އިދިކޮޅު އެމްޑީޕީން މިރޭ އާޓިފިޝަލް ބީޗުގައި ބާއްވާ ބޮޑު މުޒާހަރާއާ ދިމާކޮށް އެމްއެންޑީއެފްގެ ޑްރޯންތައް މާލެ މަތިން ދުއްވަން ފަށައިފި އެވެ.
ޓްރެކިން ސައިޓުތަކުން ދައްކާ ގޮތުގައި މާފަރު އެއާޕޯޓުގައި ހުންނަ ޑްރޯން ބޭސް އިން މިއަދު ހަވީރު ފުރި ސިފައިންގެ ޑްރޯން އެއް މިހާރު ދަނީ މާލެ މަތިން ބުރު އަޅަމުންނެވެ. ޑްރޯން މިވަގުތު އޮތީ މާލޭގެ ދެކުނުން ދެތިން މޭލު ދުރުގަ އެވެ. ޑްރޯން ދުއްވަމުން ގެންދަނީ ސަވައިލެންސަށް އާންމުކޮށް ދުއްވާ ޕެޓާންތަކަށެވެ.
އިދިކޮޅު މުޒާހަރާ ފެށެން ކުޑަތަން ވެފައި ވަނިކޮށް އެމްއެންޑީއެފްގެ ޑްރޯން މާލެ މަތިން ދުއްވަމުންދާ ސަބަބެއް ސިފައިން ބުނެފައެއް ނުވެ އެވެ.
މީގެ ކުރިން ރައީސް މުހައްމަދު މުއިއްޒު އަތޮޅުތަކަށް ކުރެއްވި ބައެއް ދަތުރުތަކާއި ގުޅިގެން، އެމަނިކުފާނު ވަޑައިގެންނެވި ބައެއް ރަށްރަށުގެ މަތިން ޑްރޯން ދުއްވާފައިވެ އެވެ.
ނަމަވެސް، ކޮންމެވެސް އޮޕަރޭޝަނަކާއި ގުޅިގެން މިއަދާއި މިރޭ މާލޭގެ އެކި ސަރަހައްދުތަށް ބަންދުކުރާނެ ކަމަށް ފުލުހުން ވަނީ ބުނެފަ އެވެ. އަދި ފުލުހުން އެލާޓަށް ގެނެސް ގިނަ އަދަދެއްގެ އޮފިސަރުން މާލޭގެ މަގުތަކަށް ވެސް ވަނީ ނެރެފަ އެވެ.
އެމްއެންޑީއެފްގެ ޑްރޯން މިވަގުތު ދުއްވަމުންދާ ސަރަހައްދު އަދި ދުއްވަމުންދާ ގޮތް ---- ފޮޓޯ: ފްލައިޓް ރޭޑަރު
ފުލުހުންގެ ރަސްމީ އެކްސް އެކައުންޓުން ދެންމެ ކުރި ޕޯސްޓެއްގައި ބުނީ އާންމުންނަށާއި ޓްރެފިކަށް އެކި ސަރަހައްދުތައް ބަންދުކުރަނީ ފުލުހުން ކުރިއަށް ގެންދާ އޮޕަރޭޝަނަކާއި ގުޅިގެން ކަމަށެވެ. އިތުރު އެއްވެސް ތަފުސީލެއް ނުދެ އެވެ.
ފުލުހުން މިހެން ބުނެ ޕޯސްޓެއް ކޮށްފައި ވާއިރު، އެ ހިދުމަތުން އިއްޔެ ނެރުނު ބަޔާނެއްގައި މިރޭގެ އެއްވުމުގައި, އަމާން މަސްލަހަތު ނަގާލައި، ކުށްކުރަން އުޅޭ ކަމަށް ތުހުމަތުކޮށް އެ މުޒާހަރާ ހުއްޓުވާނެކަމުގެ އިޝާރާތެއް ވަނީ ދީފަ އެވެ. އެ ބަޔާނުގައި ފުލުހުން ބުނީ ބޮޑު އެއްވުމުގައި ކުށްކުރާ ގުރޫޕުތައް ނެރެ މާލެ ހަލަބޮލިކުރަން އުޅޭކަމުގެ މައުލޫމާތުތަކެއް ފުލުހުންނަށް ލިބިފައިވާ ކަމަށެވެ.
"އެކި ބައިބަޔަށް ބެހި ކުށްކުރާ ގްރޫޕުތައް މަގުމައްޗަށް ނެރެ މާލެ ތެރެ ހަލަބޮލިކޮށް ތަންތަނަށް ގެއްލުން ދިނުމަށް ރާވާފައިވާކަމުގެ މައުލޫމާތު ފުލުހުންނަށް ވަނީ ލިބިފަ،" ފުލުހުން ބުނެފައިވެ އެވެ.
