ސުޕްރީމް ކޯޓުގެ ދެ ފަނޑިޔާރަކު މަގާމުން ވަކި ކުރަން ފެންނަ ކަމަށް ބުނެ ރިޕޯޓު ހެދި ޖުޑީޝަލް ސާވިސް ކޮމިޝަނުގެ ކުޑަ ކޮމިޓީގެ މެންބަރުން ވެސް އެ ރިޕޯޓު ފާސް ކުރަން ވޯޓު ދިން ކަން އެނގިއްޖެ އެވެ.
ސުޕްރީމް ކޯޓުން ވަކި ކުރަން ނިންމާފައި ވަނީ ފަނޑިޔާރު އަޒްމިރާލްދާ ޒާހިރާއި ފަނޑިޔާރު މަހާޒް އަލީ ޒާހިރެވެ. ފަނޑިޔާރުން ވަކި ކުރަން ނިންމީ ބުއްދީގެ ހަމަތަކުން ބަލާއިރު އެ ފަނޑިޔާރުން ދަށު ކޯޓަށް ނުފޫޒު ފޯރުވި ކަމަށް ގަބޫލު ކުރެވޭ ކަމަށް ބުނެ އެވެ.
ފަނޑިޔާރުން ވަކި ކުރަން ފެންނަ ކަމަށް ބުނާ ރިޕޯޓު އިއްޔެ ފާސް ކުރަން ނެގި ވޯޓުގައި ކޮމިޝަނުގެ 10 މެންބަރުންގެ ތެރެއިން އަށް މެންބަރުން ބައިވެރިވި އެވެ. ވޯޓުގައި ބައިވެރިނުވަނީ ޖޭއެސްސީގެ ރައީސް ހުސެއިން ރިޒާ އާދަމް އާއި ބަންޑާރަ ނައިބު އަހުމަދު އުޝާމް އެވެ.
ފަނޑިޔާރުން ވަކި ކުރަން ފެންނަ ކަމަށް ވޯޓު ދިނީ ފަސް މެންބަރުންނެވެ. އެއީ ސުޕްރީމް ކޯޓުގެ ފަނޑިޔާރު ހުސެއިން ޝަހީދު އާއި މަޖިލީހުގެ ރައީސް އަބުދުއްރަހީމް އަބްދުﷲ އާއި މެންބަރު އަލީ އަބްދުއްލަތީފް އާއި ރައީސް އައްޔަން ކުރައްވާފައިވާ މެންބަރު ޔަޒްމީދު މުހައްމަދު އާއި ރައީސް އައްޔަން ކުރައްވާފައިވާ ސިވިލް ސާވިސް ކޮމިޝަނުގެ ރައީސް މުހައްމަދު ނާސިހެވެ.
އޭގެ ތެރެއިން އަލީ އަބްދުއްލަތީފާއި ޔަޒްމީދު އާއި ނާސިހަކީ ފަނޑިޔާރުންގެ މައްސަލަ ތަހުގީގުކޮށް ރިޕޯޓު ހެދި ކުޑަ ކޮމިޓީގައި ހިމެނޭ މެންބަރުންނެވެ. ކުޑަ ކޮމިޓީގެ މެންބަރުން ވޯޓުގައި ބައިވެރިނުވުމަކީ ފަނޑިޔާރުންގެ އެދުމެވެ.
ފަނޑިޔާރުން ވަކި ކުރަން ނުފެންނަ ކަމަށް ވޯޓު ދެއްވީ އެންމެ ދެ މެންބަރުންނެވެ. އެއީ ހައި ކޯޓުގެ ފަނޑިޔާރު މުހައްމަދު ނިޔާޒް އާއި ފަނޑިޔާރު ފަރުހާދު ރަޝީދެވެ. އާންމުންގެ ތެރެއިން ޖޭއެސްސީއަށް ރައްޔިތުންގެ މަޖިލީހުން އައްޔަން ކުރި މެންބަރު އައިމިނަތު އުއްމުކުލްސޫމް ވަކި ކޮޅަކަށް ވޯޓެއް ނުދެއްވަ އެވެ.
ފަނޑިޔާރުން ވަކި ކުރަން ނިންމުމަށްފަހު ހަމަ އިއްޔެ އެ މައްސަލަ ވަނީ ރައްޔިތުންގެ މަޖިލީހަށް ފޮނުވައިފަ އެވެ. އަދި އެ މައްސަލަ ރައްޔިތުންގެ މަޖިލީހުގެ އެޖެންޑާގައި ވަނީ މިއަދު ހިމަނައިފަ އެވެ. ފަނޑިޔާރުން މަގާމުން ވަކިވާނީ ރައްޔިތުންގެ މަޖިލީހުން ފާސް ކުރުމުންނެވެ.
ފަނޑިޔާރުންގެ މައްސަލަ ބެލި ކުޑަ ކޮމިޓީއިން ވަނީ ފަނޑިޔާރުންގެ ދިފާއުގައި ހުށަހެޅި ހެކިތައް ބަލައިގަތުމަށް ދެކޮޅު ހަދައިފަ އެވެ. ސަބަބެއް ކަމަށް ބުނީ ދިފާއީ ހެކި ގެނައި ނަމަވެސް ކޮމިޓީގެ ނިންމުމަށް ބަދަލެއް ނާންނާނެ ކަމަށެވެ.
ފަނޑިޔާރު އަޒްމިރާލްދާ އާއި މަހާޒްގެ އިތުރުން ފަނޑިޔާރު ހުސްނުއްސުއޫދުގެ މައްސަލައެއް ވެސް ޖޭއެސްސީއިން ބަލަން ނިންމި އެވެ. އެކަމަކު، މައްސަލަ ބަލަން ފެށުމާއެކު ސުއޫދު ވަނީ މަގާމުން އިސްތިއުފާ ދެއްވައިފަ އެވެ. އިސްތިއުފާ ދެއްވީ ރައީސް މުހައްމަދު މުއިއްޒާއި ބަންޑާރަނައިބު އަހުމަދު އުޝާމް ފަނޑިޔާރުންނަށް ބިރު ދައްކަވާތީ އެކަމާ އިހުތިޖާޖު ކުރެއްވުމުގެ ގޮތުން ކަމަށް ސުއޫދު ވިދާޅުވި އެވެ.
ޖޭއެސްސީއިން ސުޕްރީމް ކޯޓުގެ ފަނޑިޔާުރުންތަކެއްގެ މައްސަލަ ކުއްލި ގޮތަކަށް ބަލަން ފެށީ، ސިޔާސީ ޕާޓީތަކުން ބޭނުންވެއްޖެ ހާލަތެއްގައި ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހުގެ މައްސަލަ އެ ކޯޓުން ބަލަން ފެށުމުންނެވެ.
ފަނޑިޔާރުންގެ މައްސަލަ ބަލާ ކޮމިޓީގައި ޖޭއެސްސީން ހިމެނީ ތިން މެންބަރެކެވެ. އޭގެ ތެރޭގައި ރައީސް މުއިއްޒު އައްޔަން ކުރައްވާފައިވާ ދެ މެންބަރަކު ހިމެނެ އެވެ. އެއީ ޖޭއެސްސީއަށް ރައީސް އައްޔަން ކުރައްވަންޖެހޭ މެންބަރުގެ އިތުރުން ސިވިލް ސާވިސް ކޮމިޝަނުގެ ރައީސް އެވެ.
ފަނޑިޔާރުންގެ މައްސަލަތައް ބަލަން ފެށީ އެންޓި ކޮރަޕްޝަން ކޮމިޝަނުގެ ރައީސް އާދަމް ޝާމިލް ޖޭއެސްސީއަށް ފޮނުވި ސިއްރު ސިޓީއަކަށް ބިނާކޮށެވެ. އެ ސިޓީ ފޮނުވާފައި ވަނީ އާންމުކޮށް އެފަދަ ސިޓީ ފޮނުވާ އުސޫލުތަކާ ހިލާފަށް ޖެމްސް ސިސްޓަމް މެދުވެރިނުކޮށެވެ.
ފަނޑިޔާރުންގެ މައްސަލަތައް ބަލަން ފެށުމާއެކު، ސަރުކާރުން ކޯޓުތަކަށް ނުފޫޒު ފޯރުވާތީ އެކަަމާ ވަރަށް ގިނަ ބަޔަކު ކަންބޮޑުވުން ފާޅު ކުރެއްވި އެވެ. އޭގެ ތެރޭގައި ކުރީގެ ފަނޑިޔާރުންނާއި ވަކީލުންނާއި ގާނޫނީ މާހިރުން ހިމެނެ އެވެ. އަދި އދ. ގެ ކަމާ ބެހޭ އެކްސްޕާޓު ވެސް ވަނީ އެކަމާ ކަންބޮޑުވުން ފާޅުކޮށްފަ އެވެ. އެ މައްސަލައިގައި އދ. އިން ވަނީ ރައީސް އޮފީހަށް ސިޓީއެއް ވެސް ފޯރުވައިފަ އެވެ.
