މެންޗެސްޓާ (އޮގަސްޓް 9) - މެންޗެސްޓާ ސިޓީ އަށް ކުޅެމުން އަންނަ ސްޕެއިނުގެ މިޑްފީލްޑަރު، ރޮޑްރީގޯ (ރޮޑްރީ) އެއްކޮށް ފިޓްވެގެން ކުޅުމުގެ ތެރެއަށް އާދެވޭނީ އަންނަ މަހު ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
މިދިޔަ ސެޕްޓެމްބަރު މަހު ކަކުލަށް ލިބުނު ސީރިއަސް އަނިޔާއެއްގެ ސަބަބުން ރޮޑްރީ ވަނީ ކުޅުމާ ދުރުގައި ހުންނަން ޖެހިފަ އެވެ. ފެބްރުއަރީ މަހު، އިންޑިވިޖުއަލް ޓްރެއިނިން އަށް ނުކުތް ރޮޑްރީ، ޓީމު ޓްރެއިނިންތަކުގައި ބައިވެރިވާން ފަށާފައިވަނީ، މެއި މަހުގެ ކުރީކޮޅުގަ އެވެ. އަދި، ޕްރިމިއާ ލީގުގެ މިދިިޔަ ސީޒަނުގެ ފަހު މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ރޮޑްރީ ވަނީ، ޖޫން/ޖުލައިގައި ކުރިއަށްދިޔަ ފީފާ ކްލަބް ވޯލްޑް ކަޕްގައި ވެސް ކުޅެފަ އެވެ.
ކްލަބް ވޯލްޑް ކަޕްގެ ގަދަ 16 ބުރުގައި، ސައުދީ ޕްރޯ ލީގުގެ އަލް ހިލާލް އަތުން ބަލިވެ ސިޓީ ކެޓި މެޗުގައި ބަދަލަކަށް ކުޅެން އެރި ރޮޑްރީ ވަނީ ފަހުން ބަދަލުކޮށްފަ އެވެ. އަދި، އެއީ އުކުޅުވަޅަށް ލިބުނު އަނިޔާއަކުން ކަމަށް ސިޓީން ވަނީ ބުނެފަ އެވެ.
ގާޑިއޯލާ ބުނީ، ހިލާލްއާ ދެކޮޅަށް ކުުޅުނު މެޗުގައި ރޮޑްރީ އަށް ކުރިމަތިވީ ބޮޑު އަނިޔާއެއްގެ މައްސަލައެއް ކަމަށެވެ. އަދި، އެ ކަމުން ރިކަވާވެގެން އެއްކޮށް ފިޓްވެ، ކުޅުމަށް އެނބުރި އާދެވޭނީ އަންނަ މަހުގެ އިންޓަނޭޝަނަލް ބްރޭކުގެ ފަހުން ކަަަމަށް ވެސް ގާޑިއޯލާ ވަނީ ބުނެފަ އެވެ.
ޕްރިމިއާ ލީގުގެ އާ ސީޒަނުގެ ފުރަތަމަ ތިން މެޗު، އިންޓަނޭޝަނަލް ބްރޭކުގެ ކުރިން ކުޅޭނެ އެވެ. އެއީ، ވުލްްވްސް، ޓޮޓެންހަމް އަދި ބްރައިޓަންއާ ދެކޮޅަށް ކުޅޭ މެޗުތަކެވެ. އެ މެޗުތައް ޔަގީނުން ވެސް ރޮޑްރީ އަށް ގެއްލޭނެ އެވެ.
