ބާލިން (އޮގަސްޓް 17) - މި ފަަހަރުގެ ޓްރާންސްފާ މާކެޓްގައި ބަޔާން މިއުނިކާ ގުޅުނު ކޮލަމްބިއާގެ ފޯވާޑް، ލުއިސް ޑިއާޒް ޖެހި ގޯލާ އެކު، 2-1 އިން ސްޓުޓްގާޓް ބަލިކޮށް، ޖަރުމަނުގެ ފުޓްބޯޅަ ސީޒަން ފަށަން ކުޅޭ ފްރާންޒް ބެކެންބާއު ސުޕަ ކަޕް ބަޔާނުން ކާމިޔާބުކޮށްފި އެވެ.
މިއީ، ޖަރުމަނު ސުޕަ ކަޕްގެ ޗެމްޕިއަންކަން ބަޔާނުން ހޯދި 11 ވަނަ ފަހަރެވެ. ސުޕަ ކަޕް، އެންމެ ގިނަ ފަހަރު ހޯދުމުގެ ރެކޯޑް އޮތީ ވެސް ބަޔާން އަތުގަ އެވެ.
އެމްއެޗްޕީ އެރީނާގައި ކުޅުނު މި މެޗުގައި، ބަޔާނުން ވަނީ 18 ވަނަ މިނިޓްގައި ލީޑުނަގައިފަ އެވެ. މި ލަނޑު އެ ޓީމަށް ޖަހައިދިނީ، އިނގިރޭސި ފޯވާޑް ހެރީ ކޭން އެވެ.
ޖަރުމަނު ލީގުގެ ރަން ބޫޓު މިދިޔަ ސީޒަނުގައި ހޯދި، ކޭން، މި ގޯލު ޖެހީ ސްޓުޓްގާޓް ފަހަތުން ހެދި ގޯހެއްގެ ފައިދާނަގައި، ހަމަޖެހިލައިފައި ގޯލުގެ ތެރެއަށް ބޯޅަ ފޮނުވާލައިގެންނެވެ.
ޑިއާޒް ގޯލު ޖެހުމަށް ފަހު އުފާފާޅުކުރަނީ: މިއީ ޑިއާޒާ އެކު، ލިވަޕޫަލަށް ކުޅުނު ޖޮޓާގެ އުފާފާޅުކުރުމުގެ ގޯލު ސެލެބްރޭޝަނެއް.
ކޭންގެ ގޯލުން ކުރީގައި އޮވެ ނިންމާލި ބަޔާނުން، ލީޑުފުޅާކުރީ، 77 ވަނަ މިނިޓްގަ އެވެ. މި ލަނޑު ޖެހީ، ލިވަޕޫލް ދޫކޮށް 88 މިލިއަން ޑޮލަރަށް ބަަޔާނަށް ބަދަލުވި ޑިއާޒް އެވެ. މިއީ، ސާޖް ގްނާބްރީ ނެގި ބޯޅައަކުން ޑިއާޒް ބޮލުން ޖެހި ގޯލެކެވެ. ޑިއާޒް، ލަނޑު ޖެހުމަށް ފަހު އުފާފާޅުކުރިއިރު، ވަނީ މިދިޔަ ޖުލައި މަހު ކާރު އެކްސިޑެންޓެއްގައި މަރުވި ޑިއާގޯ ޖޮޓާގެ ހަނދާން އާ ކޮށްފަ އެވެ.
މެޗުގައި ބަޔާނަށް ލަނޑު ޖަހާނެ ގިނަ ފުރުސަތުތަކެއް ލިބިގެންދިޔައިރު، ތިން ވަނަ ލަނޑެއް ނުޖެހުނެވެ.
އިތުރު ވަގުތުގެ ތެރޭގައި ސްޓުޓްގާޓަށް މި މެޗުގައި ޖަހައިދިން ހަމައެކަނި ލަނޑު ކާމިޔާބުކުރީ، ޖޭމީ ލެވަލިން އެވެ. މިއީ ބަޔާން ޑިފެންޑަރުން ފަސޭހަ ކޮށްލައިގެން ތިބި ދަނޑިވަޅެއްގެ ފައިދާނަގައިގެން، ލެވަލިން ޖެހި ގޯލެކެވެ.
ބަޔާނުން މިދިޔަ ސީޒަނުގައި ޖަރުމަނު ލީގުގެ ޗެމްޕިއަންކަން ހޯދީ، 11 އަހަރު ތެރޭ ފުރަތަމަ ފަހަރަށް ތަށި ގެއްލުނު މާޔޫސްކަމުން އަރައިގަނެގެންނެވެ. މި ސީޒަނުގައި ލީގު ތަށި ދިފާއުކުރަން، ބަޔާނުން ނުކުންނަައިރު، މި މަހު 22 ވަނަ ދުވަހު ފަށާ ޖަރުމަނު ލީގުގެ އާ ސީޒަނުގައި، ބަޔާނުން ބައްދަލުކުރާނީ އާރްބީ ލައިޕްޒިގާ އެވެ.
