ބާސެލޯނާ (ސެޕްޓެމްބަރު 1) - ސްޕެނިޝް ލީގުގައި ރޭ ރަޔޯ ވަޔެކާނޯ އިން 1-1 އިން ބާސެލޯނާއާ އެއްވަރުކޮށް، އެ ޓީމު މޮޅުވިޔަ ނުދީ ހިފަހައްޓައިފި އެވެ.
ރަށުންބޭރުގައި ކުޅުނު ބާސެލޯނާ އިން ރޭގެ މެޗުގެ ފުރަތަމަ ހާފު ނިންމާލީ ލީޑުގައި އޮވެ އެވެ. ބާސެލޯނާ އަށް މި މެޗުގެ 40 ވަނަ މިނިޓްގައި ޕެނަލްޓީ އަކުން ލީޑުނަގައިިދިނީ ލަމީން ޔަމާލް އެވެ. މިއީ، ވަޔެކާނޯ އޭރިއާތެރެއިން ޔަމާލް އަށް ކުރި ފައުލަަކަށް ދިން ޕެނަލްޓީ އެކެވެ.
ރޭގެ މެޗުގެ ތެރެއިން ވީޑިއޯ އެސިސްޓަންޓް ރެފްރީ (ވީއޭއާރް)ގެ މައްސަލަ ޖެހި ބައެއް ވަގުތުތަކުގައި އޭގެ އެހީތެރިކަން ނުހޯދި މައްސަލަތަކެއް ކުރިމަތިވި އެވެ.
ބާސެލޯނާ އިން ރަފީނިއާގެ ބަދަލުގައި ދެ ވަނަ ހާފުގައި މާކަސް ރެޝްފޯޑް ކުޅެން އަރުވައިގެން ވެސް ގޯލެއް ޖެހޭތޯ މަސައްކަތްކުރި އެވެ. އެކަމަކު، ދެ ވަނަ ލަނޑެއް ޖަހަން ބާސެލޯނާ އިން ކުރި މަސައްކަތް ކާމިޔާބުނުވިއިރު، ރަޔޯ ވަޔެކާނޯ އިން ވަނީ މެޗުގެ 67 ވަނަ މިނިޓްގައި ލަނޑު ޖަހައި އެއްވަރުކޮށްފަ އެވެ. މި ލަނޑު އެ ޓީމަށް ޖަހައިދިނީ، ވޮލީ އަކުން، ފްރަން ޕެރޭޒް އެވެ.
އޭގެ ފަހުން، މެޗުން މޮޅުވާން ރަޔޯ ވަޔެކާނޯ އިން ރަނގަޅު އެޓޭކްތަކެއް ކުރި އެވެ. އެ ގޮތުން، އެ ޓީމުން ޖެހި އެއް ގޯލު އޮފްސައިޑް ކަމަށް ނިންމިއިރު، ބާސެލޯނާގެ ގޯލު ބެލެހެއްޓި ޔޮއާން ގާސިއާ ވަނީ ދެ ހަމަލާއެއް ހުއްޓުވައިފަ އެވެ.
މި ނަތީޖާއާ އެކު ބާސެލޯނާ އޮތީ ލީގުގެ ހަތަރު ވަނައިގަ އެވެ. އެއީ ތިން މެޗުން ހަތް ޕޮއިންޓާ އެކު އެވެ. އެއް ވަނައިގައި އޮތް ރެއާލް މެޑްރިޑާއި ދެ ވަނައިގައި އޮތް އެތުލެޓިކް ބިލްބާއޯ އަށް ނުވަ ޕޮއިންޓް ލިބިފައިވާއިރު، ވިޔަރެއާލް ތިން ވަނައިގައި އޮތީ ހަތް ޕޮއިންޓާ އެކު އެވެ.
