މިއުނިކް (ޖުލައި 8) - ފީފާ ކްލަބް ވޯލްޑް ކަޕްގެ ކުއާޓާ ފައިނަލުގައި ފަޔަށް ސީރިއަސް އަނިޔާއެއް ލިބި ދިގު މުއްދަތަކަށް ކުޅުމާ ދުރަށް ދާން ޖެހުނު ބަޔާން މިއުނިކްގެ މިޑްފީލްޑަރު، ޖަމާލް މުސިއާލާގެ ބަދަލުގައި، އެ ޓީމުން ލިވަޕޫލްގެ ލުއިސް ޑިއާޒް ހޯދުމުގެ މަސައްކަތް ވަރުގަދަކުރަން ނިންމައިފި އެވެ.
ޑިއާޒް، 28، ލިވަޕޫލާ އެކު، ހަދާފައި އޮތް ކޮންޓްރެކްޓްގައި ބާކީ ދެ އަހަރު އެބައޮތެވެ. މިދިޔަ ސީޒަނުގައި މެންޗެސްޓާ ސިޓީ އާއި ސައުދީ އަރަބިއްޔާގެ ބައެއް ކްލަބްތަކުން ޑިއާޒަށް ހުށަހެޅުންތަކެއް ލިބުނެވެ. އަދި، މި ފަހަރުގެ ޓްރާންސްފާ މާކެޓްގައި ބާސެލޯނާ އިން ލިބުނު އޮފާ އެކޭ އެއްގޮތަށް، ބަޔާނުން ލިބުނު ފުރަތަމަ ހުށަހެޅުން ވެސް ލިވަޕޫލުން ވަނީ އަނބުރާ ފޮނުވާލައިފަ އެވެ.
އެކަމަކު، ޕީއެސްޖީގެ ކީޕަރު، ޖިއަންލުއީޖީ ޑޮނަރުންމާ އަތުން މުސިއާލާގެ ފަޔަށް ލިބުނު ސީރިއަސް އަނިޔާގެ ސަބަބުން އޭނާ އަށް ހަތަރު މަހެއްހާ ދުވަހު ކުޅުމާ ދުރުގައި ހުންނަން ޖެހޭނެ ކަމަށް ބެލެވޭއިރު، ބަޔާނުން އަނެއްކާ ވެސް ޑިއާޒް ހޯދުމުގެ މަސައްކަތް ފަށަން ނިންމީ އެވެ.
ޖަރުމަނުގެ ނޫހެއް ކަމަށްވާ ބިލްޑް އިން ރިޕޯޓްކުރާ ގޮތުގައި ޑިއާޒް ވަނީ، ބަޔާނަށް ބަދަލުވާން އަނގަބަހުން އެއްބަސްވެފަ އެވެ. އެކަމަކު، ލިވަޕޫލުން ޑިއާޒް ވިއްކަން ކިޔާ އަގު 90 މިލިއަން ޑޮލަރަށް ވުރެ ކުޑަކުރަން އެ ކްލަބުން އެއްބަހެއްނުވާއިރު، ބަޔާނުން އެ ވަރުގެ ބިޑެއް ކުރުމުގެ ފުރުސަތު މި ވަގުތަށް ބަލާއިރު ފެންނަނީ ކުޑަކޮށެވެ.
ޕޯޗުގަލްގެ ޕޯޓޯއިން ލިވަޕޫލަށް ޑިއާޒް ބަދަލުވީ 2022 ވަނަ އަހަރު ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. މިހާތަނަށް ލިވަޕޫލަށް ކުޅެދިން 148 މެޗުން ޑިއާޒް ވަނީ އެ ޓީމަށް 41 ލަނޑު ޖަަހައި، 28 ލަނޑު ޖަހަން ފުރުސަތު ތަނަވަސްކޮށްދީފަ އެވެ. ޑިއާޒް ވަނީ ލިވަޕޫލާ އެކު، ޕްރިމިއާ ލީގާއި ލީގު ކަޕް ދެ ފަަހަރު އަދި އެފްއޭ ކަޕްގެ ޗެމްޕިއަންކަން ހޯދައިފަ އެވެ. މިދިިޔަ ސީޒަނުގެ ހުރިހާ މުބާރާތެއްގައި ޑިއާޒް ވަނީ 22 ގޯލު ޖަހައިފަ އެވެ. އެއީ، ލިވަޕޫލާ ގުޅުނު ފަހުން، އޭނާގެ ފަރާތުން ފެނިގެންދިޔަ ލަނޑު ޖެހުމުގެ ރެކޯޑް އެންމެ ރަނގަޅު ސީޒަނެވެ.
މިދިިޔަ ހަފްތާގެ ބުދަ ދުވަހުގެރޭ ކާރު އެކްސިޑެންޓެއްގައި، ލިވަޕޫލްގެ 28 އަހަރުގެ ފޯވާޑް، ޑިއޯގޯ ޖޮޓާ އާއި އޭނާގެ ކޮއްކޮ އަންޑްރޭ ސިލްވާ މަރުވުމުން، ހުކުރު ދުވަހު ފަށަން އޮތް ލިވަޕޫލްގެ ޕްރީ ސީޒަން ފަސްކުރި އެވެ. ހޮނިހިރު ދުވަހު، ޕޯޗުގަލްގެ ގޮންޑޮމާގައި ބޭއްވި ޖޮޓާ އާއި އަންޑްރޭގެ ޖަނާޒާގެ ކަންކަމުގައި ލިވަޕޫލް ސްކޮޑުގެ މެޖޯރިޓީ ކުޅުންތެރިން ބައިވެރިވިއިިރު، ޑިއާޒް ނުފެނެ އެވެ. އަދި، އެ ދުވަހު، ކޮލަމްބިއާގެ އިންފްލުއެންސަރުންތަކަކާ އެކު، ޑިއާޒް ޕާޓީ ކޮށްފައިވާތީވެ، އޭނާ އަށް ސަޕޯޓަރުންގެ ފާޑުކިޔުން އަމާޒުވެފައިވެ އެވެ.
އިނގިރޭސި ޕްރިމިއާ ލީގުގެ ޗެމްޕިއަން، ލިވަޕޫލުން ޕްރީ ސީޒަން ފެށުން މިއަދަށް ތާވަލުކޮށްފައިވާއިރު، އަންނަ އާދިއްތަ ދުވަހު، ޕްރެސްޓަންއާ ދެކޮޅަށް ކުޅެން ތާވަލުކޮށްފައި އޮތް މެޗު ކުރިއަށްގެންދިއުމާ މެދު ލިވަޕޫލުން އަދި ގޮތެއް ނުނިންމަ އެވެ.
