ލަންޑަން (އޮގަސްޓް 27) - ބަޔާން މިއުނިކްގެ ފޯވާޑް ލައިން ލީޑުކުރަމުން އަންނަ އިނގިރޭސި ތަރި، ހެރީ ކޭންގެ ބެކަޕް އަކަށް ޗެލްސީގެ ފޯވާޑް ނިކޮލަސް ޖެކްސަން ގެންދަން ބަޔާނުން މަޝްވަރާ ކުރަމުން އެބަދެ އެވެ.
ޖަަރުމަނާއި އިނގިރޭސި މީޑިއާ ރިޕޯޓްތައް ބުނާގޮތުން، މިދިޔަ ދެ ދުވަހު، ޗެލްސީ އާއި ބަޔާންގެ އޮފިޝަލުން ވަނީ ލަންޑަންގައި، ޖެކްސަންގެ ޑީލްގެ މަޝްވަރާތައް ފަށައިފަ އެވެ. އަދި، ވަރަށް އަވަހަށް ދެ ފަރާތަށް އެއްބަސްވުމަކަށް އާދެވި، ޖެކްސަންގެ ޓްރާންސްފާ ހިނގާނެ ކަމަށް ބެލެވެ އެވެ.
މީގެ އެއް އަހަރު ކުރިން، ވިޔަރެއާލަށް 40 މިލިއަން ޑޮލަރު ދީފައި، ޗެލްސީން ގަތް ޖެކްސަން، 24، އަށް އެކަށީގެންވާ ވަރުގެ ކުރިއެރުމެއް އެ ޓީމާ އެކު ހޯދިފައިނުވެ އެވެ.
ޖެކްސަންއާ އެކު، ޗެލްސީން މިދިޔަ ސެޕްޓެމްބަރު މަހު ސޮއިިކުރި ނުވަ އަހަރުގެ ކޮންޓްރެކްޓް ހަމަވާނީ 2033 ވަނަ އަހަރު އެވެ. ޗެލްސީއާ އެކު، ޖެކްސަން ކުޅުނު ފުރަތަަމަ ސީޒަނުގައި، 35 މެޗުން 14 ގޯލު ޖަހައި، ފަސް ލަނޑު ޖަހަން ފުރުސަތު ހޯދައިދިންއިރު، ދެ ވަނަ ސީޒަނުގައި، 30 މެޗުން ޖެހުނީ 10 ގޯލެވެ. އަދި، ފަސް ލަނޑު ޖަހަން ފުރުސަތު ހޯދައިިދިނެވެ.
ޗެލްސީން ވަނީ މި ފަހަރުގެ ޓްރާންސްފާގައި ދެ ފޯވާޑުން ގަނެފަ އެވެ. ޖުމްލަ އެކު، 150 މިލިއަން ޑޮލަރު ހޭދަކޮށްފައި ޗެލްސީން ގަތީ، އިޕްސްވިޗް ޓައުން އިން ލިއަމް ޑެލަޕް އާއި ބްރައިޓަން އިން ޖޮއާއޯ ޕެޑްރޯ އެވެ. އޭގެ ފަހުން، ޗެލްސީގެ ކޯޗު، އެންޒޯ މަރެސްކާ ވަނީ އޭނާގެ ޕްލޭނުގައި ޖެކްސަން އަށް ޖާގަ ނެތް ކަމަށް ބުނެފަ އެވެ.
ޖެކްސަން ގެންދަން ބަޔާނުން ހުށަހަޅާފައިވަނީ، 3-5 މިލިއަން ޑޮލަރުގެ ލޯން ފީއެއް ދިނުމަށް ފަހު، މުސާރަ އެއްކޮށް ދޭ ގޮތަށް އެއް އަހަރުގެ ލޯނަކަށް ޓްރާންސް ކުރިއަށް ގެންދިއުމަށެވެ. އެކަމަކު، ޗެލްސީން ބޭނުންވަނީ، މި ޑީލްގެ ތެރޭގައި، ވަކި ކަންތައްތަކެއް ޖެކްސަން ފުރިހަމަ ކޮށްފިނަމަ، ބަޔާނުން ދާއިމީ ކޮންޓްރެކްޓެއް ޖެކްސަން އަށް ދޭން ޖެހޭ ގޮތަށް މާއްދާއެއް ހިމަނައިގެން ކުރިއަށް ދިއުމަށެވެ.
ބަޔާނުން ޖެކްސަން ގެންދަން އެންމެ ބޮޑަށް ބޭނުންވަނީ ފޯވާޑް ލައިންގެ ބޮޑުބައި ބަރޯސާވެފައިވާ ކޭން އަށް އޮތް ޕްރެޝަރަށް ލުޔެއް ދިނުމަށެވެ.
