ކަސްރަތު ކްލާސްތަކާއި ސްޓޫޑިއޯ ފަދަ ތަފާތު ނަންނަމުގައި ޔޯގާ ހަރަކާތްތައް ހިންގަމުންދާ ދިޔުން އިލްމުވެރިންގެ ގުޅުމުން ކުށްވެރިކޮށްފި އެވެ.
އިލްމުވެރިންގެ ގުޅުމުން މިއަދު ނެރުނު ބަޔާނެއްގައި ބުނީ ޔޯގާއަކީ ހިންދޫ ދީނުގެ އަޅުކަމެއްކަން އެކަމުގެ ހަގީގަތް ބެލުމަށް ދިވެހިރާއްޖޭގެ އިލްމުވެރިން ކުރި ދިރާސާއިން އެނގިފައިވާ ކަމަށާއި ޔޯގާއަކީ ޝިރުކުގެ އަމަލެއް ކަމަށެވެ.
"ޔޯގާއަކީ އޭގެ ޒާތުގައި ހިންދޫ ދީނުގެ އަޅުކަމެކެވެ. އަދި ޝިރުކުގެ އަމަލެކެވެ. އަދި ކަސްރަތުގެ ގޮތުގައި ނުވަތަ އެ ނޫން ގޮތަކަށް ވެސް ޔޯގާ ހެދުމަކީ ހަރާމް ކަމެކެވެ. އެކަމާ ގުޅޭ ދިރާސާއިން ހާމަވީ ކަންކަމާ މެދުގައި ދިވެހިރާއްޖޭގެ 104 އިލްމުވެރިން އެއްބަސްވެވަޑައިގެން އެކަން ބަޔާން ކޮށްދިނުމުގެ ގޮތުން އިލްމުވެރިންގެ ގުޅުމުގެ ފަރާތުން އެކަން އާންމުކޮށްފައިވާނެ އެވެ،" އިލްމުވެރިންގެ ގުޅުމުން ނެރުނު ބަޔާނުގައި ބުންޏެވެ.
އޭގެ އިތުރުން އިލްމުވެރިންގެ ޖަމިއްޔާއިން ބުނީ ޔޯގާގެ ހަރަކާތްތައް ހުއްޓުވައިދިނުމަށް އެދި 2022 ވަނަ އަހަރު އޭރުގެ އިސްލާމިކް މިނިސްޓްރީން ފުލުހުންނަށް ފޮނުވި ސިޓީގައި ވެސް ޔޯގާއަކީ އިސްލާމީ ޝަރީއަތާ ހިލާފު ކަމެއްކަން ބަޔާން ކޮށްފައިވާ ކަމަށެވެ.
އެކަންކަން އެހެން ހުރުމުން ޔޯގާ ކްލާސްތަކާއި ޕްރޮގުރާމްތައް ހިންގުން ފަދަ ކަންކަމަށް އެއްވެސް ގޮތަކަށް އެއްބާރުލުން ނުދިނުމަށް ދިވެހި ރައްޔިތުންނަށް އިލްމުވެރިންގެ ގުޅުމުގެ ފަރާތުން ގޮވާލައިފައިވެ އެވެ. އަދި އެފަދަ ކަންކަން ދިވެހި ދައުލަތުގެ ތެރޭގައި އާލާވުން ހުއްޓުވުމަށާއި އެފަދަ ކަންކަން ހުއްޓުވުމަށް އިލްމުވެރިންގެ ފަރާތުން ތަކުރާރުކޮށް ދަންނަވަން ނުޖެހޭ ފަދަ ގޮތަކަށް ސަރުކާރުގެ ކަންކަން އިންތިޒާމުކޮށް ރޭވުމަށް އެ ގުޅުމުން ގޮވާލައިފައިވެ އެވެ.
"...ޝިރުކުގެ އަމަލެއް ކަމުގައިވާ ޔޯގާއާ ގުޅޭ އެއްވެސް ކަމެއްގައި އެއްވެސް މިންވަރަކަށް ބައިވެރިނުވުމަށް ލޮބުވެތި އަހުންނާއި އުހުތުންނަށް ނަސޭހަތްތެރިވަމެވެ. އެހެނީ ޝިރުކުގެ އަމަލުތަކަކީ އިންސާނަކަށް ކުރެވޭނެ އެންމެ ބޮޑު ފާފަ އެވެ،" އެ ބަޔާނުގައި ބުންޏެވެ.
ޔޯގާއަކީ ހިންދޫ ދީނުގެ އަޅުކަންތަކެއް ނަކަލުކޮށްގެން ހިންގާ ކަސްރަތުގެ ހަރަކާތްތަކެއް ކަމަށް ބުނެ، 2022 ވަނަ އަހަރު ރާއްޖޭގައި ޔޯގާ ޑޭ ފާހަގަ ކުރި އިރު، އެކަމާ ދެކޮޅަށް ވަނީ އަޑު އުފުލައި ހަމަނުޖެހުން ހިންގައިފަ އެވެ. އެ އަހަރު ޔޯގާ ޑޭ ފާހަގަ ކުރީ ގަލޮޅު ދަނޑުގަ އެވެ.
ޔޯގާ ޑޭ ފާހަގަ ކުރުމުގެ ހަރަކާތް ކުރިއަށް ދަނިކޮށް ދަނޑަށް ވަދެގަނެ، ހަރަކާތުގެ ބައިވެރިވި ބައެއް މީހުންނަށް ވަނީ ހަމަލާދީފަ އެވެ. އެ މައްސަލައިގައި، ފިތުނަ އުފައްދައި ހަމަނުޖެހުމަށް ހިތްވަރު ދިން ކަމަށް ބުނެ ބައެއް އިލްމުވެރިންނަށް ދައުލަތުން ދައުވާ ކުރި އެވެ. އެކަމަކު އެ ދައުވާތައް މި ސަރުކާރުން ވަނީ އަނބުރާ ގެންގޮސްފަ އެވެ.
އޭރު ޔޯގާގެ ހަރަކާތްތައް ރާއްޖޭގައި ކުރިއަށް ގެންދިޔުމާ ދެކޮޅަށް މިހާރުގެ ސަރުކާރުގެ އިސް މަގާމުތަކުގައި ތިބި މީހުން ވެސް ވަރަށް ބޮޑަށް އަޑު އުފުލި އެވެ. ނަމަވެސް ޔޯގާގެ ހަރަކާތްތައް މިހާރު ވެސް ރާއްޖޭގައި ކުރިއަށް ގެންދެ އެވެ.
އެގޮތުން މި އަހަރުގެ ދުނިޔޭގެ ޔޯގާ ދުވަސް ފާހަގަކުރީ ވެސް ސަރުކާރުގެ ހާއްސަ ޝަރަފުވެރި މެހެމާނެއްގެ ގޮތުގައި ސްޕޯޓްސް މިނިސްޓްރީގެ ސްޓޭޓް މިނިސްޓަރު އިބްރާހިމް އާމިރުގެ ބައިވެރިވުމާއެކު އެވެ.
