބޭ ގޮތަށް އަމަލުކޮށްފައެއް ނޯންނާނެ ކަމަށެވެ. އަދި، އިންސާފުވެރި ތަހުގީގެއް އޭސީސީން ކުރާނެ އަދި ކުރެވޭނެ ކަމަށް މިއަދު ގަބޫލެއް ނުކުރާ ކަމަށް ލިޔުއްވާފައިވެ އެވެ.
