ބާސެލޯނާ (އޮކްޓޫބަރު 8) -އިޒްރޭލުން ފަލަސްތީނަށް އަރައި ދެމުން އަންނަ ގެއްލުންތައް ހުއްޓުވަން ކުރާ މަސައްކަތުގައި އެކި ގައުމުތަކުގެ އާންމުން އެ ގައުމެއްގެ ސަރުކާރަށް ޕްރެޝަރުކުރަންޖެހޭ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ގާޑިއޯލާ އުފަން ސަރަހައްދު، ކަޓަލޫނިއާގެ ބާސެލޯނާގައި މި މަހު ހަތަރު ވަނަ ދުވަހު ބޭއްވި އެއްވުމަށް ތަރުހީބުދޭން ގާޑިއޯލާ، 54، ބުނެފައިވަނީ، އަހަރެމެންނަށް މި ފެނިގެންދަނީ، "ލައިވް ޖެނޮސައިޑް (އިންސާނީ ނަސްލެއް ނައްތާލުމުގެ ކަންކަން ވަގުތުން ދެއްކުން)" ކަމަށެވެ.
އަދި، މި ހަމަލާތަކުގެ ތެރޭގައި، އެތަކެއް ކުޑަކުދިންނެއް މަރުވެފައިވާ ކަމަށާއި އެކަށީގެންވާ ފިޔަވަޅުތައް ނޭޅިއްޖެނަމަ، އިތުރު ކުދިން ވެސް މަރުވާނެ ކަމަށް ގާޑިއޯލާ ވަނީ ބުނެފަ އެވެ.
ސްޕެއިނާއި ޔޫރަޕްގެ ގިނަ ގައުމުތަކެއްގެ އާންމުން އަންނަނީ ފަލަސްތީނަށް އޮތް ސަޕޯޓް ދައްކާލުމަށް މަގުތަކަށް އެއްވެ، ޝުއޫރުފާޅުކުރަމުންނެވެ. ގާޑިއޯލާ ބުނީ، ވީހާވެސް ގިނަ ބަޔަކު މިކަންކަމުގައި ބައިވެރިވެ، ސަރުކާރުތަކަށް ޕްރެޝަރުކޮށް އިޒްރޭލުގެ މި އަނިޔާވެރިކަމާ ދެކޮޅަށް ތެދުވަންޖެހޭ ކަމަށެވެ.
މީގެ ކުރިން ވެސް ގާޑިއޯލާ ވަނީ އެކިއެކި ފޯރަމްތަކުގައި ފަލަސްތީނުގެ ހައްގުގައި ވާހަކަ ދައްކައިފަ އެވެ. މެންޗެސްޓާ ސިޓީގައި އޭނާ ހާސިލްކޮށްފައިވާ ކާމިޔާބީ އަށް ޓަކައި، ޔުނިވާސިޓީ އޮފް މެންޗެސްޓާ އިން އެރުވި، އޮނޮރަރީ ޑިގްރީ ލިބުމަށް ފަހު. މިދިޔަ ޖޫން މަހު ދިން ބަސްދީގަތުމުގަ އެވެ.
"ގައްޒާ އިން އެ ފެންނަނީ ވަރަށް ހިތްދަތި، ހިތްކުދިކުދިވާ ވަރުގެ މަންޒަރުތަކެއް. އަހަރެންގެ މުޅި ހަށިގަނޑުގައި އޭގެ ވޭން އަޅާފަދަ،" ގާޑިއޯލާ ބުންޏެވެ.
"ވަރަށް ސާފުކޮށް މި ބުނަނީ، މިއީ ވިސްނުމާއި ފިކުރު ހުރި ގޮތުގެ ވާހަކައިގެ ކަމެއް ނޫން. މިއީ، އަހަރެން ރަނގަޅޭ ނޫނީ ދެން ތިބި މީހުން ގޯހެކޭ އެއް ނޫން. މިއީ އިންސާނިއްޔަތަށްޓަކައި އޮތް ލޯބީގެ ވާހަކައެއް، އަވައްޓެރިންނާ މެދު އޮންނަން ޖެހޭ ގާތްކަމާ ގުޅޭ ވާހަކައެއް،"
އިޒްރޭލުން ޒަމާނުންސުރެން ފަލަސްތީނަށް އަރައި ކުރަމުން އަންނަ ލާއިންސާނީ ހަނގުރާމައިގެ، މިހާރު ހިނގަމުން އަންނަ ކަންތައްތައް ފެށިގެންދިޔައީ، އޮކްޓޫބަރު 2023 ގެ ހަތް ވަނަ ދުވަހު އެވެ. އޭގެ ފަހުން، ބައިލައްކަ އަށް ވުރެ ގިނަ މީހުން ގައްޒާގައި، މަރުވެފައިވާއިރު، އޭގެ ތެރޭގައި، ހޮސްޕިޓަލްތަކަށް ދިިން ހަމަލާތަކުގައި މަރުވި ކުޑަކުދިންނާއި އަންހެނުން ވެސް ހިމެނެ އެވެެ.
"އަހަރެމެންނަށް މި ފެންނަނީ ހަތަރު އަހަރުގެ އަންހެން ކުއްޖެއް ނޫނީ ފިރިހެން ކުއްޖެއް ބޮމުގެ ހަމަލާއެއްގައި މަރުވާ މަންޒަރު، ނޫނީ ހޮސްޕިޓަލުގައި އޮއްވައި މަރުވާ ހާލަތަށް ދާ މަންޒަރު، މި ކަންކަން ހިތަށް ގެންނަން ވެސް އުނދަގޫ، މިއަދު މިއީ އެ މީހުންނަށް ވާ ކަމަކަށް ވެދާނެ، މާދަމާ ފަހަރުގައި މިކަން އޮތީ އަހަރެމެންނަށް ކަމެއް ނޭނގެ، އަހަރެން ވަރަށް ޖެހިލުންވޭ،" ގާޑިއޯލާ ބުންޏެވެ.
މިދިޔަ މަހު 29 ގައި "ދި އެތުލެޓިކް" އިން ރިޕޯޓްކުރި ގޮތުގައި، 50 އެތުލީޓަކު ވަނީ ޔުއެފާގެ މުބާރާތްތަކުން އިޒްރޭލް ވަކިކުރަން ޔުއެފާ އަށް ޕެޓިޝަނެއް ހުށަހަޅައިފަ އެވެ. އެ ކުޅުންތެރިންގެ ތެރޭގައި، ކްރިސްޓަލް ޕެލަސް އަށް ކުޅޭ ޝެއިހް ޑޮކޫރޭ އާއި ޗެލްސީ އަށް ކުރިން ކުޅުނު ހަކިމް ޒިޔެޗް ހިމެނެ އެވެ.
