ދުނިޔޭގެ އެންމެ މޮޅު ފުޓްސަލް ކުޅުންތެރިޔާގެ މަގާމު ހަ ފަހަރު ހޯދާފައިވާ، ލެޖެންޑަރީ ފުޓްސަލް ތަރި، ޕޯޗުގަލްގެ ރިކާޑީނިއޯ ހިމެނިގެން މި ފަހަރުގެ ކްލަބް މޯލްޑިވްސް ކަޕްގައި ވާދަކުރާ ކްލަބް އެޗްޑީސީން މި ފަހަރުގެ މުބާރާތުގައި ކުޅުނު ފުރަތަމަ މެޗުން ސްޓެލްކޯ ރެކްރިއޭޝަން ކްލަބް އަތުން 2-1 އިން މޮޅުވެއްޖެ އެވެ.
ގިނަ އަދަަދެއްގެ ސަޕޯޓަރުން ބަލަން ދިޔަ މެޗެއްގެ ގޮތުގައި ރޭގެ މެޗު ފާހަގަވިއިރު، މިއީ، ކްލަބް މޯލްޑިވްސްގެ ތާރީހުގައި ވެސް ރިކާޑީނިއޯ ލެވަލްގެ ދުނިޔޭގެ ފެންވަރު ފުޓްސަލް ކުޅުންތެރިއަކު މި މުބާރާތުގައި ކުޅުނު ފުރަތަަމަ ފަހަރެެވެ. މެޗުގެ ފަހު ވަގުތު ކޮޅު ބޯ ވިއްސާރައިގައި ކުރިއަށްދިޔައިރު ވެސް ގިނަ ބަޔަކު މެޗު ބަލަން މަޑުކުރި އެވެ.
ގްރޫޕް ސީގެ ރޭގެ މެޗުގައި، އެޗްޑީސީން ފުރަތަމަ ހާފުގައި ލީޑުނެގީ، ރިކާޑީނިއޯ ދިން ބޯޅައަކުން އެ ޓީމުގެ މިސްރު ކުޅުންތެރިޔާ، ހަލީލް ޖަމާލް ޖެހި ގޯލުންނެވެ. ސްޓެލްކޯގެ އަހުނަފް ރަޝީދު (އަހުއްކޮ) ގޯލު ޖަހައި، ދެ ވަނަ ހާފުގައި އެއްވަރުކުރި އެވެ. އެކަމަކު، ފަހު ވަގުތު، އެޗްޑީސީގެ ތަރި، ހުސެއިން ޝަރީފް (އޮންލީ) ލަނޑު ޖަހައި އެ ޓީމު މޮޅުކޮށްދިނެވެ.
އެޗްޑީސީ ޓީމުގެ ހަލީލް ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ
މި ގްރޫޕްގައި އޮތް އުރީދޫ ޓީމުން ނަން ނެގުމުން، ދެން އޮތީ އެޗްޑީސީ އާއި ކްލަބް އެމްޓީސީސީ އަދި ސްޓެލްކޯގެ ކުރިމަތިލުންތަކެވެ.
ގްރޫޕް ޑީގައި ރޭ މޯލްޑިވިއަން އިން ވަނީ ފުރަތަމަ މެޗުގައި 6-1 އިން ޓީމު އެފްއެސްއެމް ބަލިކޮށްފަ އެވެ. އަދި، ކުރީގެ ޗެމްޕިއަނެއް ކަމަށްވާ ޓީމު ފެނަކަ އިން އަހަރެއްގެ މެދުކެނޑުމަަށް ފަހު، ކްލަބް މޯލްޑިވްސް ކަޕަށް އައިސް ކުޅުނު ފުރަތަމަ މެޗުން ޕްރިޒަން ކްލަބް އަތުން 2-0 އިން މޮޅުވި އެވެ.
މޯލްޑިވިއަން އަށް ރޭގެ މެޗުގައި ލަނޑުތައް ޖަހައިިދިނީ، އިބްރާހިމް ނަދާދު (ކުޑައްޓޭ) ހެޓްރިކެއްގެ އިތުރުން، އިސްމާއިލް އަހުމަދު، ޔަޒްދާން އިބްރާހިމް އަދި މުހައްމަދު އަބްދުﷲ އެވެ. އެފްއެސްއެމްގެ ހަމައެކަނި ލަނޑު ޖެހީ އަބްދުﷲ ލޫތު އިބްރާހިމް އެވެ.
ފެނަކަ އިން ލީޑުނެގީ ބަދަލަކަށް ކުޅެން އަރައި، ހަނި އޭންގަލުން އީމާން ނަޒީރު ޖެހި ގޯލުންނެވެ. އަދި، މެޗުގެ ފަހު މިނިޓްގައި ފެނަކަ އަށް ތިން ޕޮއިންޓް ޔަގީންކޮށްދިން ލަނޑު ޖެހީ، އަހުމަދު ހަލީމް (އައްމަޑޭ) އެވެ.
