ޕީއެންސީ ޕާލިމެންޓަރީ ގްރޫޕުގެ ބުދަ ދުވަހުގެ ބައްދަލުވުން ހޫނުވި މައިގަނޑު އެއް ސަބަބަކީ ބައެއް މެންބަރުންގެ ކުންފުނިތަކުގެ ބިލްތަކާއި އާންމުންގެ ބިލްތަކަށް ސަރުކާރުން ފައިސާ ނުދައްކައި ފުނިޖައްސާފައި ހުއްޓައި، ބާރަށު ދާއިރާގެ މެންބަރު އިބްރާހިމް ޝުޖާއުގެ ކުންފުނިތަކަށް އެތައް މިލިއަނަކުން ފައިސާ ދޫކުރުން ކަމަށް، އެ ޕާޓީއަށް ނިސްބަތްވާ ބައެއް މެންބަރުން އަދަދު ނޫހަށް ވިދާޅުވި އެވެ.
ބާރަށު ދާއިރާގެ މެންބަރު އަދި ޕީއެންސީގެ ނައިބު ރައީސް އިބްރާހިމް ޝުޖާއުއަށް ކޮރަޕްޝަނާއި ނުހައްގު މުއްސަދިކަން ހޯދިކަމުގެ ތުހުމަތުކޮށް މަރުކަޒީ ބޭންކުގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އިން ތައްޔާރުކޮށްފައިވާ ރިޕޯޓެއް ލީކްކޮށްލިއިރު، އެ ރިޕޯޓުން އެނގޭ ގޮތުން ނޮވެމްބަރު 1، 2023 އިން ޖެނުއަރީ 10، 2024 ގެ ނިޔަލަށް ޝުޖާއުގެ އެކި ކުންފުނިތަކުގެ ބިލްތަކަށް އެތައް މިލިއަން ރުފިޔާ ޖަމާކޮށްފައިވެ އެވެ.
"އެއީ އަދި މަދު އެތިކޮޅެއް،" ޕީއެންސީގެ މެންބަރަކު "އަދަދު ނޫހަށް ވިދާޅުވި އެވެ.
ޝުޖާއުގެ ކުންފުނިތަކުގެ މުއާމަލާތްތަކާމެދު ތުހުމަތުތައް ހުރެގެން އެފްއައިޔޫ އިން ޕޮލިހަށާއި އޭސީސީއަށް އެ މައްސަލަ ފޮނުވާފައި އޮންނަތާ އަހަރަކަށް ވުރެ ގިނަ ދުވަސް ވަނީ ވެފައެވެ. އެ މައްސަލަ ތަހުގީގުކުރާކަން ޕޮލިހާއި އޭސީސީން ހާމަކުރީ އެފްއައިޔޫގެ ރިޕޯޓު ލީކްވެ، ރައްޔިތުން "ކެކެން" ފެށުމުންނެެވެ.
"ޝުޖާއުގެ މައްސަލައެއް ނުބަލާނެ. އެހެން ނޫނަމަ އެފްއައިޔޫގެ ވެރިޔާ ބަދަލެއް ނުކުރާނެ. އެއް އަހަރުވީއިރު ސުވާލުކޮށް ނުލީމަ އެ ބުނެދެނީ މައްސަލަ ނުބަލާނެކަން،" މެންބަރަކު ވިދާޅުވި އެވެ.
ޝުޖާއުގެ މައްސަލަ ފެންމަތިވެފައި އޮތްވައި ބޭއްވި ޕީއެންސީގެ ޕާލިމެންޓަރީ ގްރޫޕުގެ ބައްދަލުވުން ވަރަށް ބޮޑަށް ހޫނުވިކަން އެ ޕާޓީގެ އެތައް މެންބަރުންނެއް ކަށަވަރުކޮށް ދެއްވި އެވެ.
މިއަދުގެ މޫސުން
- މޫސުން އާންމު ގޮތެއްގައި ރަނގަޅުވާނެ.
- ވައިޖެހޭނީ ހުޅަނގާއި ހުޅަނގު އުތުރުން ގަޑިއަކު 5 މޭލާއި 15 މޭލަށް
- އާދައިގެ ވަރަކަށް ކަނޑުތައް މަޑުވާނެ
- ރާޅުގެ އުސްމިން ހުރީ 2 ފޫޓާއި 4 ފޫޓާ ދެމެދު.
ނަމާދު ވަގުތު
- ފަތިސް 04:47
- އިރުއަރާ 06:02
- މެންދުރު 12:15
- އަޞްރު 15:31
- މަޣްރިބް 18:21
- ޢިޝާ 19:36
