މިހާރު ކުރިއަށްދާ ގައުމީ އެތުލެޓިކްސް މުބާރާތުގެ ފުރަތަމަ ދުވަހު ކަސްޓަމްސް ރެކްރިއޭޝަން ކްލަބްގެ އައިޝަތު ޝައިމް އަޒީޒް ދެ އިވެންޓަކުން ރަން މެޑަލް ހޯދިއިރު، ހައި ޖަމްޕްގެ ގައުމީ ރެކޯޑް ހޯލްޑަރު، ޓްރެކް އެންޑް ފީލްޑް އެސޯސިއޭޝަންގެ ޔޫސުފް ނާއިކް ވަޖީހު މީޓް ރެކޯޑާ އެކު، ހައި ޖަމްޕުން ރަން މެޑަލް ހޯދައިފި އެވެ.
ޖުމްލަ އެކު، 204 އެތުލީޓުން ވާދަކުރާ ގައުމީ އެތުލެޓިކްސް މުބާރާތް ފަށާފައިވަނީ، އިއްޔެ ކުޅިވަރު އެކުވެނި ސިންތެޓިކް ޓްރެކުގަ އެވެ.
އިއްޔެގެ އިވެންޓްތަކަށް ބަލާއިރު، އަންހެނުންގެ ޖެވަލިން އުކުމާއި ހައި ޖަމްޕް އިވެންޓުން ޝައިމް ވަނީ ރަން މެޑަލް ހޯދައިފަ އެވެ. ޖެވަލިން އުކުމުން ޝައިމް ވަނީ 27.12 މީޓަރު ދުރަށް އެއްލައިފަ އެވެ. ދެ ވަނަ އަށް ދިޔަ، ކަސްޓަމްސް ރެކްރިއޭޝަން ކްލަބްގެ ލައުހާ ހުސެއިން އަށް އެއްލުނީ، 25.94 މީޓަރު ދުރަށެވެ. އަދި، ތިން ވަނަ ހޯދި، ޓްރެކް އެންޑް ފީލްޑް އެސޯސިއޭޝަންގެ އައިޝަތު ނުބްލާ ނާޝިދު ޝައުގީ އެއްލީ 19.19 މީޓަރު ދުރަށެވެ.
ހައި ޖަމްޕްގެ ގައުމީ ރެކޯޑް އޮތް ޝައިމް، މި ފަހަރުގެ ގައުމީ މުބާރާތުގެ އެ އިވެންޓް ކާމިޔާބުކުރީ، 1.48 މީޓަރު މަތިން ފުންމައިގެން މީޓު ރެކޯޑަކާ އެކު އެވެ. މީގެ ކުރިން އެ ރެކޯޑް އޮތީ، 1.41 މީޓަރު މަތިން ފުންމި ވިކްޓަރީގެ މަރިޔަމް ޝިފްޒާ އަތުގަ އެވެ. ޝައިމް، ގައުމީ ރެކޯޑް ހަދާފައި އޮތީ، 1.50 މީޓަރު މަތިން ފުންމައިގެންނެވެ.
ނާއިކް، އިވެންޓް ކާމިޔާބުކުރުމަށް ފަހު މެޑަލް އަޅައިގެން ފޮޓޯ އަކަށް ހުއްޓިލައިގެން.--- ފޮޓޯ: އިމޭޖަސް.އެމްވީ
މި އަހަރުގެ އެތުލެޓިކްސް އެސޯސިއޭޝަން ޗެމްޕިއަންޝިޕްގައި، 16 އަހަރު ވެފައި އޮތް ގައުމީ ހައި ޖަމްޕްގެ ރެކޯޑް މުގުރާލި ނާއިކް، ގައުމީ މުބާރާތުގެ ހައި ޖަމްޕް އިވެންޓް ކާމިޔާބުކުރީ، 1.87 މީޓަރު މަތިން ފުންމައިގެންނެވެ. މި އިވެންޓްގެ މީޓް ރެކޯޑް ހެދީ ވެސް ކުރިން ގައުމީ ރެކޯޑް އޮތް އަހުމަދު ޒަބީރު (ޒަބީ) އެވެ. އެއީ، 1.81 މީޓަރު މަތިން ފުންމައިގެންނެވެ.
ނާއިކް، ގައުމީ ރެކޯޑް ހެދީ، 1.88 މީޓަރު މަތިން ފުންމައިގެންނެވެ. ޒަބީ ގައުމީ ރެކޯޑް ހެދީ 1.85 މީޓަރު މަތިން ފުންމައިގެންނެވެ.
ފިރިހެނުންގެ ޑިސްކަސް އުކުމުން ދިވެހި ސިފައިންގެ ކްލަބްގެ ހަސަން ޝައްމޫން ވަނީ ރަން މެޑަލް ހޯދައިފަ އެވެ. އެއީ، 29.04 މީޓަރު ދުރަށް އެއްލައިގެންނެވެ.
ޓްރެކް އެންޑް ފީލްޑް އެސޯސިއޭޝަންގެ އައިޝަތު ޝާޔާ ޝަފީއު ވަނީ، މީޓު ރެކޯޑަކާއި ގައުމީ ރެކޯޑަކާ އެކު، ޝޮޓް ޕުޓް އިވެންޓް ކާމިޔާބުކޮށްފަ އެވެ. އެ ގޮތުން، ޝާޔާ ޝޮޓްޕުޓްގެ އިވެންޓް ކާމިޔާބުކުރީ، 9.80 މީޓަރު ދުރަށް އެއްލައިގެންނެވެ. އޭނާ މީގެ ކުރިން ގައުމީ ރެކޯޑް ހެދީ، 9.57 މީޓަރު ދުރަށް އެއް ލައިގެންނެވެ. އަދި، މީޓު ރެކޯޑް ހަދާފައި އޮތީ، 8.92 މީޓަރު ދުރަށް އެއްލައިގެންނެވެ.
އަންހެނުންގެ މާސްޓާ 5000 މީޓަރު ދުވުން ކާމިޔާބުކުރީ، މެރަތަން ރަނާސް މޯލްޑިވްސްގެ ހުސްނާ މުހައްމަދު އެވެ. ފިރިހެނުންގެ ހަތަރެއް ގުނަ 400 ރިލޭ އިވެންޓް، ޓްރެކް އެންޑް ފީލްޑް އެސޯސިއޭޝަން އިން ކާމިޔާބުކުރިއިރު، އަންހެނުންގެ އެ އިވެންޓް ކާމިޔާބުކުރީ، ކަސްޓަމްސް ރެކްރިއޭޝަން ކްލަބް އިންނެވެ.
