ހދ. ގެ އަތޮޅުތަކަށް ރައީސް މުހައްމަދު މުއިއްޒު ކުރައްވަމުން ގެންދަވާ ދަތުރުގެ ތެރެއިން، އެ އަތޮޅު ކުމުންދޫއަށް ވަޑައިގަތުމުން މީޑިއާ ނެތިކޮށްލަން ހުށަހަޅާފައިވާ ބިލާ ދެކޮޅަށް އިހުތިޖާޖު ކުރަމުން މަރުހަބާ ދަންނަވައިފި އެވެ.
މީޑިއާ ބިލާ ދެކޮޅަށް އިހުތިޖާޖު ކުރަމުން މުއިއްޒަށް މަރުހަބާ ދެންނެވީ އެކްޓިވިސްޓު ޝަމްއޫން ޖަލީލް (ލޫކަސް ޖަލީލް) އެވެ. މުއިއްޒުއާ ސަލާމް ކުރަން ހަދާފައި ހުރި ސަފުގައި ލޫކަސް ހުރީ އަނގަމަތީގައި ޓޭޕެއް އަޅައި، ޝުއޫރު ފާޅުކޮށްފައިވާ ބޯޑެއް ހިފައިގެންނެވެ.
"މާލޭގަ އަޑު އުފުލަމުންދާ ނޫސްވެރިންގެ އިހުތިޖާޖުގައި އަޅުގަނޑު ހދ. ކުމުންދޫން ބައިވެރިވެއްޖެއިން،" އެ މަންޒަރުގެ ވީޑިއޯއަކާއެކު އެކްސްގައި ކުރި ޕޯސްޓެއްގައި ލޫކަސް ބުންޏެވެ.
މީޑިއާ ނެތިކޮށްލާ ބިލުގެ ބަހުސް މިއަދު މަޖިލީހުގައި ކުރިއަށްދާތީ ނޫސްވެރިން ދަނީ މަޖިލިސް ކައިރީގައި މުޒާހަރާ ކުރަމުންނެވެ. ނޫސްވެރިން ތިބީ މީޑިއާ ނެތިކޮށްލަން ހުށަހަޅާފައިވާ ބިލާމެދު ދެކޭ ގޮތް ހާމަކޮށް ބޯޑުތަކެއް ހިފައިގެންނެވެ. އަދި މަޖިލިސް ކައިރީގައި ތިބެގެން ނޫސްވެރިން ދަނީ ބިލާމެދު ދެކޭ ގޮތް ހާމަކޮށް، މީޑިއާއާ ވާހަކަ ދައްކަމުންނެވެ.
މީޑިއާ ނެތިކޮށްލާ ބިލަށް ބަހުސް ކުރައްވަމުން އިދިކޮޅު އެމްޑީޕީގެ ޕީޖީ ގްރޫޕުގެ ލީޑަރު އިބްރާހިމް ނާޒިލް ވަނީ އެ ބިލަށް ވަރަށް ބޮޑަށް ފާޑުވިދާޅުވެފަ އެވެ.
"[މި ކޮމިޝަނުގައި] ތިބޭ ހަތް މެންބަރުންގެ ތެރެއިން ތިން މެންބަރުންނަކީ ރައީސުލްޖުމްހޫރިއްޔާ އައްޔަން ކުރައްވާ މެންބަރުން. ހަތަރު މެންބަރުން [އައްޔަން ކުރަން] މި އޮތީ މީޑިއާތަކަށް ފުރުސަތު ދީފަ. މީޑިއާތަކުގެ ކޮންޓްރޯލް އެއިރުން އޮންނާނީ ރައީސުލްޖުމްހޫރިއްޔާގެ އަތުގައި. މި ހަތް މެންބަރުންނަކީ ރައީސުލްޖުމްހޫރިއްޔާގެ އޮފީހުގެ ކުޑަ ގޮޅިއެއްގައި ތިބޭ މެންބަރުންނަށް ވާނީ،" އޭނާ ވިދާޅުވި އެވެ.
ނާޒިލްގެ އިތުރުން މިއަދުގެ ޖަލްސާގައި ވާހަކަ ދައްކަވަމުން ވެލިދޫ ދާއިރާގެ މެންބަރު މުހައްމަދު އައްބާސް ވެސް ވަނީ އެ ބިލަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ، ބިލު ފަރުމާކޮށްފައި އޮތް ގޮތުން ބިލުގެ މައިގަނޑު ބޭނުމެއް ކަމަށް ފެންނަނީ ސަރުކާރުގެ ވައްކަންތައް ފޮރުވައި ހުދުމުހުތާރު ވެރިކަމަށް ޖާގަ ދިނުން ކަމަށެވެ.
"ދައުލަތުގެ މުއައްސަސާތަކުން ވައްކަން ކުރީމަ އެކަންތައް ހޯދާ ބަލައި މީޑިއާތަކުގައި ލިޔަން ތިބި ބޭފުޅުންގެ ހަތަރެސްފައި ބަންދުކޮށް ކަސްތޮޅު އަޅައި އެބޭފުޅުން ޖަލަށްލައި، އެބޭފުޅުންނަށް އަދަބު ދީ، ސަރުކާރު ނުރުހޭ ކޮންމެ މީޑިއާއެއް މާލީ ގޮތުން ދަތިކޮށް ޖެއްސުންކޮށް ބަންދުކޮށް ހުދުމުހުތާރު ވެރިކަމަކަށް ޖާގަ ދިނުމަށް ހުށަހަޅާފައި އޮތް ބިލެއް މިއީ އިއްޒަތްތެރި ރައީސް،" އައްބާސް ވިދާޅުވި އެވެ.
މީޑިއާ ނެތިކޮށްލާ ބިލު ފަރުމާކޮށްފައި އޮތީ މިނިވަންކަމާއެކު ނޫސްވެރިކަން ކުރެވޭނެ މަގު ބަންދު ކުރެވޭނެ ގޮތަށެވެ. އެ ބިލުގެ ދަށުން ކޮމިޝަނެއް އުފައްދައި، އެ ކޮމިޝަނުގެ ބާރު ރައީސް މުހައްމަދު މުއިއްޒަށް ނެގޭނެ މަގު ވެސް ބިލުން ފަހިވެ އެވެ.
އެ ބިލު ބޭރުކޮށްލުމަށް ރާއްޖޭގެ ނޫސްވެރިންނާއި ހައްގުތަކަށް ވަކާލާތު ކުރާ ބޭރުގެ ވަރަށް ގިނަ ޖަމިއްޔާތަކުން ވެސް ދަނީ ގޮވާލަމުންނެވެ. އެކަމަކު، ސަރުކާރުން މިހާތަނަށް އެކަންކަމަށް ޖަވާބެއް ނުދެ އެވެ. ގިނަ ބަޔަކު ބުނަނީ، މިއީ އެފަދަ ބިލެއް ހުށަހެޅި ދެ ވަނަ ފަހަރު ކަމުން މި ފަހަރު އެ ބިލު ފާސް ކުރާނެ ކަމަށެވެ.
ރައްޔިތުންގެ މަޖިލީހަށް އެ ބިލު ހުށަހެޅި ފަހުން، މުއިއްޒު ގެންދަވަނީ މީޑިއާއާ ގުޅޭ ގޮތުން ދޮގު ފަތުރައި، ހަގީގަތް އޮޅޭ ގޮތަށް ވާހަކަ ދައްކަވަމުންނެވެ. ގައުމީ ދުވަހުގެ މުނާސަބަތުގައި މިއަދު ބޭއްވި ޖަލްސާގައި މުއިއްޒު ވަނީ އެމަނިކުފާނުގެ ރުޅިވެރިކަން މީޑިއާތަކަށް އަމާޒުކޮށްފަ އެވެ.
"މި ހޯލު ތެރޭގަ މި ތިބީ އެންމެން. މިސާލެއްގެ ގޮތުގަ މިކަމާ ބެހޭ ގޮތުން އެއްޗެއް ދަންނަވާލާނަން. ތީގެ ތެރެއިން ބޭފުޅަކު ތިމަންނަގެ ހިޔާލުފާޅުކުރުމުގެ މިނިވަންކަމޭ މިތާ ތެދުވެ އިއުލާނުކޮށްލަންވީ މިތާ ބޮމެއް އެބަ އޮތޭ. [އެހެން] ކިޔާފަ ހަޅޭލަވައިލައްވަންވީ. އެއީ މިނިވަންކަންތޯ. ދެން އެހެން މީހުންގެ ހައްގުތަކަށް އެ ހިސާބުން ވާނީ ކިހިނެއްތޯ،" މުއިއްޒު ވިދާޅުވި އެވެ.
