އިދިކޮޅު އެމްޑީޕީން ހުކުރު ދުވަހުގެ ރޭ ބޭއްވި މުޒާހަރާގެ ބައިވެރިންނާ ދެކޮޅަށް ބާރުގަދަ އަޑު އިއްވާ "ސޮނިކް ވެޕަން" އެއް ކަމަށްވާ ލޯންގް ރޭންޖް އެކޯސްޓިކް ޑިވައިސް (އެލްރެޑު) ބޭނުންކުރުމުން ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.
ގަލޮޅު ދެކުނު ދާއިރާގެ މެންބަރު މީކާއިލް ނަސީމް ހުށަހެޅުއްވި ކުއްލި މައްސަލައިގައި، ފުލުހުން މި ހަތިޔާރު ބޭނުންކުރުމުގެ ސަބަބުން މީހުންނަށް ކުރި އަސަރު ހާމަކޮށްފައިވެ އެވެ. އޭގެތެރޭގައި މުޒާހަރާގެ ބައިވެރިންނާއި އާންމު ރައްޔިތުންނަށް ދިމާވި ދަތިތަކާއި ސިއްހީ ގެއްލުންތައް ފާހަގަކޮށްފައިވެ އެވެ.
ނަމަވެސް، ވެރިކަންކުރާ ޕީއެންސީގެ ސުޕަ މެޖޯރިޓީ އޮންނަ މަޖިލީހުން އެ މައްސަލަ ވަނީ ބޭރުކޮށްލައިފަ އެވެ. މައްސަލަ ބަލައިގަންނަން ވޯޓު ދެއްވީ އެމްޑީޕީގެ 12 މެންބަރެކެވެ. އެ މައްސަލަ ބޭރުކޮށްލަން ޕީއެންސީގެ 40 މެންބަރަކު ވޯޓު ދެއްވި އެވެ.
އެލްރެޑު ބޭނުން ކުރުމުން ބޭރުފުށުން އަނިޔާއެއް ނުވި ނަމަވެސް ނަފުސާނީ ގޮތުންނާއި އަޑުއިވުމުގެ ހިއްސަށް ލިބޭ ގެއްލުން ބޮޑެވެ. މި ހަތިޔާރުގެ ސަބަބުން މީހުންގެ ކަންފަތް ބީރު ވުމުގެ ފުރުސަތު އޮންނަ ކަމަށް ބޭރު ސިއްހީ ޖަމިއްޔާތަކުން ވެސް ބުނެފައިވެ އެވެ.
މީގެ އިތުރުން، ގަދަ އަޑުގެ ސަބަބުން ކަންފަތަށް ގުޑުން އަރައި، ރިންގިން އަޑެއް އިވިއިވި ހުރުމާއި ކަންފަތަށް ތަދުވުން އަދި ބޮލުގައި ރިއްސުމާއި ބޯ އެނބުރުން އަދި ނަފުސާނީ އެތައް ގެއްލުމެއް ވެސް ލިބެ އެވެ. އެ ރޭ އެތަނުގައި ތިބި ގިނަ ބަޔަކު ވަނީ މިފަދަ ކަންކަން ދިމާވި ކަމަށް ބުނެފަ އެވެ.
ފުލުހުން އެ ހަތިޔާރު ބޭނުންކުރީ ލާއިންސާނީ އަދަބު މަނާކުރާ، އިންޓި ޓޯޗާ ގާނޫނާ ހިލާފަށް ކަމަށާއި އެއީ ލާއިންސާނީ އަދި ޣައިރު ގާނޫނީ އަދަބެއް ކަމަށް، ގާނޫނީ ވަކީލް ޑރ. އަހުމަދު އަލީ ސަވާދު ވެސް ވަނީ ވިދާޅުވެފަ އެވެ.
"[އެއީ] މުޒާހިރީންގެ އިތުރުން މާލޭގެ އެސަރަހައްދުގަ ދިރިއުޅޭ ކުދިބޮޑު ހުރިހާ ރައްޔިތުނަށް އާންމުކޮށް ދިން ލާއިންސާނީ ޣައިރު ގާނޫނީ އަދަބެއް،" ސަވާދު ވިދާޅުވި އެވެ.
ސޮނިކް ވެޕަން ބޭނުންކުރި މައްސަލަ ބަންޑާރަ ނައިބު، ޕްރޮސެކިއުޓާ ޖެނެރަލް އަދި އެޗްއާރްސީއެމްއިން ބަލައި ފުލުހުން ޒިންމާދާރު ކުރުވަންޖެހޭނެ ކަމަށް ވެސް ސަވާދު ވިދާޅުވި އެވެ.
"ބަޔަކު މުޒާހަރާއެއް ކުރީމަ އެ ސަރަހައްދުގަ ދިރިއުޅޭ އާންމުނަށް ގާނޫނުން ބޭރު އަނިޔާއެއް ދިނުމުގެ ހައްގެއް އެކަކަށްވެސް ނުލިބޭ،" ސަވާދު ވިދާޅުވި އެވެ.
ފުލުހުން އެލްރެޑު ބޭނުންކުރީ ގާނޫނާއި ހިލާފަށް ކަމަށް ކުރީގެ ބަންޑާރަނައިބު ދިޔާނާ ސައީދު ވެސް ވަނީ ވިދާޅުވެފަ އެވެ. އިތުރު އެތައް ވަކީލުންނެއް މި ވާހަކަތައް ސޯޝަލް މީޑިއާގައި ތަކުރާރު ކުރައްވާފައިވެ އެވެ.
ސޮނިކް ވެޕަން ބޭނުންކުރި މައްސަލައިގައި އާންމުން ފާޑުކިޔަން ފެށުމުން އެކަން ދިފާއުކޮށް ފުލުހުން ނޫސް ބަޔާނެއް ނެރުނެވެ. އެގޮތުން ފުލުހުން ބުނީ މުޒާހަރާގައި ބާރުގެ ބޭނުންކޮށްފައި ވަނީ ކަނޑައަޅާފައިވާ ގާނޫނުތަކާއި ގަވާއިދުތަކުގެ ތެރެއިން ނަގަހައްޓަން ޖެހޭ އަސާސްތަކާއެކު ކަމަށެވެ.
