މިއުނިކް (ސެޕްޓެމްބަރު 10) - މި ފަހަރުގެ ޓްރާންސްފާ މާކެޓްގައި ބަޔާން މިއުނިކުން ލޯން އެއްބަސްވުމެއްގެ ދަށުން ގެނައި، ސެނެގާލްގެ ފޯވާޑް، ނިކޮލަސް ޖެކްސަން، ބަޔާނަށް މެޗެއް ނުކުޅެނިސް، އޭނާ އަށް އެ ކްލަބުން ދާއިމީ ކޮންޓްރެކްޓެއް ނުލިބޭނެ ކަމަށް ބުނެފި އެވެ.
ޓްރާންސްފާގެ ފަހު ދުވަހުގައި ބަޔާނާއި ޗެލްސީން ޖެކްސަން، 24، ގެ ޓްރާންސްފާގެ މަޝްވަރާތައް އަލުން ފަށައި، އެ ޑީލް ނިންމީ ކުރިން ވެސް އެއްބަސްވެވުނު ގޮތަށް ބަޔާނުން 15 މިލިއަން ޑޮލަރުގެ ލޯން ފީއެއް ދައްކާ ގޮތަށެވެ. އަދި، ލޯން ނިމުމުން ޖެކްސަން، 80 މިިލިއަން ޑޮލަަރަށް ގަންނަން ވަނީ އެއްބަސްވެފަ އެވެ. އެއީ، ލޯންގައި ހުންނަ މުއްދަތުގެ ތެރޭގައި، ޖެކްސަން ވަކި އަދަދަަކަށް މެޗު ކުޅެ، ޓާގެޓްތަކެއް ހާސިލްކޮށްފިނަަަމަ އެވެ.
ބަޔާންގެ ޗީފް އުލީ ހޮއެނެސް ވިދާޅުވީ، ޖެކްސަންގެ ޑީލުގައި، އޭނާގެ އޭޖެންޓްގެ ފަރާތުން ވެސް ލޯން ފީގެ ބައެއް ހިއްސާކުރާ ކަމަށެވެ. އެހެންކަމުން، ޖުމްލަ ލޯން ފީގައި ވަކި ކަންކަމަށް ދައްކާ ފައިސާ ވެސް އެބަހުރި ކަމަށެވެ.
ހޮއެނެސް ވަނީ ޖެކްސަން، ބަޔާންގެ 40 މެޗުގައި ކުޅެގެން ނޫން ގޮތަކަށް އޭނާ އަށް ބަޔާނުން ދާއިމީ އެއްބަސްވުމެއް ނުލިބޭނެ ކަމަށެވެ. އަދި، ހެރީ ކޭންގެ ބެކަޕެއްގެ ގޮތުގައި ގެނައި ޖެކްސަން އަށް ބަޔާނުގައި، 40 މެޗުގައި ފުރަތަމަ އެގާރައިގައި ނުކުޅެވޭނެ ކަމަށް ވެސް ހޮއެނެސް ވިދާޅުވި އެވެ.
ބަޔާނުން ކޮންޓްރެކްޓެއްގެ މުހިންމު މައުލޫމާތުތަކެއް މީޑިއާގައި އެ ގޮތަށް ހިއްސާކުރުމުން، ޖެކްސަންގެ އޭޖެންޓް، ޑިއޮމަންސީ ކަމަރާ ވަނީ ހިތްހަމަނުޖެހުން ފާޅުކޮށްފަ އެވެ.
މީގެ އެއް އަހަރު ކުރިން، ވިޔަރެއާލަށް 40 މިލިއަން ޑޮލަރު ދީފައި، ޗެލްސީން ގަތް ޖެކްސަން، އަށް އެކަށީގެންވާ ވަރުގެ ކުރިއެރުމެއް އެ ޓީމާ އެކު ހޯދިފައިނުވެ އެވެ. ޖެކްސަންއާ އެކު، ޗެލްސީން މިދިޔަ ސެޕްޓެމްބަރު މަހު ސޮއިިކުރި ނުވަ އަހަރުގެ ކޮންޓްރެކްޓް ހަމަވާނީ 2033 ވަނަ އަހަރު އެވެ. ޗެލްސީއާ އެކު، ޖެކްސަން ކުޅުނު ފުރަތަަމަ ސީޒަނުގައި، 35 މެޗުން 14 ގޯލު ޖަހައި، ފަސް ލަނޑު ޖަހަން ފުރުސަތު ހޯދައިދިންއިރު، ދެ ވަނަ ސީޒަނުގައި، 30 މެޗުން ޖެހުނީ 10 ގޯލެވެ. އަދި، ފަސް ލަނޑު ޖަހަން ފުރުސަތު ހޯދައިިދިނެވެ.
