ރައީސް މުހައްމަދު މުއިއްޒު ތ. އަތޮޅަށް ކުރައްވަމުން ގެންދަވާ ދަތުރުގައި، އެ އަތޮޅު ވިލުފުށީ އެއާޕޯޓުގެ މަޝްރޫއު މިއަދު އަލުން ފެށުމަށް އަދި ހޮސްޕިޓަލްގެ ބިންގާ އަލުން އެޅުމަށް ނިންމާފައި ވާއިރު، އެ ދެ މަޝްރޫއުގެ ޝުކުރު ކައުންސިލުގެ ރައީސް ކުރީގެ ސަރުކާރަށް ރައްދު ކޮށްފި އެވެ.
ރައީސް މުއިއްޒު ވިލުފުށީ ރައްޔިތުންނާ ބައްދަލުކުރަން ރޭ ބޭއްވި ޖަލްސާގައި، ވިލުފުށީ ކައުންސިލްގެ ރައީސް ހުސައިން ޖަބީން ވިދާޅުވީ ރައީސްގެ މި ދަތުރުގައި ވިލުފުއްޓާއި ވިލުފުށީ ދާއިރާގެ ކުރިއެރުމާއި މުސްތަގުބަލަށް އިސްކަން ދެއްވައި މި ދެ މަޝްރޫއު އަލުން ފައްޓަވައި ދެއްވާ ކަމަށްޓަކައި މި ސަރުކާރަށް ޝުކުރު އަދާކުރައްވާ ކަމަށެވެ.
ނަމަވެސް، މިއީ ރައީސް އިބްރާހިމް މުހައްމަދު ސޯލިހު ސަރުކާރުގެ ތަސައްވުރެއް ކަމަށް އޭނާ ފާހަގަ ކުރެއްވި އެވެ.
ވިލުފުށީ ކައުންސިލްގެ ރައީސް ޖަބީން. -- ފޮޓޯ: ރައީސް އޮފީސް
އެ ދެ މަޝްރޫއު ހަގީގަތަކަށް ހެދުމަށް ކުރީ ސަރުކާރުން އަދި ރައްޔިތުންގެ މަޖިލީހުގެ ކުރީގެ މެންބަރު ހަސަން އަފީފު ބުރަ މަސައްކަތްތަކެއް ކުރެއްވިކަން އެނގި ހުރެ، އެކަން ފާހަގަ ނުކުރުމަކީ ވެވޭނެ އިހުމާލެއް ކަމަށް ޖަބީން ވިދާޅުވި އެވެ.
"މި ތަސައްވަރު އަޅުގަނޑުމެންނާ ހަމައަށް ގެނެސްދެވި ކުރީގެ އަޅުގަނޑުމެންގެ އިއްޒަތްތެރި މެންބަރު އޮނަރަބުލް ހަސަން އަފީފު އަށާއި ކުރީގެ ރައީސުލްޖުމްހޫރިއްޔާ އޮނަރަބުލް އަލްފާޟިލް އިބްރާހިމް މުހައްމަދު ސޯލިހު އަށް އަޅުގަނޑުމެންގެ ރަށުގެ ރައްޔިތުންގެ ނަމުގައި އަދި އަޅުގަނޑުގެ ނަމުގައި ވަރަށް އިހުލާސްތެރިކަމާއެކު ޝުކުރު ދަންނަވަން،" ރައީސް މުއިއްޒު އާއި މި ސަރުކާރުގެ ބައެއް މިނިސްޓަރުން ބައިވެރިވެވަޑައިގެންނެވި ޖަލްސާގައި ޖަބީން ވިދާޅުވި އެވެ.
ވިލުފުށީގެ އުއްމީދަކީ ހަމައެކަނި އެއާޕޯޓެއް ނޫން ކަމަށާއި ފަތުރުވެރިކަމަށް ރަށްތައް ފިނޮޅުތައް ތަރައްގީވާން ޖެހޭ ކަމަށް ވެސް އޭނާ ވިދާޅުވި އެވެ.
"ދިވެހިރާއްޖޭގެ ފަތުރުވެރިކަމަށް ބައި ގަރުނު ވެގެން ދިޔައިރު މި އަތޮޅުގައި މި އޮތީ އެންމެ ރިސޯޓެއް،" އޭނާ ވިދާޅުވި އެވެ.
"އަޅުގަނޑުމެންގެ ދާއިރާގައި ވަރަށް ރީތި ރަށްތައް އެބަ ހުރި. އޭގެ ތެރެއިން އެންމެ ރަނގަޅު ގިނަ ރަށްތައް ހުރީ މީގެ 20 އަހަރު ކުރިން ދޫކުރެވި އެއްވެސް ކަމެއް ނުކުރެވި. އެއީ ވަރަށް ބޮޑު ނިކަމެތި ކަމެއް އަޅުގަނޑުމެންނަށް ލިބިފައި އޮތް."
ވިލުފުށީ އެއާޕޯޓުގެ ބިން ހިއްކުމަށް މިއަދު ފަށާއިރު ކޮންނަ ބޯޓެއް ނެތެވެ. ރައީސް ސޯލިހުގެ ވެރިކަމުގައި ވެސް އެ އެއާޕޯޓު ހިއްކުމުގެ މަސައްކަތް ފެށުމަށް ތައްޔާރުވި އެވެ.
ވިލުފުށީ އެއާޕޯޓު 30 މަސް ދުވަހުގެ ތެރޭގައި އަދި ހޮސްޕިޓަލް 18 މަސް ދުވަހުގެ ތެރޭގައި ނިންމާނެ ކަމަށް ރައީސް މުއިއްޒު ރޭ ވިދާޅުވި އެވެ.
