ސިކުނޑީގެ ވަކިވަކި ނާރުތަކުގެ މަސައްކަތްތައް ހުއްޓުވުމަށާއި އަލުން ފެށުމަށް ނުވަތަ "ސްވިޗް އޮން އެންޑް އޮފް" ކުރުމާ ގުޅޭ ގޮތުން ހޯދުންތައް ހޯއްދެވި ތިން ސައިންސްވެރިއަކަށް މި އަހަރުގެ ބޭސްވެރިކަމުގެ ދާއިރާގެ ނޯބެލް އިނާމު ހޯމަ ދުވަހު އަރުވައިފި އެވެ.
މި ޝަރަފުވެރި އިނާމު ލިބިވަޑައިގަތީ އުމުރުން 54 އަހަރުގެ ކާލް ޑައިސަރޯތު އާއި، 71 އަހަރުގެ ޕީޓާ ހެގަމަންގެ އިތުރުން 73 އަހަރުގެ ޖޯޖް ނާގެލް އަށެވެ. ޖަރުމަނާއި އެމެރިކާގެ ޔުނިވާސިޓީތަކުގައި މަސައްކަތް ކުރައްވާ މި ތިން ސައިންސްވެރިން ވަނީ "ލައިޓް-ގޭޓަޑް އަޔަން ޗެނަލްސް" އާއި "އޮޕްޓޯޖެނެޓިކްސް" އާ ގުޅޭގޮތުން ފުޅާ ދާއިރާއެއްގައި ދިރާސާތައް ކުރައްވާފަ އެވެ.
ނޯބެލް އެސެމްބްލީން އެ ބޭފުޅުންގެ މަސައްކަތަށް ތައުރީފު ކުރައްވަމުން އެކްސްގައި ބުނެފައިވަނީ، އެ ސައިންސްވެރިން ހޯއްދެވި އުސޫލުތަކަކީ މިހާރު މުޅި ދުނިޔޭގެ ލެބޯޓްރީތަކުގައި ސިކުނޑީގެ ސިއްރުތައް ދެނެގަތުމަށް ބޭނުންކުރަމުންދާ މުހިންމު ވަސީލަތްތަކެއް ކަމަށެވެ.
އެސެމްބްލީން ހާމަކޮށްފައިވާ ގޮތުގައި ކާލް ޑައިސަރޯތު މަސައްކަތް ކުރައްވަނީ އެމެރިކާގެ ކެލިފޯނިއާގައި ހުންނަ ސްޓެންފޯޑް ޔުނިވާސިޓީގަ އެވެ. އަދި ޕީޓާ ހެގަމަން ބާލިންގެ ހަމްބޯލްޓް ޔުނިވާސިޓީގައި މަސައްކަތް ކުރައްވާއިރު، ޖޯޖް ނާގެލް މަސައްކަތް ކުރައްވަނީ ޖަރުމަނުގެ ޔުނިވާސިޓީ އޮފް ވިއުރްޒްބާގްގަ އެވެ.
އޮޕްޓޯޖެނެޓިކްސްގެ ސަބަބުން ނިއުރޯސައިންސް ނުވަތަ ސިކުނޑީގެ އިލްމުގެ ދާއިރާއަށް އާ ޒަމާނެއް އައިސްފައިވާ ކަމަށް ނޯބެލް އެސެމްބްލީން ސިފަކުރެ އެވެ. އަލީގެ އެހީގައި ސިކުނޑީގެ ނާރުތަކާއި ސާކިޓްތައް ކޮންޓްރޯލް ކުރެވޭނެ ގޮތް ހޯދުމުގެ ސަބަބުން، ސިކުނޑި މަސައްކަތްކުރާ ގޮތާއި، އިންސާނާގެ އުޅުމަށާއި ބަލިތަކަށް މަގުފަހިވާ ކަންކަން ދެނެގަތުމަށް ވަނީ ފަސޭހަވެފަ އެވެ.
މި ހޯދުންތައް ފެށިގެން އައީ އެއް ސެލް އެކުލެވޭ ފެހި ކުލައިގެ އަލްގޭ، އަލި ހުންނަ ދިމާލަށް ދަތުރުކުރާ ގޮތް ހެގަމަން ދިރާސާ ކުރެއްވުމުގެ ތެރެއިންނެވެ. ނޫކުލައިގެ އަލި އެޅުމުން އިލެކްޓްރިކަލް އިމްޕަލްސް އުފައްދައިދޭ ޕްރޮޓީނެއް ދިރާސާގެ ތެރެއިން ފާހަގަވި އެވެ. އަދި އެހެން ސެލްތަކަށް މި ޕްރޮޓީން ފޮނުވުމުން، އެ ސެލްތަކަކީވެސް އައްޔަށް އިޖާބަދޭ ސެލްތަކަކަށް ބަދަލުވެ އެވެ.
މި ދިރާސާތަކުގެ މައްޗަށް ބިނާކޮށް، ދިރިހުރި މީދަލުގެ ސިކުނޑީގެ ނާރުތައް އަލީގެ އެހީގައި ކޮންޓްރޯލް ކުރެވޭނެ "ސްވިޗެއް" އުފެއްދުމަށްޓަކައި، އެ ޕްރޮޓީން ކޮންޓްރޯލްކުރާ ޖީން ބޭނުންކޮށްގެން ޑައިސަރޯތު ވަނީ އިތުރު މަސައްކަތްތަކެއް ކުރައްވާފަ އެވެ.
