މެންޗެސްޓާ (އޮގަސްޓް 17) - މެންޗެސްޓާ ސިޓީ އަށް ކުޅެމުން އަންނަ ބްރެޒިލްގެ ގޯލްކީޕަރު، އެޑަސަން މޮރާއެސް ގަންނަ ނަމަ، ތުރުކީގެ ގަލަތަސަރާއި އިން ބޮޑު ފީއެއް ދޭން ޖެހޭނެ ކަމަށް ރިޕޯޓްތައް ބުނެފި އެވެ.
އެޑަސަން، 32، އަކީ ޓްރާންސްފާ ލިސްޓުގައި ހިމެނޭ ކުޅުންތެރިއެކެެވެ. އެއީ، އަންނަ އަހަރުގެ ޖޫންގެ ނިޔަލަށް އޮތް އެޑަސަންގެ ކޮންޓްރެކްޓް އާ ކުރަން ސިޓީން ކުރި މަސައްކަތުގައި އަލި މަގެއް ފެނިފައިނުވާތީ އެވެ.
ސިޓީން މި ފަހަރުގެ ޓްރާންސްފާ މާކެޓްގައި، އެންމެ އަގުބޮޑު އިނގިރޭސި ގޯލްކީޕަރުގެ ގޮތުގައި، ބާންލީ އަށް ކުޅެމުން އަންނަ ޖޭމްސް ޓްރަފޯޑް ގަތްއިރު، ސިޓީން އަންނަނީ ޕީއެސްޖީ ދޫކޮށްލަން ތައްޔާރުވަމުން އަންނަ އިޓަލީގެ ގޯލްކީޕަރު، ޖިއަންލުއީޖީ ޑޮނަރުންމާ ހޯދަން ވެސް މަސައްކަތް ކުރަމުންނެވެ. އެކަމަކު، ޑޮނަރުންމާ ހޯދުމުގެ ރޭހުގައި ސިޓީން ހަރަކާތްތެރިވާ މިންވަރު ބަރޯސާވެފައި އޮތީ، އެޑަސަންގެ ޓްރާންސްފާ ކަންތައް ނިމޭ ގޮތަކުންނެވެ.
އެ ގޮތުން، ގަލަތަސަރާއި އިން އެޑަސަން ހޯދަން ފުރަތަަމަ ކުރި ބިޑް އުޅެނީ، 14 މިލިއަން ޑޮލަރުގަ އެވެ. ސިޓީން އެޑަސަން ވިއްކާލަން ކިޔާ އަގުއުޅެނީ 20 މިލިއަން ޑޮލަރުގަ އެވެ. އެހެންކަމުން، އެޑަސަން ގަންނަނަމަ، ގަލަތަސަރާއި އިން މިހާރު ހުށަހަޅާފައި އޮތް ފީ ބޮޑުކުރަން ޖެހެ އެވެ.
ސިޓީން ޕްރިމިއާ ލީގުގެ އާ ސީޒަނުގައި ރޭ ވުލްވްސްއާ ދެކޮޅަށް ކުޅުނު މެޗު ސްކޮޑުގައި އެޑަސަން ނެތެވެ. ސިޓީގެ ކޯޗު ޕެޕް ގާޑިއޯލާ ނިންމާފައިވަނީ، އެޑަސަންގެ މުސްތަގުބަލާ ގުޅޭގޮތުން، ފައިނަލް ގޮތެއް ނުނިމެނިސް އޭނާ މެޗުތަކުގައި ބޭނުން ނުކުރުމަށެވެ.
އެޑަސަން، ސިޓީ އަށް ގެނައީ، 2017 ވަަނަ އަހަރު، 45 މިލިއަން ޑޮލަރު ދީފަ އެވެ. އެޑަސަން ވަނީ ސިޓީ އަށް 372 މެޗު ކުޅެދީފަ އެވެ.
