ދުނިޔޭގެ އެންމެ މޮޅު އެއް ފުޓްސަލް ކުޅުންތެރިޔާ، ޕޯޗުގަލްގެ ރިކާޑީނިއޯއާ އެކު، ކްލަބް އެޗްޑީސީން ޕްރެކްޓިސް ފަށައި، މި ފަހަރުގެ ކްލަބް މޯލްޑިވްސް ކަޕަށް ތައްޔާރުވާން ފެށުމުން ހީވީ އަލުން ފުޓްސަލް ކުޅެން ފެށުނުހެން ކަމަށް ރާއްޖޭގެ އެންމެ މޮޅު އެއް ފުޓްސަލް ކުޅުންތެރިޔާ، އެޗްޑީސީގެ ތަރި، ހުސެއިން ޝަރީފް (އޮންލީ) ބުނެފި އެވެ.
ދުނިޔޭގެ އެންމެ މޮޅު ފުޓްސަލް ކުޅުންތެރިޔާގެ މަގާމު ހަ ފަހަރު ހޯދާފައިވާ، ލެޖެންޑަރީ ފުޓްސަލް ތަރި، ރިކާޑީނިއޯ އަކީ ރާއްޖޭގެ ފުޓްސަލް ތާރީހަށް ބަލާއިރު، މި ގައުމުގައި ކުޅޭނެ އެންމެ ފުންނާބު އުސް ކުޅުންތެރިޔާ އެެވެ. އެޗްޑީސީން ރިކާޑީނިއޯ ގެނެސް ކްލަބް މޯލްޑިވްސްގައި މި ކުރާ މަސައްކަތުން ރާއްޖޭގެ ފުޓްސަލް ކުޅުންތެރިންނަށް ގިނަގުނަ ފައިދާތަކެއް ކުރާނެ ކަމަށް ގިނަ ބަޔަކު އަންނަނީ ބުނަމުންނެވެ.
"އަނެއްހެން ބުނާނަމަ ހީވީ، ޕްރެކްޓިސް ކޮށްލި ހިސާބުން ވެސް ހީވީ އަލުން، (ފުޓްސަލް) ކުޅެން ފެށީހެން، މިދިޔަ 10 އަހަރު މި ކުރީ އެހެން ކަމެއް ހެން އަނެއްހެން ބުނަންޏާ، މުޅިން މުޅިން ހުރިހާ އެއްޗެއް ޑިފެންސް ވެސް އެޓޭކު ވެސް އާ ފެށުމަކުން ފެށުން ފަދަ އެހާ ވަރަށް ބުނެވޭނީ،" ރާއްޖޭގައި ބާއްވާ ދެ ބޮޑު ފުޓްސަލް މުބާރާތް، ކްލަބް މޯލްޑިވްސް ކަޕާއި ގޯލްޑަން ފުޓްސަލް ޗެލެންޖް ކާމިޔާބުކޮށްފައިވާ އޮންލީ ބުންޏެވެ.
ރިކާޑީނިއޯއާ އެކު، އެޗްޑީސީން ނުކުންނަން ޖެހުނީ ކްލަބް މޯލްޑިވްސް ކަޕްގައި މަރުގެ ގްރޫޕަކަށެވެ. އެ ގްރޫޕްގެ ގުރުއަތުލުން ނެގިއިރު އޮތް، އުރީދޫން ބައިވެރިނުވާން ނިންމައި، ނަން ނެގުމުން، ދެން މިހާރު އެ ގްރޫޕްގައި އޮތީ އެޗްޑީސީ އާއި ސްޓެލްކޯ ރެކްރިއޭޝަން ކްލަބްގެ އިތުރުން، ކްލަބް އެމްޓީސީސީ އެވެ. އެޗްޑީސީން ފުރަތަަމަ މެޗުގައި 2-1 އިން ސްޓެލްކޯ ބަލިކުރިއިރު، އެ މެޗުގައި އެޗްޑީސީ މޮޅުވި ގޯލު ޖެހުމުގެ އިތުރުން މޮޅު ކުޅުންތެރިޔާގެ މަގާމު ހޯދީ އޮންލީ އެވެ.
އޮންލީ ބުނީ ފުރަތަމަ މެޗު ވަރަށް އުނދަގޫ ކަމަށާއި ޕްރެޝަރުގައި ކުޅެން ޖެހުމުން އެންމެ ރަނގަޅު ކުޅުން ދަށްކަން އުނދަގޫތަކެއް ކުރިމަތިވި ކަމަށެވެ.
"ޓީމުގެ ހުރިހާ ކަމެއް ވެސް ރަނގަޅު ހަަމަ، ދިޔަ އެކަމަކު، މުބާާރާތާ ވަރަށް ކައިރިވެފައި އިނދެފައި ކޯޗު ދުވަސްކޮޅަކަށް ވަކިވާން ޖެހުނީމަ އެ ތަންކޮޅު ދެއްކި، އެކަމަކު، އަަހަރެމެންގެ މެއިން ޕްލޭޔަރު (ރިކާ) ލައިގެން، އޭނަ ވަރަށް ބޮޑަށް ޓީމަށް އަސްލު ބުނާނަމަ، މިތާ މި ތިބި ޕްލޭޔަރުންނަށް ވުރެން ބޮޑަށް އޭނަގެ އެފަޓް އަހަރެމެންނަށް ލިބުނު އެހެންވީމަ ކަންނޭނގެ ޓީމު އެހާ ބޮޑުތަން ރަނގަޅުވީ،" އޮންލީ ބުންޏެވެ.
މިދިޔަ އަހަރުގެ ކްލަބް މޯލްޑިވްސް ކަޕާއި މި އަހަރުގެ ގޯލްޑަން ފުޓްސަލް ޗެލެންޖްގައި އަނިޔާގެ ސަބަބުން އޮންލީ އަށް ނުކުޅެވުނެވެ. އަލުން އަނބުރާ ބޮޑު މުބާރާތަކަށް އައިސް ފުރަތަމަ މެޗުގައި ވެސް ޖުމްލަކޮށް އޮންލީ ވަނީ ރަނގަޅު ކުޅުމެއް ދައްކައިފަ އެވެ.
"މިހާރު މި ހުރީ އަނެއްހެން ބުނާނަމަ، ފިޓްނަސް ލެވަލް ހުރިހާ ގޮތަކުން ވަރަށް ރަނގަޅަށް، މިދިޔަ އަހަރުގެ ސީއެމްސީ (ކްލަބް މޯލްޑިވްްސް ކަޕް) ނުކުޅެވި ހުރެވުނީމަ، އުނދަގޫ އަނެއްކާ ވަރަށް ޕްރެޝަރުކޮށް ފަށަން ޖެހުނީ، އެހެންވީމަ ވެސް އުނދަގޫވާނެ، ދެން ބަލަނީ ރަނގަޅުވާނެ ކަމަށް،" ލ. ގަމަށް އުފަން، އޮންލީ ބުންޏެވެ.
އެޗްޑީސީން ކްލަބް މޯލްޑިވްސް ކަޕްގައި މިރޭ އެމްޓީސީސީއާ ދެކޮޅަށް ކުޅޭ މެޗު ފަށާނީ 22:15 ގަ އެވެ.
