ދިވެހި ދައުލަތުގެ މަތިވެރި އިއްޒަތް ކަމުގައިވާ، ނިޝާން އިއްޒުއްދީންގެ ލަގަބު މިފަހުން ރިޓަޔާކުރެއްވީ ކުރީގެ ޗީފް ޖަސްޓިސް އަހުމަދު މުއުތަސިމް އަދުނާނާއި ޖަޕާނަށް ކަނޑައަޅުއްވާފައި ހުންނަވާ ސަފީރު ހަސަން ސޯބިރާއި މާމިގިލި ދާއިރާގެ މެންބަރު ގާސިމް އިބްރާހިމްއަށް މިއަދު އަރުވައިފި އެވެ.
އެކި ދާއިރާތަކުން ދައުލަތާއި ރައްޔިތުންނާއި ގައުމަށް ގިނަ ހިދުމަތްތަކެއް ކޮށްދެއްވާފައި މި ތިން ބޭފުޅުންނަށް ނިޝާން އިއްޒުއްދީންގެ ލަގަބު އެރުވީ، މިނިވަން ދުވަހުގެ ރަސްމީ ޖަލްސާގެ ތެރެއިން، ރައީސް މުހައްމަދު މުއިއްޒެވެ.
ދައުލަތުގެ މަތިވެރި ލަގަބު އެރުވުނު މުއުތަސިމްއަކީ ހާރިޖީ ދާއިރާ އާއި ޝަރުއީ ދާއިރާއިން ގިނަ އަހަރުތަކެއް ވަންދެން ހިދުމަތްކޮށްދެއްވާފައިވާ، ޝަރުއީ ދާއިރާގެ އަގުހުރި ހިދުމަތްތެރިއެކެވެ. އެމަނިކުފާނުގެ ވަޒީފާގެ ހަޔާތާ ބެހޭ ގޮތުން ޖަލްސާގައި ދެއްކި ޕްރެޒެންޓޭޝަނުގައި ބުނީ މުއުތަސިމަކީ ހާރިޖީ ދާއިރާއަށް ގާނޫނީ ލަފާ ވެސް ދެއްވި ބޭފުޅެއް ކަމަށެވެ.
މުއުތަސިމްގެ ކެރިއަރުގެ އުސްއަލިތައް
- ދައުލަތުގެ ހިދުމަތް ފެއްޓެވީ 1983 ގައި
- ފުރަތަމަ މަސައްކަތް ކުރެއްވީ ފޮރިން އެެފެއާޒްގައި
- ހާއްސަ ވަނީ ކޮމާޝަލް ލޯ އަށް
- ފޮރިން މިނިސްޓްރީގެ ލީގަލް އަދި ކޮންސިއުލާ ޑިޕާޓުމަންޓު ހިންގެވި
- އޭލަވަލްއަށް ހާއްސަ ލޯ ކްލާސްތަކެއް ފެއްޓެވި
- މޯލްޑިވްސް ކޮލެޖް އޮފް ހަޔާ އެޑިޔުކޭޝަން (މިހާރު އެމްއެންޔޫ) ގެ ލޯ ފެކަލްޓީގެ ޑީންކަން ކުރެއްވި
- ކްލިޕާ އެންޑް ގެލިއޮން ލޯ ފާމް އުފެއްދެވި
- ހިއުމަން ރައިޓްސް ކޮމިޝަނާއި ލޯ ކޮމިޝަނުގެ މެންބަރުކަން ކުރެއްވި
- ސުޕްރީމް ކޯޓުގެ ފުރަތަމަ ބެންޗު އެކުލަވާލެވުނުއިރު ފަނޑިޔާރަކަށް އައްޔަނުކުރެވުނު
- އުއްތަމަ ފަނޑިޔާރުކަމަށް އައްޔަނުކުރެވުނީ 2019 ގައި
ޖަލްސާގައި ދެން މި ލަގަބު އެރުވުނު ހަސަން ސޯބިރަކީ ރާއްޖޭގައި އެންމެ ގިނަ ދުވަސް ވަންދެން ޓޫރިޒަމް މިނިސްޓަރަކަށް ހުންނެވި ބޭފުޅާ އެވެ. އޭނާ ވަނީ ދިވެހި ސަރުކާރުގެ އެންމެ މަތީ ފަޑީގައި 25 އަހަރު ވަންދެން މަސައްކަތް ކުރައްވާފަ އެވެ.
ސޯބިރުގެ ކެރިއަރުގެ އުސްއަލިތައް
- ދައުލަތަށް ހިދުމަތް ކުރައްވަން ފެއްޓެވީ 1973 ގައި
- އިގުތިސޯދާ ބެހޭ ހުރިހާ ދާއިރާއެއްގައި ހިދުމަތް ކުރެއްވި
- ހާރިޖީ ދާއިރާގައި ވެސް ގިނަ މަސައްކަތްތަކެއް ކުރައްވާފައިވޭ
- މައުމޫންގެ ހަތަރު ވަނަ ކެބިނެޓުގައި ފިޝަރީޒް މިނިސްޓަރުކަން ކުރެއްވި
- އެއް މިލިއަން ގަސް ޕްރޮގްރާމާއި ކޫއްޑޫ މަސް ފެކްޓަރީގެ މޭސްތިރިއެއް
- ދަނޑުވެރިކަން ކުރަން އާންމުންނަށް ފަޅު ރަށްރަށް ދޫކުރައްވަން ފެއްޓެވި
- ރައްޔިތުންގެ މަޖިލީހުގެ އަރި އަތޮޅު ދާއިރާގެ މެންބަރުކަން ކުރެއްވި
- ދަތި ދުވަސްވަރެއްގައި ޓޫރިޒަމް މިނިސްޓަރަކަށް ހުންނެވި
- އީޔޫ އާއި ޔޫރަޕުގެ ބައެއް ގައުމުތަކުގެ އެމްބެސެޑަރުކަން ކުރެއްވި
- ޖަޕާނަށް ކަނޑައަޅާފައި ހުންނަވާ ސަފީރު
ނިޝާން އިއްޒުއްދީންގެ ލަގަބު މިއަދު އެރުވި ގާސިމްއަކީ، ނިޝާން މުލީގެ އިއްޒަތުގެ ވެރިއެކެވެ. ގާސިމްއަކީ މަޝްހޫރު ވިޔަފާރިވެރިއެއްގެ އިތުރުން، ދައުލަތުގެ އިސް މަގާމުތަކެއް އަދާކުރައްވައި އަދި ގިނަ ބަޔަކަށް ތައުލީމީ ދާއިރާއިންނާއި ބޭސް ފަރުވާ ހޯދަން ވެސް އެހީތެރިކަން ހޯދައިދީފައި ވެ އެވެ.
ގާސިމްގެ ކެރިއަރުގެ އުސްއަލިތައް
- ދައުލަތަށް ފުރަތަމަ ހިދުމަތް ކުރެއްވީ ގަވަމަންޓު ހޮސްޕިޓަލުގެ ކާތިބަކަށް
- ވިޔަފާރި ފެއްޓެވީ 1976 ގައި، 15،000ރ. ގެ ލޯނަކުން
- ވިލާ ޝިޕިން އުފައްދައި ތެލުގެ ވިޔަފާރި ފެއްޓެވި
- ރިސޯޓެއް ހުޅުވީ މުދާ އެތެރެކުރަން ބޭނުންވާ ބޭރު ފައިސާ ހޯދަން
- ޓީއެމްއޭ އާއި ވިލާ އެއާ އުފެއްދެވި
- ވިލާ ސްކޮލާޝިޕް ތައާރަފުކުރި، އެއީ ރާއްޖޭގެ ފުރަތަމަ ސްކޮލާޝިޕް ޕްރޮގްރާމް
- ފިނޭންސް މިނިސްޓަރުކަމާއި އެމްއެމްއޭގެ ގަވަރުނަރުކުރަން ކުރެއްވި
- މަޖިލިސް މެންބަރުކަން ކުރައްވާތާ ހަތަރު ވަނަ ދައުރު
- ހާއްސަ މަޖިލީހުގެ ރައީސްކަން ކުރެއްވި
ނިޝާން އިއްޒުއްދީންގެ ލަގަބަކީ ދައުލަތުގެ ދެ ވަނައަށް އެންމެ މަތީ ލަގަބެވެ. މިއަދު މި ލަގަބު އެރުވުނު ތިން ބޭފުޅުންނާއެކީ 24 މީހަކަށް ވަނީ ދައުލަތުގެ އެންމެ މަތިވެރި ލަގަބު ލިބިފަ އެވެ.
