ރާއްޖޭގެ ލީގުގެ ލެވަލް ރަނގަޅު ކަމަށާއި ކުރިއަށް ހުރި މެޗުތަކުގައި އޮޑި ސްޕޯޓްސް ކްލަބުން އިތުރަށް ރަނގަޅުކުރާނެ ކަމަށް އެ ޓީމުގެ ކޯޗު، ޔުއެފާ ޕްރޯ ލައިސަންސް ހާސިލްކޮށްފައިވާ ސްޕެއިނުގެ އަންދްރޭ ގާސިއާ ބުނެފި އެވެ.
ލީގުގެ ދެ ވަނަ ހަފްތާގެ ކުޅުން ނިމިގެންދިޔައިރު، އޮޑި އޮތީ އެއް ވަނައިގަ އެވެ. އެއީ، ދެ ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބާއި ތިން ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާ އެއްވަރަށް ޕޮއިންޓް ހޯދައިގެންނެވެ. ފައިދާ ގޯލަށް ބަލާއިރު، އޮޑި އަށް 10 ގޯލު އޮތްއިރު، ނިއު އަށް އޮތީ އަށް ގޯލެވެ. އަދި، މާޒިޔާގެ އޮތީ ހަތް ގޯލެވެ.
އޮޑިން އިއްޔެ ހަވީރު 7-1 އިން ކްލަބް ވެލެންސިއާ ބަލިކުރި މެޗަށް ފަހު، ގާސިއާ، 41، ބުނީ، ރާއްޖޭގެ ފުޓްބޯޅައިގެ ލެވަލާ މެދު އޭނާ އަށް ފެންނަނީ ވަރަށް ރަނގަޅުކޮށް ކަމަށެވެ.
"މާޒިޔާ އަކީ ވަރަށް ރަނގަޅު ޓީމެއް، ނިއު ރޭޑިއަންޓަކީ ވެސް ވަރަށް ރަނގަޅު ޓީމެއް. ދެން، އަހަރެމެން ކުޅެން ޖެހޭ ވިކްޓަރީ ވެސް ފެންނަނީ ވަރަށް ރަނގަޅުކޮށް، އަހަންނަށް ފެންނަ ގޮތުގައި ކޮންމެ ޓީމެއް ވެސް ރަނގަޅު ކުޅުމެއް ދެއްކޭތޯ އެބަ މަސައްކަތްކުރޭ. ބުރު އަކީ ވެސް އިންޑިވިޖުއަލް ރަނގަޅު ކުޅުންތެރިން ތިބި މޮޅު ޓީމެއް. އެހެންވީމަ ލެވަލް ރަނގަޅު، އަހަންނަށް ފެންނަފެނުމުގައި ކޮންމެ ޓީމެއްގައި ވެސް ކުޅެން އައިސް މި ތިބި ބިދޭސީ ކުޅުންތެރިން މި ލެވަލް ރަނގަޅު ކުރުމުގައި ދައުރެއް އަދާކުރޭ،" ގާސިއާ ބުންޏެވެ.
ސްޕެއިން ފުޓްބޯޅަ ފެޑެރޭޝަނުގެ ގައުމީ ލެވަލްގެ ކޯޗެއްގެ ގޮތުގައި، 2013 ގައި ކޯޗިން އަށް ނުކުތް ގާސިއާ، ޗައިނާގެ ގުއަންޒޫ އެވަގްރާންޑޭގެ ރެއާލް މެޑްރިޑް ފައުންޑޭޝަންގެ ޔޫތު ޓީމުތަކަށް ކޯޗުކޮށްދީފަ އެވެ.
ސްޕޯޓްސް ޓްރެއިނިންގެ ސްޕެޝަލިސްޓް ޓްރެއިނިން ހަދައި، މާސްޓާސް އިން ހައި ޕާފޯމަންސް އިން ސްޕޯޓްސް ހާސިލްކޮށްފައިވާ ގާސިއާ ބުނީ، އޮޑިން ކުޅުނު ދެ މެޗުން 11 ގޯލު ޖަހައި ކޮޅަށް އެއް ގޯލު ވަނުމަކީ އެ ޓީމުން ރަނގަޅަށް މަސައްކަތް ކުރަމުން އަންނަ ކަމުގެ ނަތީޖާ ކަމަށެވެ. އަދި، އޮޑިން ކޮންމެ މެޗެއްގައި ވެސް ކުޅެން ޖެހޭނީ، އެ ޓީމުގެ އިންޓެންސިޓީ ނުވެއްޓޭ ގޮތަށް ކަމަށެވެ.
"އަހަރެމެން އަދިވެސް ރަނގަޅުކުރަން ޖެހޭ، ރަނގަޅު ނުކޮށްފިއްޔާ އަހަރެމެންނަށް ވެސް އުނދަގޫވާނެ. އަހަރެމެންނަކީ އޮފެންސިވް ޓީމެއް، ޕްރެސް ކޮށްގެން ކުޅޭ ޓީމެއް. އަހަރެމެން ލީގުގައި މެޗުތަކުން ބަލިވެސް ވާނެ، އެކަމަކު ބަލިވާއިރު ވެސް އަހަރެމެންގެ އައިޑެންޓިޓީ ފެންނަން ޖެހޭނެ. ބޯޅަ ކުޅޭ ޓީމަކަށް ވާން އަހަރެން ބޭނުންވަނީ، މި ކްލަބުން މި ސީޒަނުގައި ބޮޑު ކަމެއް އެދިގެން މަސައްކަތް ކުރާއިރު، މަސައްކަތް ކޮށްގެން ކުރިއަށްދާނީ،" ގާސިއާ ބުންޏެވެ.
އޭނާ ބުނީ، އޮޑިން ޓީމެއްގެ ގޮތުގައި މަސައްކަތްކޮށްގެން މޮޅުވުމަށް ކުރާ މަސައްކަތުގައި އެންމެ މުހިންމު ކަމަކީީ، އިދިކޮޅު ޓީމަށް ދޭން ޖެހޭ އިހުތިރާމް ދީގެން މުޅި މެޗުގެ ކޮންސަންޓްރޭޝަން ހިފަހައްޓައިގެން ކުޅުން ކަމަށެވެ. އެ ގޮތުން، ވެލެންސިއާއާ ދެކޮޅަށް ކުޅުނު މެޗުގެ ކޮންޓްރޯލް އެހާ ކުރިން ލިބުނުއިރު ވެސް، މުޅި މެޗަށް ބަލާއިރު ޖުމްލަކޮށް ހުރިހާ ކުޅުންތެރިން ކުރި މަަސައްކަތް ގާސިއާ ވަނީ ފާހަގަކޮށްފަ އެވެ.
