މެންޗެސްޓާ (ސެޕްޓެމްބަރު 10) - މެންޗެސްޓާ ސިޓީ އަށް ކުޅޭ މިސްރުގެ ފޯވާޑް، އޮމަރު މާމޫޝް އަށް އަނިޔާވެ ކުޅުމާ ދުރުގައި ހުންނަން ޖެހިއްޖެ އެވެ.
ޖެނުއަރީ ޓްރާންސްފާ މާކެޓްގައި، އައިންޓްރަކްޓް ފްރޭންކްފާޓް ދޫކޮށް، 65 މިލިއަން ޑޮލަރަށް ސިޓީ އަށް ސޮއިކުރި މާމޫޝް، 26، ގެ ކަކުލަށް އަނިޔާވީ، އެންމެ ފަހުން މިސްރުން ވޯލްޑް ކަޕް ކޮލިފައިންގައި ކުޅުނު މެޗުގަ އެވެ. އެ މެޗުގައި ލިބުނު އަނިޔާއާ ހެދި، ކަންކަން ސާފުކުރުމަށް ހެދި ފުރަތަމަ ޓެސްޓްތަކުން އެނގުނު ގޮތުގައި، މާމޫޝްގެ ކަކުލަށް ވަނީ އަނިޔާވެފަ އެވެ.
ސިޓީން ބުނެފައިވަނީ، މި ހަފްތާގެ އާދިއްތަ ދުވަހު، މެންޗެސްޓާ ޔުނައިޓެޑާ ދެކޮޅަށް ކުޅޭ މެޗު މާމޫޝް އަށް ގެއްލޭނެ ކަމަށެވެ.
ސިޓީ އަށް 28 މެޗުން އަށް ގޯލު ޖަހައިދީފައިވާ، މާމޫޝް، އަނިޔާގައި ހޭދަކުރަން ޖެހޭ މުއްދަތެއް ޔަގީންވާނީ ކުރިއަށް އޮތް ދުވަސްތަކުގައި އިތުރު ޓެސްޓްތަކެއް ހެދުމުން ކަމަށް ވެސް ސިޓީން ވަނީ ބުނެފަ އެވެ.
މި ސީޒަނުގައި ސިޓީގެ މެޗެއްގެ ތެރެއިން މާމޫޝް (ކ) އާއި ޗާކީ: ދެ ކުޅުންތެރިން ވެސް މި ވަގުތު ތިބީ އަނިޔާގައި.
މިސްރުގެ މީޑިއާތަކުން ރިޕޯޓްކުރާ ގޮތުގައި، މާމޫޝް މަދުވެގެން މަހެއްހާ ދުވަހު ކުޅުމާ ދުރުގައި ހުންނަން ޖެހޭނެ އެވެ. އެހެންކަމުން މިއީ، ސީޒަން އުނދަގޫކޮށް ފަށަން ޖެހުނު ސިޓީ އަށް އުނދަގޫތަކެއް ކުރިމަތިވާނެ ކަމެކެވެ.
މި ފަހަރުގެ ޓްރާންސްފާގައި، ލިޔޯން ދޫކޮށް، 35 މިލިއަން ޑޮލަރުގެ ޑީލެއްގައި ސިޓީ އަށް ބަދަލުވި ފްރާންސްގެ ރަޔާން ޗާކީ އަށް އަނިޔާވެ، އޭނާ ވެސް ހުރީ ދެ މަހެއްހާ ދުވަހުގެ މުއްދަތަށް ކުޅުމާ ދުރުގަ އެވެ.
ޗާކީގެ ފަލަމަސްގަނޑަށް އަނިޔާވެގެން ކުޅުމާ ދުރުގައި ހުންނަން ޖެހި، މުހިންމު މެޗުތަކެއް ގެއްލޭއިރު، ސިޓީން ވަނީ ޓްރާންސްފާ ފަހު ދުވަހު، ހިލޭ ޓްރާންސްފާއެއްގައި އިލްކާއި ގުންޑޮގާން، ގަލަތަސަރާއި އަށް ދޫކޮށްލައިފަ އެވެ.
ޕްރިމިއާ ލީގުގެ މި ސީޒަނުގައި މިހާތަނަށް ސިޓީން ކުޅުނު ތިން މެޗުގެ ތެރެއިން، އެންމެ ފަހުން ކުޅުނު ދެ މެޗުން ވެސް ވަނީ ބަލިވެފަ އެވެ.
