އއ. މާޅޮހުގައި އަނިޔާވެރި ގޮތަކަށް މަރައިލި އަބްދުއްރަހްމާން އާދަމް، 65، ގެ އޮޓޮޕްސީ ހެދުމަށްފަހު ރާއްޖެ ގެނެސް، މިއަދު މެންދުރު ނަމާދަށްފަހު މާލޭގައި ވަޅުލާން ނިންމައިފި އެވެ.
އޮޓޮޕްސީ ހެދުމަށް އަބްދުއްރަހްމާންގެ ހަށިގަނޑު ގެންދިޔައީ އިންޑިއާގެ ޓްރިވެންޑްރަމަށެވެ. އެއަށްފަހު އޭނާގެ ހަށިގަނޑު އަނބުރާ ރާއްޖެ ގެނެސް ވަޅުލާން ނިންމީ މެންދުރު ނަމާދަށްފަހު މާލޭ އާސަހަރާގަ އެވެ.
އަބްދުއްރަހްމާން މަރުވީ ޖުލައި 11، ވަނަ ދުވަހުގެ ރޭ އޭނާ ނިދާފައި އޮއްވައި، ގޮތް ނޭނގޭ މީހަކު އޭނާގެ ބޮލަށް ދިން އަނިޔާވެރި ހަމަލާގެ ސަބަބުންނެވެ. އަބްދުއްރަހްމާން މަރުވީ އެ ރަށު ސިއްހީ މަރުކަޒުގައި ފަރުވާދެނިކޮށް ޖުލައި 12، ވަނަ ދުވަހު އެވެ.
އެ މައްސަލައިގެ ތަހުގީގަށް ފުލުހުންގެ ޓީމެއް މާޅޮހަށް ގޮސް ގެންދަނީ ހަރަކާތްތެރިވަމުންނެވެ. މިގޮތުން ފުލުހުން ވަނީ އެ ރަށަށް އަރައި ފައިބާ މީހުން މޮނިޓާކޮށް، ރަށުގެ ރައްޔިތުންނާ ސުވާލު ކުރުމުގެ އިތުރުން ބައެއް ތަންތަން ބަލައި ފާސްކޮށްފަ އެވެ.
އަބްދުއްރަހްމާންގެ މަރުގެ މައްސަލައިގައި މިހާތަނަށް ފުލުހުން ހާމަކުރީ އޭނާގެ އަންހެނުންގެ ފޯނު ހިފެހެއްޓުމަށްފަހު ދޫކޮށްލި ވާހަކަ އެކަންޏެވެ. ތަހުގީގާ ގުޅިގެން މިހާތަނަށް އެއްވެސް އެއްޗެއް ހާމަކޮށްފައެއް ނުވެ އެވެ.
މީގެ އިތުރުން ތަހުގީގާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ. އެކަމަކު ފުލުހުން ބުނީ އެ މައްސަލައިގައި އެކި އޭންގަލްތަކަށް ފޯކަސް ކޮށްގެން ތަހުގީގު ހިންގަމުންދާ ކަމަށެވެ.
