ހުޅުމާލޭ ޓޫރިޒަމް ޒޯނުގެ ގޮތުގައި ތަރައްގީކުރަން އުޅުނު އާބަން އައިލްގައި ހޮޓާތަކާއި އެހެނިހެން ތަންތަން ތަރައްގީކުރަން ސޮއިކުރުމަށް ފަހު، ކުރިން ރޭވި ގޮތަށް އެ ޕްރޮޖެކްޓު ކުރިއަށް ގެންދާނެ ކަމާ މެދު ސުވާލު އުފެދިގެން ޑިވެލޮޕަރުން ކަންބޮޑުވެއްޖެ އެވެ.
މި މައްސަލައިގައި އަދަދު އަށް މައުލޫމާތު ދިން މީހުން ބުނީ، މި ޕްރޮޖެކްޓުގެ ސްޓޭކްހޯލްޑަރުން ވަނީ މިކަމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށް ދާން ވިސްނާ ގޮތެއް ސާފުކުރަން މެނޭޖުމަންޓާ ބައްދަލުކުރަން ވެސް މަސައްކަތް ކޮށްފަ އެވެ.
މި މަސައްކަތުގެ ދަށުން، މި އަހަރުގެ މެއި މަހުގެ ފަހުކޮޅު އެޗްޑީސީގެ އޭރުގެ މެނޭޖިން ޑިރެކްޓަރު މައުރޫފް ޖަމީލަށް އެޑްރެސްކޮށް އާބަން އައިލްގައި ހިމެނޭ ޑިވެލޮޕަރުން ސޮއިކޮށް ފޮނުވި ސިޓީއެއްގެ ކޮޕީއެއް ވެސް މި ނޫހަށް ވަނީ ލިބިފަ އެވެ.
އެ ސިޓީ ފޮނުވަން ޖެހުނު ސަބަބެއް ކަމަށް ޑިވެލޮޕަރުން ބަޔާންކޮށްފައި އޮތީ، އާބަން އައިލްގެ އަދާހަމައެއް ނުލިބޭތީ، މިހާރުގެ ހާލަތާ ގުޅޭ ގޮތުން މައުލޫމާތު ސާފުކުރަން ބޭނުންވެގެން ކަމަށެވެ. ޑިވެލޮޕަރުން ވަނީ ގަވާއިދުން މުއާމަލާތް ނުކުރާތީ، އެކަމުގެ ކަންބޮޑުވުން އޮތް ކަމަށް ވެސް ސިޓީގައި ބަޔާންކޮށްފަ އެވެ.
އޭގެ އިތުރުން ޑިވެލޮޕަރުން ވަނީ، މަޝްރޫއާ ގުޅޭ ގޮތުން އެންމެ ފަހުން ބައްދަލުވުމެއް ބާއްވައި، މަޝްވަރާ ކުރިތާ ގިނަ ދުވަސްތަކެއް ވޭތުވެގެން ގޮސްފައިވާ ކަން ވެސް ފާހަގަކޮށްފަ އެވެ. އަދި މި ޕްރޮޖެކްޓު ކާމިޔާބުކަމާއެކު ނިންމަން އެޗްޑީސީ އަދިވެސް ތައްޔާރަށް އޮތް ކަމަށް އުއްމީދު ކުރާ ކަމަށް ވެސް އެ ސިޓީގައި ލިޔެފައި ވެ އެވެ.
ޑިވެލޮޕަރުން ފޮނުވި ސިޓީގައި 14 ޑިވެލޮޕަރަކު ސޮއިކޮށްފައި ވެ އެވެ. މި ހުރިހާ ކުންފުނިތަކަކީ ވެސް އާބަން އައިލްގައި ބިން ގަނެފައިވާ ފަރާތްތަކާއި އެކިއެކި މަސައްކަތްތައް ކުރަން އެޗްޑީސީން ސޮއިކޮށްފައިވާ ކުންފުނިތަކެވެ.
މި ސިޓީ ފޮނުވި ފަހުން، ސަރުކާރުން ވަނީ އާބަން އައިލްގައި ފައިނޭންޝަލް ސެންޓަރު ތަރައްގީކުރަން ނިންމާފަ އެވެ. މައުލޫމާތު ލިބޭ ގޮތުގައި އެ ބިން ވެސް ވަނީ ފިނޭންސް މިނިސްޓްރީއާ ހަވާލުކޮށްފަ އެވެ. މި ބިންތަކުގެ ތެރޭގައި ކުރިން އެހެން ޑިވެލޮޕަރުންނާ ހަވާލުކުރި ބިންތައް ހިމެނޭ ކަމަށް ވެސް މި ނޫހަށް މައުލޫމާތު ދިން އެއް މަސްދަރުން ބުންޏެވެ.
ނަމަވެސް މި ނޫހުން މައުލޫމާތު ހޯދަން ބޭނުންވެގެން ގުޅާ ކޮންމެ ފަހަރެއްގައި އެޗްޑީސީން އެއްވެސް ވަރަކަށް އެއްބާރުލުމެއް ނުލިބޭތީ، އާބަން އައިލްއާ މެދު މިހާރު ގެންގުޅޭ ވިސްނުމަކީ ކޮބައިކަމެއް ނޭނގެ އެވެ.
އެޗްޑީސީން އާބަން އައިލް އިފްތިތާހުކުރިއިރު ބުނީ، 23 ހެކްޓަރުގެ މި ސަރަހައްދު ވެެގެންދާނީ ކުރު އަދި ދިގު މުއްދަތުގެ ސްޓޭޓަކަށް ވެސް އެކަށޭނަ މަންޒިލަކަށް ކަމަށެވެ.
އޮރިޖިނަލް ޕްލޭނުގައި ހިމެނޭ އެކޮމޮޑޭޝަންތަކުގެ ތެރޭގައި ލަގްޒަރީ ވިލާ އާއި ސާވިސް އެޕާޓްމަންޓާއި ސިޓީ ހޮޓެލްގެ އިތުރުން މިޑްސްކޭލް އަދި އަޕްސްކޭލް ހޮޓެލްތަކާއި ގެސްޓް ހައުސްތައް ވެސް ހިމެނެ އެވެ. އަދި ބްރޭންޑަޑް ރީޓެއިލް އަދި މަތީ ފަންތީގެ ރެސްޓޯރަންޓްތައް ވެސް ގާއިމުކުރަން ރޭވި އެވެ.
