ލަންޑަން (ސެޕްޓެމްބަރު 2) - އިނގިރޭސި ޗެމްޕިއަން، ލިވަޕޫލުން ޓްރާންސްފާ މާކެޓްގެ ފަހު ދުވަހު، ނިއުކާސަލް ޔުނައިޓެޑްގެ ފޯވާޑް، އަލެކްސަންޑަ އިސާކްގެ ސޮއި ހޯދި ނަމަވެސް، ކްރިސްޓަލް ޕެލަސްގެ ކެޕްޓަން، މާކް ގޭހީ ގެންނަން ކުރި މަސައްކަތް ނާކާމިޔާބުވެއްޖެ އެވެ.
ނިއުކާސަލް ޔުނައިޓެޑުން އެންމެ ފަހުން ގޮތް ދޫކޮށް އެ ކްލަބަށް ކުޅެމުން އަންނަ ސްވިޑެންގެ ފޯވާޑް، އިސާކް، 25، ލިވަޕޫލަށް ވިއްކާލަން ނިންމީ އެވެ. އިނގިރޭސި އެންމެ އަގުބޮޑު ޓްރާންސްފާގެ ގޮތުގައި އިސާކް ލިވަޕޫލަށް ގެނައި ޑީލަށް ޖުމްލަ އެކު، ލިވަޕޫލުން 175 މިލިއަން ޑޮލަރު ދައްކާނެ އެވެ. އޭނާ ލިވަޕޫލާ ގުޅުނީ ހަ އަހަރުގެ ކޮންޓްރެކްޓެއްގަ އެވެ.
ލިވަޕޫލުން ރޭ ވަނީ 47 މިލިއަން ޑޮލަރުގެ ޑީލެއްގައި ގޭހީ ގަންނަން ޕެލަސްއާ އެކު އެއްބަސްވުމަކަށް އަތުވެފަ އެވެ. މި ސީޒަނުގެ ނިޔަލަށް ޕެލަސްގެ ކޮންޓްރެކްޓްގައި ހުރި ގޭހީ ވަނީ ލަންޑަންގައި ލިވަޕޫލްގެ މެޑިކަލްގެ ކަންކަން ވެސް ފުރިހަމަކޮށްފަ އެވެ. އެކަމަކު، ޕެލަސް އަށް ދެ ޑިފެންޑަރުންގެ ސޮއި ނުލިބެނިސް ގޭހީ ދޫކޮށްނުލަން އެ ކްލަބުން ނިންމާފައި އޮތް ނިންމުމަށް އަމަލުކޮށް، ފަހު ވަގުތު ގޭހީގެ ޓްރާންސްފާ ހުއްޓުވީ އެވެ.
ޕެލަސް އިން ވަނީ ޓުލޫސްގެ ޑިފެންޑަރު، ޖޭޑީ ކޮންވޮޓް ހަތަރު އަހަރުގެ ޑީލެއްގައި ގަނެފަ އެވެ. އަދި، ގެޓަފޭގެ ކްރިސްޓަންޓަން އޫޗޭ ވަނީ ލޯނަކަށް ޕެލަސްއާ ގުޅިފަ އެވެ. ޕެލަސް އިން ގޭހީ ދޫކޮށްލަން ބެލީ ބްރައިޓަންގެ އީގޯ ޖޫލިއޯގެ ސޮއި ހޯދުމަށް ފަހު އެވެ. އެކަމަކު، ފަހު ވަގުތު ޖޫލިއޯ ބަދަލުވީ ވެސްޓް ހޭމް އަށެވެ.
ޖެނުއަރީ ޓްރާންސްފާގެ ތެރޭގައި ލިވަޕޫލުން އަނެއްކާ ވެސް ގޭހީ ގެންނަން މަސައްކަތް ކުރާނެ ކަމަށް ބެލެވޭއިރު، ހާލަތަށް ބަލައިފައި، މި ސީޒަން ނިމުމުން ހިލޭ ޓްރާންސްފާއެއްގައި ގޭހީ ގެންނަން ލިވަޕޫލުން މަޑުކުރުމުގެ ފުރުސަތު ވެސް އެބައޮތެވެ.
ލިވަޕޫލުން ވަނީ މި ފަހަރުގެ ޓްރާންސްފާގައި ކުޅުންތެރިން ގަންނަން 563 މިލިއަން ޑޮލަރު ހަރަދުކޮށްފަ އެވެ.
