ބެޓިސް (މެއި 24) - ސްްޕެނިޝް ލީގުގައި ރެއާލް ބެޓިސް އިން ކުޅުނު ފަހު މެޗުގައި ގޯލު ޖަހައި، ބްރެޒިލްގެ ވިންގް، އެންޓޮނީ، ރަނގަޅު ފޯމު ދަމަހައްޓައިފި އެވެ.
ޔުއެފާ ކޮންފަރެންސް ލީގުގެ ފައިނަލުގައި މި ހަފްތާގައި ކުޅޭ، ބެޓިސް އާއި ވެލެންސިއާ ކުޅުނު މެޗު ރޭ ވަނީ 1-1 އިން އެއްވަރުވެފަ އެވެ. އެންޓޮނީ ޖެހި މޮޅު ގޯލުން ބެޓިސް ލީޑުގައި އޮވެ، ފުރަތަމަ ހާފު ނިންމާލިއިރު، ވެލެންސިއާ އިން ދެ ވަނަ ހާފުގައި އެއްވަރުކުރީ ރަފާ މީރް ޖެހި ގޯލުންނެވެ.
ބެޓިސް ދިޔައީ 38 މެޗުން 60 ޕޮއިންޓާ އެކު ލީގުގެ ހަ ވަނަ އެވެ. އަދި، ވެލެންސިއާ އޮތީ 38 މެޗުން 46 ޕޮއިންޓާ އެކު، ލީގުގެ 12 ވަނައިގަ އެވެ.
އަޔަކްސް ދޫކޮށް، 2022 ވަނަ އަހަރުގެ ސެޕްޓެމްބަރު މަހު، މެންޗެސްޓާ ޔުނައިޓެޑަށް އެ ކްލަބްގެ ދެ ވަނަ އަށް އެންމެ އަގުބޮޑު ޓްރާންސްފާގެ ގޮތުގައި ބަދަލުވި، އެންޓޮނީ އެ ކްލަބާ ގުޅުނީ 82 މިލިއަން ޕައުންޑަށެވެ. ޔުނައިޓެޑުގައި ދަށްކުުޅުމެއް ދައްކާތީ، ފާޑުކިޔުން އަމާޒުވި އެންޓޮނީ ޖެނުއަރީ ޓްރާންސްފާގައި ލޯން ޑީލެއްގައި ބެޓިސް އަށް ބަދަލުވެ، އަންނަނީ ތަފާތު ކުޅުމެއް ދައްކަމުންނެވެ.
އެ ގޮތުން، ބެޓިސް އަށް ލީގާއި ކޮންފަރެންސް ލީގުގައި މިހާ ތަނަށް ކުޅުނު 24 މެޗުން އަށް ގޯލު ޖަހައި ފަސް ލަނޑު ޖަހަން، އެންޓޮނީ ވަނީ ފުރުސަތު ތަނަވަސްކޮށްދީފަ އެވެ. ބެޓިސް އަށް ކޮންފަރެންސް ލީގުގެ ފައިނަލުން ޖާގަ ހޯދައިދޭން އެންޓޮނީ ވަނީ މުހިންމު ދައުރެއް އަދާކޮށްފަ އެވެ.
ޔުއެފާ ކޮންފަރެންސް ލީގުގެ ފައިނަލަށް ތައްޔާރުވާން ރެއާލް ބެޓިސް އަށް ލުޔެއް ދޭން ލަލީގާ އިން ނިންމުމުން، ކޮންފަރެންސް ލީގުގެ ފައިނަލުގައި ބެޓިސްއާ ދެކޮޅަށް ކުޅޭ ޗެލްސީގެ ކޯޗު އެންޒޯ މަރެސްކާ ހިތްހަމަނުޖެހުން ފާޅުކުރި އެވެ.
ބެޓިސް އާއި ޗެލްސީ ކުޅޭ ކޮންފަރެންސް ލީގުގެ ފައިނަލް މެޗު އޮތީ މި މަހުގެ 28 ވަނަ ދުވަހު އެވެ. އެ މެޗުގެ ކުރިން، ސްޕެނިޝް ލީގުގެ ފަހު މެޗުގައި ވެލެންސިއާއާ ދެކޮޅަށް ބެޓިސް ކުޅެން އެންމެ ފުރަތަމަ ޝެޑިއުލުގައި އޮތީ ހޮނިހިރު ދުވަހުގަ އެވެ. އެކަމަކު، ބެޓިސް އިން ހުށަހެޅުމުން، ލަލީގާ އިން ވަނީ ބެޓިސްގެ މެޗު ރެ އަށް ބަދަލުކޮށްދީފަ އެވެ.
ޗެލްސީން ޕްރިމިއާ ލީގުގައި ކުޅޭ ފަހު މެޗުގައި ކުޅޭނީ އާދިއްތަ ދުވަހުގެރޭ، ނޮޓިންހަމް ފޮރެސްޓާ ދެކޮޅަށެވެ. އެއީ، އަންނަ ސީޒަނުގެ ޗެމްޕިއަންސް ލީގުގެ ޖާގައެއް ހޯދަން ޗެލްސީ އަށް މޮޅެއް ހޯދަން މަޖުބޫރު މެޗެކެވެ. ޕްރިމިއާ ލީގުގައި ފަހު ހުރިހާ މެޗެއް އެއްވަގުތެއްގައި ކުޅޭތީ، ޗެލްސީގެ މެޗު އަވަސް ކުރެވޭނެ އެއްވެސް ގޮތެއް ނެތެވެ.
ބެޓިސްގެ މެޗު ޝެޑިއުލަށް ލުޔެއް ދޭން ނިންމުމުން، މަރެސްކާ ބުނީ، ފައިނަލެއްގެ ކުރިން އެއް ޓީމަކަށް ބޮޑު ފަސޭހައެއްވާ ގޮތަށް ކަންތައްތައް ރޭވުމަކީ އިންސާފެއް ނޫން ކަމަށެވެ.
