އެމެރިކަން ޖާނަލް އޮފް ޕްރިވެންޓިވް މެޑިސިންގައި ޝާއިއުކުރި އައު ދިރާސާއަކުން ދައްކައިދެނީ އަލްޓްރާ ޕްރޮސެސްޑް ކާނާގެ ސަބަބުން މީހުންގެ އުމުރު ކުރުވެ، ޅަ އުމުރުގައި މަރުވުމުގެ ނުރައްކާ އިތުރުވެގެންދާ ކަމެވެ. ބްރެޒިލްގެ އޮސްވަލްޑޯ ކްރުޒް ފައުންޑޭޝަންގެ އެޑުއާޑޯ އަގުސްޓޯ ފަރްނާންޑްސް ނިލްސަން ވަނީ މި ދިރާސާ ކުރައްވާފަ އެވެ.
ދިރާސާގައި ދައްކައިދެނީ ދުވާލަކު ކެވޭ އަލްޓްރާޕްރޮސެސްޑް ކާނާގެ މިންވަރު 10 ޕަސެންޓު އިތުރުވާނަމަ، ޅަ އުމުރުގައި މަރުވުމުގެ ނުރައްކާ ތިން ޕަސެންޓުން އިތުރުވެގެންދާ ކަމަށެވެ. މިފަދަ ކާނާ ބޭނުންކުރުމުގެ ސަބަބުން ހަށިގަނޑަށް ދިމާވާ މައްސަލަތަކުގެ ތެރޭގައި ހިމެނެނީ ފަލަވުން، ހަކުރުބަލި، ބައެއް ބާވަތުގެ ކެންސަރު އަދި ނަފްސާނީ ބަލިތަކެވެ.
އަލްޓްރާ ޕްރޮސެސްޑް ކާނާއަކީ ގިނަ މިންވަރެއްގެ ހަކުރު، ލޮނު، ޓްރާންސް ފެޓް އަދި ކުލައާއި ރަހަ އިތުރުކުރުމަށް ބޭނުންކުރާ އެކިއެކި ކެމިކަލްތައް އެކުލެވޭ ގޮތަށް ފެކްޓްރީތަކުގައި އުފައްދާ ވަރަށް ބޮޑަށް ޕްރޮސެސްކުރެވިފައިވާ ކާނާ އެވެ.
ޑރ. ނިލްސަން ވިދާޅުވި ގޮތުގައި، އަލްޓްރާ ޕްރޮސެސްޑް ކާނާއިން ގެއްލުން ލިބެނީ ސޯޑިއަމް، ޓްރާންސް ފެޓް، އަދި ހަކުރު ގިނަވުމުގެ ސަބަބުން އެކަންޏެއް ނޫނެވެ. އޭގެ އިތުރުން، މިފަދަ ކާނާ އުފެއްދުމަށް ފެކްޓްރީގައި ގެންނަ ބަދަލުތަކާއި ބޭނުންކުރާ އިތުރު ކެމިކަލްތަކުގެ ސަބަބުންވެސް ސިއްހަތަށް ގެއްލުން ލިބެ އެވެ.
ހާއްސަ ކަންބޮޑުވުމެއްގެ ގޮތުގައި ފާހަގަކޮށްފައިވަނީ މިފަދަ ކާނާއިން ކުޑަކުދިންނަށް ކުރާ ނޭދެވޭ އަސަރެވެ. ގިނަ ގައުމުތަކުގައި ކުޑަކުދިންނާއި ޒުވާނުން އެ މީހުންގެ ދުވާލެއްގެ ކެލަރީގެ ބޮޑު ބައެއް ހޯދަނީ މިފަދަ ކާނާ އިންނެވެ. ކުޑައިރުއްސުރެ މިފަދަ ކާނާ ކައިއުޅުމުގެ ސަބަބުން އުމުރު ދުވަހަށް ފަލަވުމާއި، ހަކުރުބަލި، އަދި އެހެނިހެން ބަލިތަކަށް ހުށައެޅުމުގެ ފުރުސަތު އިތުރުވެގެންދެ އެވެ.
މައްސަލަ އެންމެ ބޮޑަށް ފެންނަނީ މުއްސަދި ގައުމުތަކުގައި ކަމުގައިވިޔަސް، ތަރައްގީވަމުން އަންނަ ގައުމުތަކުގައި ވެސް އަލްޓްރާ ޕްރޮސެސްޑް ކާނާ ބޭނުންކުރާ މިންވަރު އަވަސް ދުވެލީގައި އިތުރުވަމުންދާކަން ފާހަގަކުރެވެ އެވެ. މިކަމުގެ ސަބަބުން ދުނިޔޭގެ އެކި ކަންކޮޅުތަކުގައި އެމީހުންގެ ކާނާއާއި ރީތި ސަގާފަތްތައް ގެއްލި، މިފަދަ ކާނާ އާންމުވަމުންދާކަން ފާހަގަކުރެވެ އެވެ.
ސިއްހީ މާހިރުން ބުނާ ގޮތުގައި، މި މައްސަލައަށް ހައްލެއް ހޯދުމަށް އަލްޓްރާ ޕްރޮސެސްޑް ކާނާގެ ޕެކެޓްތަކުގައި މިފަދަ ކާނާއިން ލިބޭ ގެއްލުންތަކާ ބެހޭ މައުލޫމާތު ސާފުކޮށް ލިޔުމާއި، އެފަދަ ކާނާގެ މައްޗަށް ޓެކްސް ނެގުމާއި، އިޝްތިހާރުކުރުމުގެ ގާނޫނުތައް ހަރުދަނާކުރުން ހިމެނެ އެވެ.
ދުޅަހެޔޮ ސިއްހަތެއްގައި ހުރުުމަށްޓަކައި ކެއުމުގެ އާދަތަކަށް ކުދި ބަދަލުތަކެއް ގެނައުމުން ދުޅަހެޔޮ ދިރިއުޅުމަކަށް މަގުފަހިވެގެންދާނެ އެވެ. ތާޒާ މޭވާއާއި ތަރުކާރީ އަދި ގޭގައި ތައްޔާރުކުރެވޭ ކާނާ ކެއުމުން ފެކްޓްރީގައި އުފައްދާ ކާނާއިން ލިބޭ ގެއްލުން ކުޑަކުރެވިގެންދާނެއެވެ. ލޮނުގަދަ ކާނާއާއި ހަކުރުގިނަ ބުއިންތައް މަދުކުރުމުންވެސް ސިއްޙަތަށް ފައިދާތަކެއް ލިބޭނެއެވެ.
