އެޑިއުކޭޝަން ޑިވެލޮޕްމަންޓް ސެންޓަރު ކުރިން ހިންގި އިމާރާތުން ބައެއް ވެއްޓި ޕާކް ކޮށްފައި ހުރި ވެހިކަލްތަކަކަށް މިއަދު ގެއްލުން ލިބިއްޖެ އެވެ.
ފުލުހުން ބުނީ ކުރީގެ އެޑިއުކޭޝަން ޑިވެލޮޕްމަންޓް ސެންޓަރުން ބައެއް ވެއްޓި ޖެހިގެން ހުރި އިމާރާތަށާއި ޕާކްކޮށްފައި ހުރި ދެ ސައިކަލާއި ދެ ކާރަކަށް ގެއްލުން ލިބިފައިވާ ކަމަށެވެ.
"އެޑިއުކޭޝަން ޑިވެލޮޕްމަންޓް ސެންޓަރު ކުރިން ހިންގި އިމާރާތުގެ ބައިތަކެއް ވެއްޓި ޖެހިގެން ހުރި އިމާރާތުގައި ޕާކް ކޮށްފައި ހުރި ދެ ސައިކަލާއި ދެ ކާރަށް ގެއްލުން ލިބިފައިވާ މައުލޫމާތު މިއަދު މެންދުރު 1:00 ޖަހާއިކަށްހާއިރު ފުލުހުންނަށް ލިބިފައިވޭ،" ފުލުހުން ބުންޏެވެ.
ހާދިސާއާ ގުޅޭ މައުލޫމާތު ކަމާ ގުޅުންހުރި އިދާރާތަކާއި ހިއްސާކޮށް ބަލަން ޖެހޭ ކަންކަން ބަލަމުންދާ ކަމަށް ފުލުހުން ވަނީ ބުނެފަ އެވެ.
އެޑިއުކޭޝަން މިނިސްޓްރީގެ ބެލުމުގެ ދަށުގައި އޮތް އެޑިއުކޭޝަން ޑިވެލޮޕް،މަންޓް ސެންޓަރު ކުރިން ހިންގި ބިމުގައި ހިމެނޭ ވެއްޓުނު ބަޔަކީ މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ޖާގަ ދަތިވެގެން 2004 ވަނަ އަހަރު ހަވާލުކޮށްފައި އޮތް ބައެކެވެ.
އެމްއެންޔޫއާ ހަވާލުކޮށްފައި އޮތް ބައިގައި އެ ޔުނިވާސިޓީން ކުރިން ކްލާސްތަކެއް ވެސް ހިންގި އެވެ. ނަމަވެސް އެތަނުގެ ހާލަތު ގޯސްވުމާ ގުޅިގެން ކްލާސްތައް ހިންގުން އެމްއެންޔޫއިން ވަނީ ހުއްޓާލާފަ އެވެ.
އެޑިއުކޭޝަން ޑިވެލޮޕްމަންޓް ސެންޓަރު އުވާލެއްވީ ރައީސް މުހައްމަދު ވަހީދު ހަސަން މަނިކުގެ ވެރިކަމުގައި 2013 ވަނަ އަހަރު އެވެ. އެތަން އުވާލެއްވުމަށްފަހު ވަހީދު އުފެއްދެވީ ނެޝެނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އެވެ.
