ސެވިލް (އޮކްޓޫބަރު 5) - ސްޕެނިޝް ލީގުގައި މިރޭ ސެވިއްުޔާ އިން ލީގުގެ އެއް ވަނަ އަށް އަރަަން މޮޅެއް ހޯދަން ނުކުތް ބާސެލޯނާ 4-1 އިން ބަލިކޮށްލައިފި އެވެ.
ރެއާލް މެޑްރިޑުން ލީގުގެ އެއް ވަނަ އަށް ޖެހިލީ ރޭ ވިޔަރެއާލް އަތުން މޮޅުވެގެންނެވެ. އިންޓަނޭޝަނަލް ބްރޭކަށްދާއިރު، އެއް ވަނައިގައި އޮތުމަށް ބާސެލޯނާ އިން މިރޭ ސެވިއްޔާ އަތުން މޮޅުވާން ޖެހެ އެވެ. އެކަމަކު، ސެވިއްޔާ އިން ވަނީ ބާސެލޯނާ އަށް ފުރުސަތެއް ނުދީ މެޗު ކާމިޔާބުކޮށްފަ އެވެ.
ލީގުގެ އެއް ވަނައިގައި އޮތީ އަށް މެޗުން 21 ޕޮއިންޓާ އެކު ރެއާލް އެވެ، ދެ ވަނައިގައި އޮތް ބާސެލޯނާ އަށް އަށް މެޗުން ލިބުނީ 19 ޕޮއިންޓެވެ. ތިން ވަަނައިގައި އޮތް ވިޔަރެއާލަށް އަށް މެޗުން 16 ޕޮއިންޓް ލިބިފައިވާއިރު، ހަތަރެއްގައި އޮތް އެސްޕަންޔޯލަށް އަށް މެޗުން 15 ޕޮއިންޓް އަދި ފަސް ވަނައިގައި އޮތް ސެވިއްުޔާ އާއި ހަ ވަނައިގައި އޮތް އެލްޗޭ އަށް އަށް މެޗުން ވަނީ 13 ޕޮއިންޓް ލިބިފަ އެވެ.
ސެވިއްޔާގެ ދަނޑުގައި ކުޅުނު މި މެޗުގައި، އެ ޓީމުން 13 ވަނަ މިނިޓްގައި ލީޑުނެގީ ބާސެލޯނާ އަށް ކުރިން ކުޅުނު ޗިލީގެ ފޯވާޑް އަލެކްސިސް ސަންޗޭޒް ޖެހި ޕެނަލްޓީންނެވެ. މިއީ، ސެވިއްޔާގެ އިސާކް ރޮމޭރޯ އަށް އެ ޓީމުގެ އޭރިއާތެރެއިން ބާސެލޯނާގެ ރޮނާލްޑް އަރައުހޯ ކުރި ފައުލަކަށް ރެފްރީ ދިން ޕެނަލްޓީ އެކެވެ. މެޗުގެ 36 ވަނަ މިނިޓްގައި އިސާކް ރޮމޭރޯ ވަނީ ރުބެން ވާގާސް ދިން ބޯޅައަކުން ގޯލު ޖަހައި، ސެވިއްޔާގެ ލީޑުފުޅާކޮށްދީފަ އެވެ.
ފުރަތަމަ ހާފުގެ އިތުރު ވަަގުތުގެ ތެރޭގައި، ބާސެލޯނާގެ މާކަސް ރެޝްފޯޑް ވަނީ ގޯލެއް ޖަހައި އުންމީދެއް ހޯދައިދީފަ އެވެ. އަދި، މެޗުގެ 76 ވަނަ މިނިޓްގައި ނަތީޖާ ހަމަހަމަކުރަން ބާސެލޯނާގެ ރޮބަޓް ލެވަންޑޯސްކީ ފޮނުވާލި ޕެނަލްޓީ ގޯލާ ސީދާވާގޮތެއްނުވި އެވެ.
ބާސެލޯނާ އިން ފުރުސަތު ނަގާލިއިރު، އޭގެ ފަހުން، ސެވިއްޔާ އިން ވަނީ ދެ ގޯލު ޖަހައިފަ އެވެ. އިތުރު ވަގުތުގެ ތެރޭގައި ބާސެލޯނާ ކޮޅަށް ސެވިއްޔާގެ މި ލަނޑުތައް ޖެހީ، ހޯސޭ އެންހެލް ކާމޯނާ އާއި އަކޯރް އެޑަމްސް އެވެ.
