މިއުނިކް (މެއި 18) - މި ސީޒަނަށް ފަހު، ބަޔާން މިއުނިކް ދޫކޮށްލަން ނިންމާފައިވާ ތަޖުރިބާކާރު ފޯވާޑް، ތޯމަސް މުލާ، އެ ކްލަބަށް ކުޅެދިން ފަހު މެޗުން އެ ޓީމުން ހޮފެންހައިމް އަތުން 4-0 އިން މޮޅުވެއްޖެ އެވެ.
އުމުރުން 35 އަަހަަރުގެ މުލާ، ބަޔާނާ އެކު، 13 ލީގު ތަށްޓާއި ދެ ޗެމްޕިއަންސް ލީގު ކާމިޔާބުކުރިއިރު، އޭނާ އަކީ އެ ކްލަބަށް އެންމެ ގިނަ މެޗު ކުޅެދިން ކުޅުންތެރިޔާ އެެވެ. އޭނާ ވަނީ ބަޔާނަށް 751 މެޗު ކުޅެދީފަ އެވެ. އޭނާ ވަނީ އެ ޓީމަށް ކުޅެދިން އެ މެޗުތަކުގައި، 248 ގޯލު ޖަހައި، 274 ގޯލު ޖަހަން ފުރުސަތު ހޯދައިދީފަ އެެވެ.
އަންނަ މަހު، އެމެރިކާގައި ބާއްވާ ފީފާ ކްލަބް ވޯލްޑް ކަޕްގައި ވާދަކުރާ ބަޔާން ސްކޮޑުގައި މުލާ ހިމަނާނަމަ ކޮންޓްރެކްޓް ކުރު މުއްދަތަކަށް ނަމަވެސް އާ ކުރަން ޖެހޭނެ ކަމަށް ރިޕޯޓްތައް ބުނާއިރު، އެ ކަމާ މެދު ހައްލެއް ހޯދަން ބަޔާނުން މަސައްކަތްކުރާ ކަމަށް ރިޕޯޓްތައް ބުނެ އެވެ.
މުލާގެ ސޮއި ހޯދަން އެމެރިކާގެ ލީގު، މޭޖަ ލީގު ސޮކާ (އެމްއެލްއެސް)ގެ ޓީމުތަކުން އަންނަނީ މަސައްކަތް ކުރަމުންނެވެ.
ހޮފެންހައިމް ދަނޑުގައި، ރޭ ކުޅުނު މެޗުގައި ބަޔާންގެ ލަނޑުތައް ޖަހައިދިނީ، މައިކަލް އޮލީސޭ، ހެރީ ކޭން، ސާޖް ގްނަބްރީ އަދި ޖޯޝުއާ ކިމިކް އެވެ. ބަޔާނުން މި މޮޅާ އެކު، ލީގު ޗެމްޕިއަންކަން ހޯދާފައި މި ވަނީ ދެ ވަނައިގައި އޮތް ލެވަކޫސަން އަށް ވުރެ 13 ޕޮއިންޓް ކުރީގައި އޮވެގެންނެވެ.
