ލަންޑަން (އޮގަސްޓް 29) - މެންޗެސްޓާ ޔުނައިޓެޑަށް ކުޅެމުން އަންނަ އާޖެންޓީނާ ފޯވާޑް، އަލެހަންދްރޯ ގާނާޗޯ، ޗެލްސީ އަށް ވިއްކާލަން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ގާނާޗޯ، 21، ޔޫތު ކެރިއަރު ހޭދަކުރީ، ސްޕެއިނުގެ ދެ ކްލަބް ކަމަށްވާ ގެޓަފޭ އާއި އެތުލެޓިކޯ މެޑްރިޑްގެ އިތުރުން މެންޗެސްޓާ ޔުނައިޓެޑްގަ އެވެ.
މީގެ ތިން އަހަރު ކުރިން ޔުނައިޓެޑުގެ ސީނިއާ ޓީމުން ފުރުސަތު ހޯދަން ފެށި ގާނާޗޯ އަށް އެ ކްލަބްގައި ކުރިއަށްދިއުމުގެ ފުރުސަތު ގެއްލުނީ، ޔޫރޮޕާ ލީގުގެ ފައިނަލް މެޗަށް ފަހު، ޔުނައިޓެޑްގެ ކޯޗު، ރުބެން އަމޮރިމް ދެއްކި ވާހަކަ އަށް ރައްދުދިނުމުން އުފެދުނު ހިޔާލުތަފާތުވުންތަކެއްގެ ސަބަބުންނެވެ.
ޔުނައިޓެޑަށް ކުޅުނު 144 މެޗުން ގާނާޗޯ ވަނީ 26 ގޯލު ޖަހައި، 22 ގޯލު ޖަހަން ފުރުސަތު ތަނަވަސްކޮށްދީފަ އެވެ.
އެންމެ ފުރަތަމަ ޔުނައިޓެޑުން ނިންމީ، ގާނާޗޯ، އިނގިރޭސި ކްލަބަކަށް ވިއްކައިނުލުމަށެވެ. އެ ގޮތުން، ޔޫރަޕްގެ ވަރުގަދަ ފަސް ލީގުގެ އެކި ކްލަބްތަކާ އެކު، ޔުނައިޓެޑުން ގާނާޗޯގެ ޑީލުގެ މަޝްވަރާތަކެއް ފާއިތުވި ހަފްތާތަކުގައި ކުރި އެވެ، އެކަމަކު، އޭގެއިން އެއްވެސް ކަމެއް ކުރިއަށްނުދިޔަ މައިގަނޑު ސަބަބަކީ، ގާނާޗޯ ނިންމާފައި އޮތީ އިނގިރޭސި ކްލަބަަކަށް ބަދަލުވާން ކަމަށްވާތީ އެވެ. އަދި، ގާނާޗޯ އިހުތިޔާރުކޮށްފައި އޮތީ ޗެލްސީ އަށް ބަދަލުވާން ކަމަށްވުމެވެ.
މީޑިއާ ރިޕޯޓްތައް ބުނާގޮތުން، ޗެލްސީން ގާނާޗޯ ގަންނަން ހުށަހެޅި 48 މިލިއަން ޑޮލަރުގެ ބިޑަށް ޔުނައިޓެޑުން ވަނީ އެއްބަސްވެފަ އެވެ. ރިޕޯޓްތައް ބުނާގޮތުން، އެ އަގު ދީފައި، ޗެލްސީން ގާނާޗޯ ގެންނަން ނިންމީ، އެ ޓީމުން ހޯދަން މަސައްކަތްކުރީ އާރްބީ ލައިޕްޒިގުގެ ޒަވީ ސިމޯންސް، 70 މިލިއަން ޑޮލަރަށް ޓޮޓެންހަމް ހޮޓްސްޕާސް އަށް ދިއުމުގެ ފުރުސަތު ބޮޑުވުމެވެ.
