ޔުނައިޓެޑް ވޯލްޑް ކޮލެޖް މޯލްޑިވްސް (ޔޫޑަބްލިއުސީ) އިން ކޮންމެ އަހަރަކު ވެސް ހުޅުވައިލާ ފުރުސަތުގެ ތެރެއިން މި އަހަރު ރާއްޖޭގެ ތިން ދަރިވަރަކަށް ބޭރުގެ ތިން ގައުމަކުން ތައުލީމު ހާސިލު ކުރުމުގެ ފުރުސަތު ފަހިކޮށްދީފި އެވެ.
ޔޫޑަބްލިއުސީގެ މި އަހަރުގެ ސްކޮލަޝިޕްތައް ލިބުނީ ނ. ކުޑަފަރީ ސްކޫލުގެ ދަރިވަރު، އިޒްޔާލާ ބިންތި އަލީ ޝަމީމް އާއި ބްރައިޓްވޭ އިންޓަނޭޝަނަލް ސްކޫލްގެ ދަރިވަރު، ޔަޒާން އަބްދުالله ޔަޒާން ސާއިދު އާއި ތާޖުއްދީން ސްކޫލްގެ ދަރިވަރު، ހައްވާ އިޝްހާ އަށެވެ. އެ ތިން ދަރިވަރުންނަށް ސްކޮލަޝިޕްތައް ހަމަޖެހިފައި ވަނީ އިންޑިއާގެ މަހިންދްރާ ޔުނައިޓެޑް ވޯލްޑް ކޮލެޖާއި ހޮންގްކޮންގުގެ ލީޕޯޗުން ޔުނައިޓެޑް ވޯލްޑް ކޮލެޖާއި ކެނެޑާގެ ޕިއާސަން ޔުނައިޓެޑް ވޯލްޑް ކޮލެޖުންނެވެ.
މި ސްކޮލަޝިޕްތަކުގައި އެ ތިން ދަރިވަރުން ވެސް ފުރިހަމަ ކުރާނީ އިންޓަނޭޝަނަލް ބެކަލޯރިއޭޓް ޑިޕްލޮމާ އެވެ. އިންޓަނޭޝަނަލް ބެކަލޯރިއޭޓް ޑިޕްލޮމާ އަކީ އޭލެވެލްއާ އެއް ފެންވަރުގެ ދެ އަހަރު ދުވަހުގެ ކޯހެކެވެ. އެއީ ދުނިޔޭގެ ބޮޑެތި ޔުނިވާސިޓީތަކުންނާއި ރާއްޖޭގެ ކޮލިފިކޭޝަން އޮތޯރިޓީން ވެސް ގަބޫލު ކުރާ ކޯހެކެވެ.
"މި އަހަރު ޔޫޑަބްލިއުސީ ސްކޮލަޝިޕް ލިބުނު ތިން ކުދިންނަށް ވެސް މި ލިބެނީ އެ ކުދިންގެ މުޅި ހަޔާތް ބަދަލުވެގެންދާނެ ފަދަ ފުރުސަތެއް، މިއަހަރު ހޮވުނު ތިން ކުދިންނަށް ވެސް ތައުލީމީ ގޮތުން ކުރި އެރުމަށާއި ދިވެހިރާއްޖެ މި ކޮލެޖުތަކުގައި ތަމްސީލު ކުރުމަށް ފުރުސަތު ފަހިވާނެ،" ޔޫޑަބްލިއުސީ މޯލްޑިވްސްގެ އެގްޒެކެޓިވް ކޮމިޓީގެ ޗެއާ ޒަހީނާ ރަޝީދު ވިދާޅުވި އެވެ.
ސްކޮލާޝިޕްތަކަށް ދަރިވަރުން ހޮވާފައި ވަނީ އާންމުކޮށް ހުޅުވާލައި އިއުލާނު ކުރުމުން ދަރިވަރުން ހުށަހެޅި އެޕްލިކޭޝަނާއި ދަރިވަރުންގެ ފެންވަރު ވަޒަންކުރުމަށް ބޭއްވި ދެ ދުވަހުގެ ސިލެކްޝަން ކޭމްޕާއި އިންޓަވިއުގެ މައްޗަށް ބިނާކޮށް ކަމަށް ޔޫޑަބްލިއުސީން ބުންޏެވެ.
އެ ޖަމިއްޔާއިން ފަހިކޮށްދިން ފުރުސަތުގައި މިހާރު ވެސް ދިވެހި ތިން ދަރިވަރަކު ރާއްޖެއިން ބޭރުގައި ތައުލީމު ހާސިލު ކުރަމުންދެ އެވެ.
"ޔޫޑަބްލިއުސީގެ އަމާޒަކީ ޒުވާނުންގެ މެދުގައި އުއްމީދު އާކޮށް ހެޔޮ ބަދަލު ގެނައުމުގެ ޖޯޝު އުފެއްދުން. މި ކުދިން ތައުލީމު ހާސިލުކޮށް ނިމިގެން ދިވެހިރާއްޖެއަށް ހިދުމަތް ކުރުމަށް އަނބުރާ އަންނާނެކަމަށް އުއްމީދު ކުރަން،" ޒަހީނާ ވިދާޅުވި އެވެ.
ޔުނައިޓެޑް ވޯލްޑް ކޮލެޖުތަކަކީ ދުނިޔޭގެ ހަމަޖެހުމަށާއި އެއްބަޔަކު އަނެއްބަޔަކާއެކު ސުލްހަވެރިކަމާއެކު ދިރިއުޅުމަށް ބާރު އެޅުމަށް މަތީ ސާނަވީ އުމުރުގެ ޒުވާނުންނަށް ހާއްސަކޮށްގެން 1963 ވަނަ އަހަރުން ފެށިގެން އުފެއްދި ސްކޫލްތަކެކެވެ. މިއަދު ދުނިޔޭގެ 18 ގައުމެއްގައި ޔުނައިޓެޑް ވޯލްޑް ކޮލެޖުތައް ހުރެ އެވެ. އެ ކޮލެޖުތަކަކީ ބައިނަލްއަގުވާމީ ފެންވަރުގަ އާއި ޔުނިވާސިޓީތަކުން ވެސް އިތުބާރުކުރާ މަތީ ފެންވަރުގެ ތަންތަނެވެ.
ޔޫޑަބްލިއުސީ މޯލްޑިވްސްއަކީ 2001 ވަނަ އަހަރުން ފެށިގެން ރެޖިސްޓްރީ ކޮށްގެން ހިންގާ މަދަނީ ޖަމިއްޔާއެކެވެ. އަލިފުޅުތުއްތު ފައުންޑޭޝަންގެ ހިލޭ އެހީގައި އެ ޖަމިއްޔާގެ ސްކޮލަޝިޕްތައް ރާއްޖޭގެ 67 ދަރިވަރަކު މިހައިތަނަށް ފުރިހަމަ ކޮށްފައިވެ އެވެ.
