ކްލަބް މޯލްޑިވްސް ކަޕްގެ ފުރަތަމަ މެޗުތަކުގައި ރޭ ރޯޑް ރެކްރިއޭޝަން ކްލަބް (އާރްއާރްސީ) އާއި އެމްއޭސީއެލް އަދި ކްލަބް އިމިގްރޭޝަން އިން މޮޅުވެއްޖެ އެވެ.
މުބާރާތް ފެއްޓުމުގެ ގޮތުން، ރޭ ކްލަބް މޯލްޑިވްސް އިން ވަނީ، ރާއްޖޭގައި އުފެދުނު އެންމެ މޮޅު އެއް ފުޓްސަލް ކުޅުންތެރިޔާ، އަލީ ހާފިޒް (ހާއްޕެ) އަނިޔާގެ ސަބަބުން މި ފަަހަރުގެ މުބާރާތުގައި ނުކުޅެވޭއިރު، އޭނާގެ އަގުވަޒަންކޮށްފަ އެވެ.
ތިން ފަހަރު ޗެމްޕިއަންކަން ހޯދާފައިވާ އެމްއޭސީއެލް އިން ރޭ ކުޅުނު މެޗުގައި ބައްދަލުކުރީ ދިވެހި ސިފައިންގެ ކްލަބާ އެވެ. އެ މެޗުން އެމްއޭސީއެލް ވަނީ 2-1 އިން މޮޅުވެފަ އެވެ. އެ ޓީމުގެ ލަނޑުތައް ޖެހީ، އަހުމަދު ހުސާމް (ހުސާންކޮ) އާއި އަޒްޔާން އިބްރާހިމް އެވެ. ދިވެހި ސިފައިންގެ ކްލަބުން ލަނޑު ޖެހީ، އީރާންގެ ކުޅުންތެރިޔާ، ސޮރޯޝް މަޝައްދީ އެވެ.
ރޭގެ މެޗުގެ ތެރެއިން ހުސާންކޮ އާއި އަޒްޔާން ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް.އެމްވީ
މި ގްރޫޕްގެ އަނެއް މެޗުގައި، ކްލަބް އިމިގްރޭޝަނުން ވަނީ ބަރޮސް މޯލްޑިވްސް އަތުން 3-0 އިން މޮޅުވެފަ އެވެ. އިމިގްރޭޝަންގެ ލަނޑުތައް ޖެހީ ހުސެއިން ނިޔާޒް، ކައިސަން ބިން ހިސާން އަދި އަބްދުﷲ ރިމާހު އެެވެ.
ގްރޫޕް ބީގައި ރޭ މުބާރާތުގެ އެންމެ ކާމިޔާބު ޓީމު ކަމަށްވާ، އެސްޓީއޯ ރެކްރިއޭޝަން ކްލަބުން ކުޅުނު މެޗުން ވަނީ 1-0 އިން އާރްއާރްސީ އަތުން ބަލިވެފަ އެވެ. މި މެޗުގައި، އާރްއާރްސީގެ ހަމައެކަނި ލަނޑު ޖެހީ މެޗު ނިމެން ކުޑަވަގުތުކޮޅަކަށްވެފައި ވަނިކޮށް، އަބްދުﷲ ޔާމީން (ޔާން) އެެވެ.
ރޭގެ މެޗުގައި އެސްޓީއޯގެ ހައިޝަމް (ކ) ކައިރިން އާރްއާރްސީގެ މުނީޒް ބޯޅަ ހޯދަން މަސައްކަތް ކުރަނީ.--- ފޮޓޯ: އިމޭޖަސް.އެމްވީ
މި ގްރޫޕްގައި ދެން އޮތް ދެ ޓީމު ކަމަށްވާ، ކްލަބް ފެން އާއި ކަސްޓަމްސް ރެކްރިއޭޝަން ކްލަބް ކުޅުނު މެޗު ނިމުނީ 2-2 އިން އެއްވަރުވެގެންނެވެ. ކަސްޓަމްސްގެ އީހާބް އާތެފް އާއި މައުފޫޒް އާދަމްގެ ގޯލުތަކުން ލީޑުނަގާފައިވަނިކޮށް، ފެން އަށް އެއްވަރުކޮށްދިނީ، ސޮލާހު އަލީ އާއި ސައިފާން އަހުމަދު މަނިކް އެވެ.
ކްލަބް މޯލްޑިވްސް ކަޕްގައި މިރޭ ވެސް ތިން މެޗެއް ކުޅޭނެ އެވެ. އެ ގޮތުން، 20:30 ގައި ފަށާ މެޗުގައި، ސްޓެލްކޯ އިން ކުޅޭނީ ކްލަބް އެޗްޑީސީއާ އެވެ. އަދި، އެ ގަޑީގައި މޯލްޑިވިއަން އިން ކުޅޭނީ ޓީމު އެފްއެސްއެމްއާ އެވެ. އެ އަށް ފަހު، 20:30 ގައި ކުޅޭނީ އެއް މެޗެވެ. ޕްރިޒަން ކްލަބުން ބައްދަލުކުރާނީ ޓީމު ފެނަކައާ އެވެ. އެ މެޗު ފަށާނީ 22:15 ގަ އެވެ.
