ހަމަނުޖެހުން ހިންގަން ހިތްވަރުދިން ކަމުގެ ތުހުމަތުގައި އައްޑޫ ސިޓީއިން މީހަކު ހައްޔަރުކޮށްފި އެވެ.
މި މައްސަލައާ ގުޅިގެން ހައްޔަރުކުރީ އަލީ ސ. ހިތަދޫ، އަތަމާވިލާ، އާނިމް މުފީދު، 29، އެވެ. އޭނާ ހައްޔަރުކުރީ ކޯޓު އަމުރެއްގެ ދަށުންނެވެ.
އޭނާ ހައްޔަރުކުރީ މިނިވަން މީޑިއާ ނެތިކޮށްލަން "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން" ގެ ނަމުގައި ހުށަހަޅާފައިވާ ބިލާ ގުޅިގެން އިހުތިޖާޖު ކުރާ ފަރާތްތަކަށް ހަމަނުޖެހުން ހިންގަން ހިތްވަރު ލިބޭ ގޮތަށް އެކްސްގައި ކުރި ޕޯސްޓަކާ ގުޅިގެން ކަމަށް ފުލުހުން ބުނެ އެވެ.
"ކަމެއް ރަނގަޅު ކުރަން ބޭނުންނަމަ ޕެޓްރޯލް ފުޅިއެއް އުކާ. ތަންތަން ރޯކޮށް، މަގުތަކުގައި ދުއްވަން އުނދަގޫވާ ވަރަށް ވަރު ކޮށްލާ. އެ ހިސާބުން ޖެހޭނީ އަޑުއަހަން،" އާނިމް އެކްސްގައި ބުނެފައިވެ އެވެ.
އޭނާއަކީ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުކިޔަމުންދިޔަ މީހެކެވެ.
